1 Txã'wẽ yũuçxa' Jesusa's Pilato tasxna jxũna u'jtx. 2 Kxtee pa'jçxa' na'jĩnatx pãatxhĩ'kh:

—Naa piçthẽ'ja' nasatx kaypuba'jna ũstetha'w uy, sa' Romate gobierno's dukhwa'jme'. Sa' Dxus txhitxhçxa kaahnisa adxthu jxkaahwa'jsa jĩ'k jĩte', 3 Pilato' pẽjxku:

—Idxa' ¿judiuwe'sxtxi jxkaahsa dxihgá'? jĩte', Jesus pasçxa':

—Txã'wẽ íith, isag we'we' jĩk.

4 Aça' Pilato' sacerdote npiiçthẽ'jwe'sx nasa jxukaysatx na'wẽk we'we:

—Naa piçthẽ'j yuuwe yuuni's uyu'çmeeth jĩtewa, 5 txãawe'sx yu' jweeíiçxáatx sus we'wena na'jĩ':

—Judeate nasa jxukaysatx jxuka kaypuba'jna jxã'jaça' txajx we'weni yakh, Galileaju takhçxa ãçxha' aysuwa jxuka pekũjuça' txã'wẽ yũuna jĩ'tx.

6 Txã'wẽ we'wete Pilato wẽsẽ'jçxa', nasatx pẽjxku:

—Txãa piçthẽ'ja' Galileajũwe'sxwáana jĩna. 7 Aça':

—Txajũwe'sxí'k jĩna pta'sxte', Galileate ne'jwe'sx Herodes tasxnak kaah, txãn ensu' Herodeswa Jerusalenteyku ũsu' naa pa'ga. 8 Aça' Herodesa' Jesusa's uyçxa', wala weçxak, txã'wẽ Jesusa' kĩhwa yu'k jĩni's wẽsẽ'jçxa' nyafxíik Jesus yakh puutx uy wẽena ũsu', cieluju kĩhçxáawa kaavxya'ja'the' txãawa uyu'nja sũhçxa. 9 Txajũ' Jesusa's kĩjkĩhwa wala pẽjxku, nawa pasme'. 10 Kxteewa sacerdote npiiçthẽ'jwe'sx vxite' Dxus leya's kaapiya'jsawe'sx kũhçxa wala juuna' we'wena yuwee ũstxi. 11 Aça' Herodesa' txajx soldauwe'sx yakh Jesusa's weeçx we'wena ahçeçxa jxkaahsa ropa na'wẽ zhiçxkwesa kaathe'jçxatx npeevxysxijkana ũsu'. Txã'wẽ yũuçxak Herodesa' Pilato tasxtey Jesusa's ki' kaah. 12 Pilato yakh Herodes yakha' nyafxíi yu' iipuiisatx yu', nawa txãn ente txã'wẽ yũuçxa' yuwe ewuutx.

13 Txajũ' Pilato' sacerdote npiiçthẽ'jwe'sx vxite' judiu nthẽ'jsawe'sx çxhabte nasa jxukaysatx kaapkhakhe'jçxa, 14 na'jĩnak we'we:

—I'kwe'sxa' naa piçthẽ'ja' nasatx kaypuba'jna ũsa' jĩçxa adx tasxte nuypa'ji'kwe. Aça' adxa' i'kwe'sx wẽsẽ'jna ũstey jxuka paapẽjxthu. Nawa kĩhte yuhwa ewmée yũuni's yu' uymeeth. 15 Aça' Herodeswa ewmée yũuni's uymeeçxa', ki'kin kaasxwedu'kh. I'kwe'sxíiwa jiyui'kwe naa piçthẽ'ja' yuuwesa kasehme'. Aça' ¿ma'wẽ ikhwa'j yuukx? 16 Txãa pa'ga ikhmée kaapeçxukwe'jçxaçxáa kaatxhweete'je'nja jĩte', 17-18 nasa jxukaysa na'jĩnatx sus we'we:

—Naa piçthẽ'ja's ikhçxa Barabasçxá's mitxhwete jĩ'tx. (Pilato' anxu iisak txãa fxiestate teeçx preesu txhweeté' nasa weçxaakahn naa pa'gatx txã'jĩ'.)

