1 Jesusa' Kapernaum çxhabu kasehçxa', Judea kiwen vxite' Jordan yu'wala kutenku u'j kxsũ pekũjxa'. Sa' Jordan yu'wala kuteju ũste', wala nasa pkhaakhe'tx txajx ũsnite. Aça' kxteewa kaapiya'ja'kh vxite ahsũ na'wẽy.

2 Naapkaçxha' fxariseowe'sxa' Jesus tasxte utxaaçxa' na'wẽtx paapẽjx, pasya' sxiigte' ewmée vxit-ya' sũhçxa:

—Ptamsaçxawa, nyu's wãatãhte ¿ewmanx? jĩte', 3 Jesus pasçxa':

—Jiimeewá'kwe Moises jxkaahni's jĩna pẽjxte', 4 txãawe'sx pasçxa':

—Moises jxkaahçxa', nyu's wãatãjxa' ewuweçxte', nyu kazx yuuna fxi'zeni's eçte fxi'jçxa dukhçxak txuteekaja' jĩte', 5 Jesus pasçxa':

—Moisesa' txã'wẽ yũuwa'ja's nvxiht yujk, nawa peekx nyu kĩhwa yũumeetewa wãatãhna fxi'zepa'ga íiçxáak txã'wẽ yũuwa'ja's nvxiht, peekxçxáa yu' wãatãjxa' ãjãkahmén. 6 Nawa Dxusa' nyafxiitey naa kiwe's pheu'jíi e'zíitx ja'daçxajk vxit piçthẽ'j petx u'y yã'jçxa. 7 Aça' txãa pa'ga piçthẽ'ja' peekx neywe'sx tasxu txuteewa'jsa', nyu yuuwa'jsa yakh utxaaya', 8 txã'wẽ e'zçxawa, teeçxsaçxáa na'wẽ yuuna pa'jya'. Aça' txã'wẽ yũuniijũ' e'zmée teeçxçxáak yuuna pa'ja'. 9 Txãa pa'ga Dxus pũpxçxa nvxiitni ptamsayã'txhi' kim yuhwa txuhdeya' ãjãwa'jsameeta' jĩk.

10 Txajũ' Jesusa' teeçx yatte u'kate', txãa yakh u'jusawe'sxa' txã'wẽ pta'sxni's ki' pẽjxtxi. 11 Aça' Jesusa' pta'sxku:

—Maa piçthẽ'jwa peekx nyu's wãatãhçxa vxite yakh ptamuuçxa', pkalte weteena, peekx nyu's wãatãhçxa vxite yakh ptamuupa'ga. 12 Aça' u'ywa txã'wẽy nmi'a's wãatãhçxa vxite yakh ptamuuçxa', txãawa pkalteyçxáa weteena peekx nmi'a's wãatãhçxa vxite yakh ptamuupa'ga jĩk.

13 Txãa e'su' Jesus tasxte luuçxkuẽtx nuypa'jtx Dxus kusete neewe'wekahn. Aça' Jesus yakh u'jusawe'sxa' yuptxi luuçxkuẽtx nuypa'jsatx. 14 Txã'wẽ yũute', Jesusa' na'jĩnak ũusçxa we'we:

—Luuçxkuẽ adx tasxte yuusaatxi' kuçx yupnuwe, txãa pa'gatey Dxus jxkaahna ũsnisa' naa luuçxkuẽwe'sx na'wẽsa jĩi íiçxá'. 15 Na'jĩ'th na': maawa luuçxkuẽ na'wẽ Dxus jxkaahwa'j ena's wa'lmée jxpa'gameeçxa yu', bagaçxte yuhwa Dxus tasxte u'kaya' ãjãmeetxna. 16 Txã'jĩna'wa luuçxkuẽtx yakhna' dxikthesu peekizeçxa Dxus kusete neewe'wek.

17 Txajũ' Jesusa' vxite ahn u'jweçte', teeçx piçtakx dxi'the wuwuuna kũhçxa', Jesus tasxte peejxũkwek na'wẽ paapẽjxna:

—Kaapiya'jsa wala ewsa mpeeta'sx. Adxa' ¿ma'wẽ yũuçxa pçuwa'jmée ĩtxĩ fxi'zewa'ja's ji'phuki'th? jĩte', 18 Jesus pasçxa':

—¿Kĩh yuupa'gaga adxa's ewsa jĩ'? Naa kiwete' teeçx nasaçxáa yuhwa ewsa yu' meeta'. Dxus yuuçxáa ewsa ũsa'. 19 Idxa' jiine'ga Dxus jxkaahni na'wẽsatxi': Ptamsa' vxite yakh pkal yuuwa'jme', nasa ikhwa'jme', pesweewa'jme', vxitetx ĩsxiina nuywe'wewa'jme', vxitee jĩitx kusa'jwa'jme'. Neywe'sxtxi peeygãhna ewçxáa yũuna fxi'zewa'ja' jĩte', 20 txãa piçtakx txã'wẽ wẽsẽ'jçxa' na'wẽk pas:

