3
Jè tèpa naî Pwiduée
1 Ioane 1.12–13, 16.3Guwà côo, dau maina awé ê pimeaari kà Pwiduée Caa ba kâjè, ba é pitunee tâjè pâ, na jè tèpa naîê! Â jèe wàijè gooni! Napwa naa goo wà tèpa âboro naa gòropuu bèeni, âna càra caa tâmogòori pwiri* Tâmogòori pwiri—é, Côoinajè, é, tâmogòorijè., ba càra caa tâmogòori wà Pwiduée, Caa kâjè.
2 2 Korénito 3.18Tèpa âji béeò, jè jèe tèpa naî Pwiduée nabà. Â o mwa wànau, na pwi tòotù na ée mwa wâjué me côwâ na, wà Kériso† 2e phrase—é, Widàuru ma wiilu.? Jè nye tâmogòori pâ, o tòotérijè, ba na jè pwacèwiié, wiàna jè côoê gée, [naa na pwényuâa kêe]. 3 Êkaa na jè pitòimirijè, ba na o ticè èpà goojè, na jè tà tapacîri goro cèikî ê pwi tòotù-bà. Ba wà Kériso, âna é pitòimiriê, â ticè èpà gooé.
Jè cibwaa ciburà pwa na èpà!
4 Wà tàpé na rà pwa na èpà, âna rà [jèe pâ nau pwacèwii wà Pwina é] cicara wà Pwiduée ma ê pâ aupitûâri kêe. Ba wiàna jè pwa na èpà, â jè cicara Pwiduée. 5 Ioane 1.29; 1 Pétéru 2.22–24; 1 Ioane 2.2Â guwà jèe nye tâmogòori pâ, é jèe tèepaa wà Iésu Kériso, ba na é patâjii ê pâ èpà kà tèpa âboro‡ Ba na é patâjii ê pâ èpà… é, Ba na é pitu tà tèpa âboro, ba na o càra mu caa pwa na èpà., â nye ticè èpà gooé. 6 Wiàna jè tâa gooé, â câjè mwa caa pwa na èpà. Â wà pwi âboro na é ciburà pwa na èpà, âna câé mu caa côoina wà Kériso, â câé mu caa tâmogòorié.
7 Tèpa âji béeò, guwà cibwaa nama ipa-imwüruwà. É nye *tàrù pwi âboro, wiàna é pwa ê pwina tàrù ma wâdé, pwacèwii Kériso, wà pwina é dau tàrù ma wâdé awé. 8 Ioane 8.44Â wà pwi âboro na é ciburà pwa na èpà, âna é pwi âboro kà *Caatana, wà pwi ia é dau ciburà pwa na èpà gée na autapoo goo. Wàéni ê majoroé ma é tèepaa me [naani gòropuu] wà *Pwina naî Pwiduée: É me, ba na é pwa ma tiàu diri pâ wakè na èpà kà Caatana.
9 1 Ioane 5.18Wiàna gà pwina âji naî Pwiduée, â pwacoé ma gà ciburà pwa na èpà. Ba é tâa googà ê *âji wâro me gée goo Pwiduée§ Ê âji wâro, me gée goo Pwiduée—é, Ê pàtàma Pwiduée, é, ê Nyuâaê Pwicîri kà Pwiduée, é, ê popai kà Pwiduée. Grec: Ê arapwüru kà Pwiduée.. Â wiàna é tâa googà wà Pwiduée, â gà o mwa wârori ê wâro kêe. 10 Wàépwiri pai côoina tèpa naî Pwiduée ma wà tèpa naî Caatana. Ba wà pwi âboro na câé caa pitêre dà Pwiduée* Pitêre dà Pwiduée—Grec: Pwa ê pwina tàrù., âna câé caa pwi âboro kà Pwiduée. Â wà pwina câé caa meaari tèpa cèikî bée, âna câé caa pwi âboro kêe.
Wâdé na jè pimeaarijè
11 Ioane 13.34Wàéni ê *Picémara Wâdé na guwà têre na guwà tapoo cèikî† 1re phrase—Grec: Wàéni ê popai na guwà têre gée na autapoo goo.: Wâdé na jè pimeaarijè.
12 Genèse 4.8Guwà cibwaa pwacèwii Kaina, na é pwi âboro kà Caatana, wà Pwi âboro èpà. Ba wà Kaina, âna é tétàmwara Abéla, pwi jiié. Â gorodà na é tétàmwereê? Ba é pwi a pwa pâ tûâ na èpà, â wà Abéla, âna é pwi a pwa pâ tûâ na wâdé. 13 Ioane 5.18–19Êkaa na, guwà cibwaa pò, tèpa gòrobéeò, wiàna rà èpàriwà ê pâ âboro naa gòropuu bèeni [na càra caa papwicîri wà Pwiduée].