19 Txãa Barabas yu' çxhabte gobierno's puíi kiisçxa nasatx wala kiikhe'pha'ga karceltek txaahni ũsu'. 20 Txajũ' Pilato' Jesusa's txhweete wẽeçxa nasatx ki' pẽjxku. 21 Nawa txãawe'sx yu' jweeíiçxáatx sus we'we:

—Kluuste pejka mkaafxuçu'j yuh jĩna.

22 Aça' Pilato' tekh uswa nasatx ki' we'wek na'jĩna:

—Naa piçthẽ'ja' ¿kĩhga ewmée yũu? Adxa' makwe paapẽjxçxawa, ewmée yũuni's yu' uymeeth ikhkahn yuuwa. Txã'wẽ yuuwesa kasejeçme' aça' kaapeçxukwe'jçxaçxáa kaatxhweete'je'nja jĩtewa, 23 txãawe'sx yu' jweeíiçxáatx sus ũusçxa we'wena kluuste fxuçkaah. Sacerdotewe'sx nasa jxukaysa txã'wẽ sus we'weni yakhçxáa pejka knaytxi txãawe'sx pẽyni's. 24 Txajũ' Pilato' txãawe'sx pẽyni's kxtey yuuk, 25 sa' gobierno's puíi kiisçxa nasatx kiikhe'jsa yu'sa' karceluh kaakutxi'jçxa Jesus yu'sa' txãawe'sx kusete nvxihtku, kĩh yũu wẽeçxawa kxtey yuukahn.

26 Jesusa's kluuste fxuçya' jxũna u'jweççxa', teeçx piçthẽ'j Cirenejũwe'sx Simon yaasesa çxhabte pa'jaçte pu'jykhẽwçxa', kluusa's txã'sna kxaakhe'jçxatx Jesus e'stey pe'jna u'j. 27 Txã'wẽ yũuya' u'jweçte, nasa wala kuh u'jweç yu'tx. Txãa ksxavxyte u'ywe'sxwa txã'wẽtx wala kuhsa nxusçxa sus ũ'nena u'jna ũsu'. 28 Aça' Jesusa' txãawe'sxtxi yu'thegçxa':

—Jerusalente u'ywe'sx, adxa's nxusçxa ũ'ne na'wẽ' wejx yuuwa i'kwe'sx fxi'zewa'ja's yajkxçxa mnxuswe, i'kwe'sx luuçx pa'gate. 29 Txã'wẽme' naa kiwete nxusu en yuja'. Txãa en pa'the', txãawe'sx luuçx pxthaa yuuçte uyçxa' na'jĩtxna: Bagaçx yuhwa nasa ji'phuçxa kçxu'çxu'jsamée yakha' txakwe nxus yuhmeena jĩtxna. 30 Txajũ' nasa' nxusna ũukhna vxiç wala upeçxa jxuka ikh jxthãasutxna, sa' thã'j le'çxkwesatxwa txã'wẽy yũu jxthãasutxna. 31 Fxtũu tasx buçxaçteçxáa yuhwa na'wẽtx yũ' na' fxtũu tasx ewsa ukawa'j en ãhte yu' wejx txã'wẽ yũutxna jĩk.

32 Jesus yakh ikhya' e'z piçthẽ'j wala yuuwesatx jxũna u'jtx. 33 Sa' teeçx ahte Uusáa dxikthé dxi'thçxáasa jĩnisate pa'jçxa', Jesusa's kluuskhẽ ki'ptxi, txã'wẽy e'z yuuwesatxwa teeçxsa's paçu, vxite's jebu. 34 Txã'wẽ kluuste fxuçuçte', Jesusa' na'jĩnak we'we:

—Tata, meen peltunaĩ adxa's açesawe'sxtxi. Txãawe'sxa' jiimeeçxatx txã'wẽ yũ' jĩk.