—Txã'wẽ jxkaahnisatxi' le'çxkuẽjũjx jxuka kxtey yuunath waláa jĩte', 21 Jesusa' txãa piçtakxa's peeygãhna thegçxa' na'jĩk:

—Na'wẽ yũuwa'jçxáa peejxa': Iidx ji'phuni's jxuka txweyçxa, puuple ji'phmeesatx peesya' me'j. Txã'wẽ yũuçxa', cielute ji'phsa yuune'ga. Txã'wẽ yũuçxa adx yakh myuh, makwe seena' nxussa pa'thewa txãatxi' yajkxmée jĩte', 22 txãa piçtakxa' wala ji'phsa yu'k, sa' txã'wẽ wẽsẽ'jçxa', wala nxusna u'kh.

23 Txajũ' Jesusa' nasatx thegçxa' pta'sxku txãa yakh u'jusawe'sxtxi:

—Maawa wala ji'phsa yakha' Dxus jxkaahna ũsnite u'kawa'j wala yuh thẽya' jĩte', 24 txãa yakh u'jusawe'sx wẽsẽ'jçxa', jiyumée kuh jwed yajkxnatx neeyũu. Aça' Jesusa' ãatek pta'sx:

—Naa kiwete ji'phuniçxá's jxthaakwe yaakxsa yakha' wala yuh thẽya' Dxus jxkaahnite u'kawa'ja'. 25 Maawa wala ji'phsa' Dxus jxkaahnite wala thẽy u'katxna. Aça' txã'wẽ thẽysa's yajkxte yu', kamelxo yuhwa thẽymée wáa yũz kafxga u'kaya' ãjãtxna jĩk. 26 Txã'wẽ wẽsẽ'jçxa', wala kuh yajkxna na'wẽtx puutx paapẽyi':

—Txã'wẽte', ji'phsa' ¿kimçxá' cielute u'kaya' ãjama'tx? jĩte', 27 Jesusa' txãawe'sxtxi thegçxa' na'wẽk we'we:

—Naa kiwete nasa' Dxus ũsnite u'ka wẽeçxa txãawe'sx kakwejuçxáa pa'pçxuçxa' ãjãmeetxna. Nawa Dxusna pi'kxçxa yu', thẽymée ãjãtxna. Dxus yakha' kĩh yuhwa thẽysa meea'.

28 Txajũ' Pedro' na'wẽk we'we:

—Kwe'sxa' idx yakh yujxa', kwe'sx ji'phuni's jxuka nvxihttha'w kĩhnawa jĩte', 29 Jesusa' na'wẽk pta'sx:

—Adxa' isath we'we': Dxus yuwe ewsa's jxpa'gaçxa adx yakh fxi'ze wẽeçxa', kĩhnawa jxuka nvxiitutxna yat, kiwe, nyakhwe'sx, npe'sxwe'sx, neywe'sx, nyu, nçxi'kwe'sx, niisawe'sx txã'wẽsatx. 30 Aça' txã'wẽ yũusa' makwe yahçena fxi'zeçxawa txãawe'sx nvxiitniite puutejka jxthaakwe wala uyuutxna naa kiwetey: yat, kiwe, nyakhwe'sx, npe'sxwe'sx, njĩ'jwe'sx, nçxi'kwe'sx, niisawe'sx txã'wẽysatx. Sa' vxite kiwete', pçumée ĩtxĩ fxi'zewa'ja's jxpa'gatxna. 31 Nawa jxpa'yakxmeete', makwe yaçtewe'sxçxawa, nmehtewe'sx yuutxna; naapkaçxha' nmehtewe'sx yu', yaçtewe'sx yuutxna jĩk.

32 Jesusa' Jerusalente pa'jya' u'jweçku yu', aça' txãa yakh u'jusawe'sxa' ũukhçxa e'stetx u'jwe' Jesusa's yaçte akhçxa. Txajũ' Jesusa' docesaçxáatx fxiite pa'yaçxa pta'sxku txã'sa' kĩh yũuya'watewa:

33 —I'kwe'sxa' jii yã'ji'kwe Jerusalente pa'jya' u'jweçtha'w. Aça' kxte' Dxus Nçxi'k Nasa Yuusa's uweçxa dukhni yuuna Dxus leya's kaapiya'jsawe'sx vxite' sacerdote npiiçthẽ'jwe'sx kusete. Aça' txãawe'sxa' ikhwa'j vxitçxa judiu ji'jmée vxite nasatx dukhetxna ikhkahn. 34 Aça' txãa nasa' npeevxysxijkana peçxujkwena fxne'sx avxythethna txã'wẽ yũuçxa ikhetxna. Nawa tekh ente' ki' ĩtxĩ yuuna jĩk.

