1 Avvah dess hott da Jona oahrich shlecht ksoot un eah voah bays.

2 Eah hott no zumm Hah gebayda un hott ksawt, “Oh Hah, is dess nett grawt vass ich ksawt habb vo ich noch in meim land voah? Fasell binn ich kshvind vekk noch Tharsis ganga. Fa ich habb gvist es du en goot-maynichah, bamhatzicha Gott bisht, un es du nett kshvind bays vasht, avvah hosht grohsi leevi. Du bisht immah grisht fa dei meind tshaynsha un nett shtrohfa fa evil.

3 So nau, oh Hah, nemm mei layva vekk funn miah, fa ich vett leevah doht sei es layva.”

4 Avvah da Hah hott ksawt, “Hosht du en recht fa bays sei?”

5 No is da Jona naus ganga un hott sich anna kokt east funn di shtatt. Datt hott eah en blatz gmacht es eah im shadda hokka hott kenna, un hott gvoaht fa sayna vass es gebt mitt di shtatt.

6 Gott da Hah hott no en shtokk gmacht ufvaxa ivvah da Jona fa shadda macha ivvah sei kobb, so es es een nett so hays dinkt. Da Jona voah oahrich froh fa deah shtokk.

7 Avvah da neksht meiya vi's am dawk vadda voah hott Gott en voahm gmacht da shtokk ohfressa so es ah fadatt is.

8 Vo di sunn uf kumma is hott Gott en haysah east vind kshikt, un di sunn hott so hays uf em Jona sei kobb ksheind es eah shiah ummechtich is vadda. Eah hott no gvinsht eah kend shteahva un hott ksawt, “Ich vett leevah doht sei es layva.”

9 Avvah Gott hott ksawt zumm Jona, “Hosht du goodi uahsach fa bays sei veyyich em shtokk?” Da Jona hott ksawt, “Ich habb goodi uahsach fa bays sei, bays genunk fa shteahva.”

10 No hott da Hah ksawt, “Du davvahsht deah shtokk vo du nett kshaft hosht difoah, un hosht'n aw nett vaxa gmacht. Eah is uf kumma ivvah-nacht un is doht ganga ivvah-nacht.

11 Sett ich nett feel may Nineveh davvahra, selli grohs shtatt mitt may es en hunnaht un zvansich dausend leit es nett vissa kenna zvishich iahra rechtsi un lingsi hand, un aw mitt feel fee?”