Txajũ' soldauwe'sxa' swerte kaahtx, Jesus athni ropa's maa soldau knaytewa jiyuya'. 35 Naapkaçxha' nasa kuhsa kxtee thegna ũssa vxite' judiu npiiçthẽ'jwe'sxwa Jesusa's weeçx we'wena npeevxysxijkatx na'jĩna:

—Vxitetxwa nwe'weya' ãjã'k na' ãçxha' peekíi kluusuwa iyuna, Dxus txhitxhçxa kaahnisa dxihçxa' jĩ'tx. 36 Aça' soldauwe'sxwa weeçx we'wena utxaaçxa', vxino ewmeesa's yus wẽena 37 na'jĩ'tx:

—Idxa' judiuwe'sxtxi jxkaahsa dxihçxa', peekíi kluusu iyuçxa msa'j jĩ'tx.

38 Kluus vxiçte' griego, latin, hebreo yuweju fxi'jni na'jĩ'k: Naaíi Judiuwe'sxtxi Jxkaahsa' jĩ'k.

39 Txajũ' yuuwesa kluuskhẽ a'kxni u'psa teeçxsa' na'jĩk Jesusa's iiwẽesxuna:

—Idxa' Kristo dxihçxa', peekíi kluusu iyuçxa kwe'sxtxiwa meen nwe'we jĩte', 40 vxite' ka'tu pukakhẽ u'psa yu' na'jĩnak pas:

—Idxa' yuuwesaçxa txã'wẽ seena' kastigãyni u'pçxawa, Dxusa's ũukhu'çmeewá'ga txã'wẽ wẽesxu'. 41 Kwe'sxa' isa yuuwesayuhtha'w, txãa pa'ga kastigãyni u'ptha'w. Nawa naa piçthẽ'ja' kĩhte yuhwa yuuwesa meek yu' jĩçxa', 42 Jesusa's na'wẽk we'we:

—Iidx jxkaahwa'the pa'jçxa', adxa's yaakine'ga jĩte', 43 Jesus pasçxa':

—Isath we'we', Dxus ũsnite ãçxhíi adx yakh ũsune'ga jĩk.

44 Txajũ' ẽepxãh yuuçpkaçxha', naa kiwete jxuka çxhi'dxku kusuçte las trestepkaçx. 45 Seka' kweethme', naapkaçxha' dxuus yatte txudenisa liensu pesath a'kxnisa' puupxãjkhẽk sute. 46 Naapkaçxha' Jesusa' na'jĩnak sus we'we:

—Tata, iidx kusete adx ũusa's nvxiituçthu jĩna'wa uuk.

47 Txã'wẽ yũute', soldau kpiitan uyçxa', na'jĩnak Dxusna weçxa:

—Isa, naa piçthẽ'ja' yuuwemeesa yuh yu'ga jĩk. 48 Aça' nasa jxukay kxtee ũssawa txã'wẽ yũute uyçxa', ¿txã'wẽ yuja' yuumanx? sũhnatx nxusna ũukhna u'j. 49 Aça' Jesusa's jiisawe'sx vxite' Galileajũjx Jesus yakh yuusa u'ywe'sxa' jxu'juçxáatx thegna ũsu' txã'wẽ yũuçte.

50 Kxte' teeçx piçthẽ'j José yaasesa ũsu'k. Txãa yu' Judea kiwete Arimatea çxhabtewe'sx judiu npiiçthẽ'j walasatewe'sxku yu'. 51 Txãa Jose' isa bagaçx Dxus jxkaajxa' takhekx sũhna ũythassak yu'. Txã'wẽçxaíik vxite judiu npiiçthẽ'jwe'sx Jesusa's ikhya' puutx we'weçte', txãa yu' wa'l. 52 Txajũ' txãa Jose' Pilato tasxte u'jçxa Jesus kakwe's pẽjxku. 53 Sa' kluusuh spajkxçxa liensute yapçxa kwet penxa u'se phaadeni kim yuhwa pedanimeegak khikh. 54 Txã'wẽ sapatu jxkaasewa'j en jxuka ãjãçku yu'. 55 Aça' u'ywe'sx Galileajũjx Jesus yakh pi'kxna yuusa' txãawe'sxwa u'jçxa kwet kafx pedani's uytxi Jesus kakwe's mkaa khikheçtewa. 56 Sa' yatna sxawedna u'jçxa, Jesus kakwete sxũsxwa'j jxuka pheu'jçxatx sapatu jxkaase ente ki'sna fxi'ze, Dxus jxkaahni's kxtey nwẽesẽ'j na.