35 Txajũ' Zebedeo nçxi'kwe'sx Jakobo vxite' Juan txãawe'sxa' Jesus tasxte utxaaçxa na'wẽtx pẽjx:

—Kwe'sxa' idxa'stha'w pẽyi' kwe'sx pẽyni's kxtey yuukahn jĩte', 36 Jesusa' pẽjxku:

—¿Kĩjkwe yũu jxthãasu'? jĩna.

37 Aça' txãawe'sx e'zsa' na'wẽtx pẽjx:

—Idxa' naa kiwete jxkaajxa' kĩhçxa', kwe'sx e'zsatx iidx pukakhẽ pdxi'p kaçxwa'ja's ũsune'ga jĩnatx pẽjx. 38 Aça' Jesus pasçxa':

—I'kwe'sxa' jiimeeçxa i'kwe txã'wẽ pẽyi'. I'kwe'sxa' adx na'wẽy pxthaa yuuçxa uuwa'ja's ũukhmée jxpa'gaya' ¿ãjama'kwe? jĩna pẽjxte', 39 txãawe'sxa':

—Ãja'nja'w jĩnatx pas.

Aça' Jesusa' na'wẽk pta'sx:

—Isa, i'kwe'sxa' adx na'wẽy pxthaa yuuçxa uuwa'ja's ũukhmée ji'phuyujune'kwe. 40 Nawa adx pukakhẽ pdxi'p kaçxwa'ja's adx ũsu'çmeeth pẽysatx. Txã'sa' txãn ente kim jxpa'gawa'jsa yuuna txã'sçxáa ũsni yuuna jĩk.

41 Aça' vxite diezsawe'sx txã'wẽ Jakobowe'sx pẽyni's wẽsẽ'jçxa' ũusaçxatx txãawe'sxtxi'. 42 Txã'wẽ yũute', Jesusa' pa'yaçxa na'wẽk yu'kxpeh:

—I'kwe'sxa' miiyajkxwe: Naa kiwete jxkaahsa walasa' nasatx jxuka jxkaaja'tx juuna'çxáa yuuna khaawãsxi'jna. 43 Nawa i'kwe'sxa' txã'wẽy yuuwa'jsameei'kwe. Makwe jxthaakwesaçxawa, wejxwa vxitetx selpiina mfxi'zewe. 44 I'kwe'sxa' walasa yuu wẽeçxa', vxitee jxkaahni selpisáa myuuwe. 45 Txãa pa'gatey Dxus Nçxi'k Nasa Yuusáa yuhwa txã'sna selpíi jxthãasya' kĩhme', wejxwa maazkuẽe nasatxwa nwe'wena selpiiya' kĩhçxak ya'dukh nxuste uuya'.

46 Txajũ' Jerikote pa'jçxa', Jesusa' txãa yakh u'jusawe'sx vxite' kuhsa yakh çxhabu kasehna u'jweçte', teeçx piçthẽ'j uyya' ãjãsameek dxi'j pukate lmusxnu thãasna u'pu'. Txã' Bartimeok yaase yu', Timeo nçxi'k. 47 Sa' Jesus Nasarethuwe'sx utxaaçte wẽsẽ'jçxa', na'jĩnak sus we'wena u'pu':

—Jesus, Davxid ji'j, adxa's meen peeygãh jĩna.

48 Aça' nasa yu':

—Sxuuna' myuu, kuçxgu susu' jĩtewa, jweeíiçxáak sus we'we:

—Davxid ji'j, adxa's meen peeygãh jĩna.

49 Txajũ' Jesusa' tudte yujuçxa, pa'yakaakh. Aça' pa'yatx na'jĩna:

—Kiiteçxa ũukhmée myuh, Jesusa' idxa's pa'yaça' jĩçpkaçxha', 50 txajx atxha's nvxihtçxa ũphçxak kiiteçxa Jesus tasxte utxáa.

51 Txajũ' Jesusa' ¿kĩhga yũu jxthãasu'? jĩna pẽjxte', txãa uyya' ãjãsamée pasçxa':

—Adxa' uyya' ãjã wẽjẽ'th jĩk.

52 Aça' Jesus we'weçxa':

—Kaauyu'juna sũhçxane'ga adxa's pi'kx txãa pa'ga ãçxha' uyna mneeyũu jĩçpkaçxha' uyya' ãjãk, sa' Jesus e'stey u'kh pi'kxna.