Da 109. Psalm.
En Gebayt Geyyich Di Feinda
Zumm foah-singah. En Psalm fumm Dawfit.
1 Oh Gott, du es ich preisa du,
bleib nett shtill.
2 Gottlohsi un falshi mennah
henn iahra meilah uf gmacht geyyich mich,
si henn geyyich mich kshvetzt mitt zunga es leeya.
3 Si henn mich umgringd mitt vadda funn hass,
un si shtreida geyyich mich unni uahsach.
4 Si pshuldicha mich diveil es ich si leeb;
avvah ich bayt fa si.
5 Si betzawla mich zrikk evil fa goodes,
un hass fa mei leevi.
6 Setz en gottlohsah mann ivvah een,
loss aynah es pshuldicht an sei rechtsi hand shtay.
7 Vann si een richta, loss een shuldich kfunna sei,
loss sei gebayt gnumma sei es en sind.
8 Loss sei dawwa vennich sei;
loss ebbah shunsht sei blatz nemma.
9 Loss sei kinnah sei unni en faddah,
un sei fraw en vitt-fraw
10 Loss sei kinnah rumm lawfa un bedla;
loss si aus iahra fadauvani heisah gyawkt sei.
11 Loss da geld-laynah alles nemma es eah hott,
loss fremdi sell nemma es eah fadeend hott.
12 Loss nimmand bamhatzich sei zu eem,
un loss nimmand sei kinnah unni faddah davvahra.
13 Loss sei nohch-kummashaft abkshnidda sei,
loss sei kinds-kinnah iahra nohma ausgrivva sei in di zeit vo kumd.
14 Loss es evila funn sei foah-feddah nett fagessa sei bei em Hah,
un di sind funn sei muddah nee nett ausgrivva sei.
15 Loss iahra sinda immah fannich em Hah sei,
un loss es ohdenkes funn eena gans fagessa sei uf di eaht.
16 Eah hott nee nett droh gedenkt fa bamhatzich sei,
avvah eah hott di aylendicha, di oahma
un bedreebda fafolkt zumm doht.
17 Eah hott geglicha en fluch ausshprecha;
loss en fluch uf een kumma.
Eah hott nett geglicha en sayya gevva;
loss di sayya veit vekk sei funn eem.
18 Eah hott da fluch gvoahra vi en glayt,
loss en fluch in sei leib gay vi vassah,
un in sei gnocha vi ayl.
19 Loss es sei zu eem es vi glaydah es um een rumm gvikkeld sinn,
vi en belt es immah um een rumm is.
20 Loss dess di betzawling fumm Hah sei
zu selli es mich pshuldicha,
zu selli es evil shvetza geyyich mich.
21 Avvah du, mei Gott da Hah,
helf miah fa di sayk funn deim nohma;
deich dei shtandhaftichi-leevi,
mach mich frei.
22 Fa ich binn oahm un habb grohsi noht,
mei hatz dutt vay in miah.
23 Ich binn am fagay vi en ohvet shadda,
ich binn abkshiddeld vi en hoi-shrekk.
24 Mei gnee sinn shvach funn fashta,
mei leib is mawwa unni fett.
25 Ich binn leit iahra shpott,
vann si mich sayna, shidla si iahra kobb.
26 Helf miah, oh Hah mei Gott,
deich dei shtandhaftichi-leevi mach mich frei.
27 Loss si vissa es dess dei hand is,
es du, oh Hah, dess gedu hosht.
28 Loss si flucha, avvah du saykendsht,
loss selli es mich pshuldicha sich shemma,
avvah loss dei gnecht froh sei.
29 Loss selli es mich pshuldicha geglayt sei mitt shohm,
loss si iahra shohm veahra vi en vammes.
30 Mitt mei maul zayl ich grohs dank gevva zumm Hah,
un in di grohs drubb leit zayl ich een lohva.
31 Fa eah shtayt uf di rechts hand funn sellah es noht hott,
un macht een frei funn selli es een fadamma.