14 Ioane 5.24Wàijè, âna jè jèe pâra gée na aubà, naa na âji wâro. Wàéni ê câmu kêe—wiàna jè pimeaari tèpa cèikî béejè. Ba wà pwi âboro na câé caa pimeaari, âna é nye tà ciburà tâa na aubà, [wâiti jii Pwiduée]. 15 Auinapàpari 21.8[Wà Pwiduée, âna é niimiri pâ] wà pwi âboro na é èpàri pwi a cèikî bée, âna é pwacèwii pwi a tétàmwara âboro. Â wà tèpa tétàmwara âboro, âna càcaa wâgoorà ê *wâro dàra gòiri, [na é me gée jaa Pwiduée].
16 Ioane 13.1; Galatia 1.4Wàéni ê âji pimeaari: Wà Kériso, âna é panuâ ê wâro kêe ba kâjè. Â wâdé na jè panuâ ê wâro kâjè ba kà tèpa béejè.
17 Deutéronome 15.7Guwà côo, wiàna wâru neemurujè, â wiàna jè iauri jii pwi jè a cèikî béejè na ticè kêe, â o wànau cè pai tâa goojè ê pimeaari kà Pwiduée? 18 Jacques 2.15–16Tèpa gòrobéeò, jè cibwaa pimeaari co goro popai, â wâdé wiàna jè âji pimeaari goro ê tûâ ma càrajè.
Câjè caa piwâ na ara Pwiduée
19 Wiàna jè âji pimeaarijè goro ê pâ tûâ kâjè, â jè o tâmogòori pâ jè wâro na *âjupâra. Â o càcaa wâgotâjè, na jè coo ara Pwiduée, [wà Pwina é âjupâra]. 20 (Êco na, wiàna é pitòtijè ê pwâranümajè, â [é bwaa nye tà meaarijè wà Pwiduée. Ba] jè tâmogòori pâ, é nye piwéna jii ê pwâranümajè wà Pwiduée, wàé na é tâmogòori diri pâ muru.) 21 Hébéru 4.16Â wiàna câé caa pitòtijè ê pwâranümajè, co tèpa âji béeò, â o câjè caa piwâ ma wâgotâjè na jè coo ara Pwiduée.
22 Â ée mwa naa tâjè diri pâ namuru na jè ilari jiié, gée goo na jè pitêre dèe, ma pwa ê pwina wâdé têe. 23 Ioane 6.29, 13.34Â wàéni ê pwina é ina tâjè: Wâdé na jè cèikî naa goo Pwina naîê, Iésu Kériso; â jè pimeaarijè, pwacèwii autûâri kêe tâjè.
24 1 Ioane 4.13Wiàna jè pitêre dà Pwiduée, ma tâa gooé, â wàé, âna é tâa goojè. Â jè tâmogòori pâ, é tâa goojè, ba é wâro goojè ê Nyuâaê Pwicîri, na é jèe naa tâjè.
3:1 Ioane 1.12–13, 16.3
*3:1 Tâmogòori pwiri—é, Côoinajè, é, tâmogòorijè.
3:2 2 Korénito 3.18
†3:2 2e phrase—é, Widàuru ma wiilu.
3:5 Ioane 1.29; 1 Pétéru 2.22–24; 1 Ioane 2.2
‡3:5 Ba na é patâjii ê pâ èpà… é, Ba na é pitu tà tèpa âboro, ba na o càra mu caa pwa na èpà.
3:8 Ioane 8.44
3:9 1 Ioane 5.18
§3:9 Ê âji wâro, me gée goo Pwiduée—é, Ê pàtàma Pwiduée, é, ê Nyuâaê Pwicîri kà Pwiduée, é, ê popai kà Pwiduée. Grec: Ê arapwüru kà Pwiduée.
*3:10 Pitêre dà Pwiduée—Grec: Pwa ê pwina tàrù.
3:11 Ioane 13.34
†3:11 1re phrase—Grec: Wàéni ê popai na guwà têre gée na autapoo goo.
3:12 Genèse 4.8
3:13 Ioane 5.18–19
3:14 Ioane 5.24
3:15 Auinapàpari 21.8
3:16 Ioane 13.1; Galatia 1.4
3:17 Deutéronome 15.7
3:18 Jacques 2.15–16
3:21 Hébéru 4.16
3:23 Ioane 6.29, 13.34
3:24 1 Ioane 4.13