1 Txajũ' Jesusa' Jeriko çxhabte pa'jçxa', txãa çxhabsu skhẽuuçku yu'. 2 Aça' kxte' teeçx piçthẽ'j wala ji'phsa Zakeo yaasesak ũsu'. Txãa yu' gobierno jĩi vxyu pkhakhsa npiiçthẽ'jsak yu'. 3 Txãa Zakeo' Jesus kimtewa jiyuya' puutx uy wẽeçxawa, nasaa wala ksxavxyte' ãjãme', txãa yu' le'çxkuẽek yu' naa pa'ga. 4 Sa' yaçte wuwuuçxa, sikómoro fxtũu tasxtek tejka Jesusa's uyya'. 5 Aça' Jesusa' kxuy uykhẽuuççxa', fxtũu tasxte pagayçxa Zakeo's we'wek:

—Dudçxáa txajũ miisa'j, adxa' iidx yatte ãçxhíi pa'jwa'j ji'pthu jĩte', 6 Zakeo' dudçxáa sa'jçxa, Jesusa's weçxanak txajx yatte jxpa'ga. 7 Txã'wẽ yũute' nasa jxukaysa açewe'wetx: Jesusa' txãa piçthẽ'j pkalsa yattek pa'jya' u'j jĩna. 8 Txajũ' Zakeo' yujuçxa na'jĩnak we'we:

—Adx ji'phuni's puupxãhn txuhdeçxa puupletx peesu'nja, sa' maaíitxi's ĩsxĩiçxa jxthaakwe wá'ntka vxyu kusa'j nawa kusa'jnite pahz us jxthaakwe kaasxwedu'ju'nja jĩte', 9 Jesusa' na'jĩk:

—Naa piçthẽ'ja' Abrahan ji'kh yuu naa pa'ga naa yattewe'sx ewte neeyũuwa'j en pa'kh ãçxha'. 10 Dxus Nçxi'k Nasa Yuusa' txã'wẽ vxituna ũssatx pakweçxa ewte nvxiht-ya' íiçxáath kĩh jĩk.

11 Jesus we'weni's wẽsẽ'jsa yu', naa sũhnatx ũsu': Jesusa' Jerusalente pa'jaça' na' ãçxha' txãa jxkaahsa yuuna sũhnatx ũsu'. 12 Naa pa'ga na'wẽk kwentu'jna pta'sx:

—Teeçx piçthẽ'j jxtuhthesa jxu'j kiwen u'kh, kxtee pa'jçxa jxkaahsa yuuçxa ki' sxawedxa'. 13 Nawa u'jmey, diez selpisaatx pa'yaçxa, kxazíitx txakweçxaçxáak vxyu ũsçxa na'jĩna neewe'we: Adx sxawedna pa'phkaçx naa vxyu yakh mjĩine'kwe nuypehnaya'. Txã'jĩçxak jxkaahsa yuuya' jxu'j kiwen u'j. 14 Nawa txajx kiwete nasa' jxkaahsa ki'pni's wa'lçxa, na'jĩnatx pãatxhĩ'khya' kaah txajx e'stey: Naa piçthẽ'j kwe'sxtxi jxkaahni's peejxmeetha'w jĩtewa, 15 pejka jxkaahsa yuuçxa ki' sxawedku txajx kiweníi. Sa' pa'jçxa' selpisaatx vxyu ũsne' txãatx pa'yak, nasa iisa maz nuypehnatewa jiyuya'. 16 Aça' nyafxtewe'sx kũhçxa' na'jĩk: Iidx vxyu ũsgu txãate diezthu jxthaakwe nuypehna jĩte', 17 jxkaahsa pasçxa': Wala ew selpiig. Txã'wẽ walameekuẽsa'swa ew jxpe'pha'ga, diez çxhabte jxkaahwa'jsa ne'jwe'sx ki'pu'nja jĩk. 18 Txajũ' vxitewa utxaaçxa na'jĩk: Iidx vxyu ũsgu txãate tahçthu jxthaakwe nuypehna jĩte', 19 jxkaahsa pasçxa': Idxa' tahç çxhabte jxkaahwa'jsa ne'jwe'sx yuune'ga jĩk. 20 Txajũ' tekhtewe'sxwa utxaaçxa na'jĩk: Iidx vxyu ũsgu txã'sa' panxwelote yapçxa jxaawthu. Txã' ayga ũsa'. 21 Idxa' wala juuna' yu'g, txã'wẽ mjĩimeeçxawa vxyu pẽyi'g sa' iidx uuthasxmeetewa kxtee u'kaçxa jxuka pkhakhe'g. Aça' ũukhçxa iidx vxyu'sa' kmãaji'jmeeth jĩte', 22 jxkaahsa pasçxa': Idxa' seelpimeeg. Iidx yuweteyçxáa ewmeete neeyũuçgu. Adxa' juuna'saçxa' mjĩimeeçxawa vxyu pẽjxna adx uuthasxmeetewa pkhakhsatewa jiiçxa', 23 ¿kĩh yũutega adx vxyu'sa' bankoga jxaawmée? pehnate adx sxawedna pa'jçxa' jxthaakwe kutxi'khan jĩk. 24 Sa' txãa jxkaahsa' na'jĩnak we'we kxtee ũssatx: Txãa vxyu's kusa'jçxa diez vxyu ji'phsa's meswe jĩte', 25 txãawe'sx pasçxa': Txã' vxyu walayã'j ji'pha', aça' ¿ma'wẽ txã'síiçxáa ũsukxtha'w? jĩtewa, 26 jxkaahsa pasçxa na'jĩk: Maawa jxpa'yakx jxpe'jçxa nuypenasa's jxthaakwe ũswa'j yuuna. Nawa jxpe'jya' ãjãmeeçxa nuypenasame's jxuka kusa'jwa'j yuuna, le'çxkuẽçxáa ji'phtewa. 27 Sa' adxa's ahçeçxa jxkaahsa yuukahmén pãatxhĩ'khsawe'sxtxi' ayte pe'jna kũhçxa adx uyna ũste miikhwe jĩk.

28 Txãa ejemplo's pta'sxna jxã'jçxa', Jerusalente pa'jya' u'kh. 29 Sa' Betfxagé vxite' Betania çxhab ũsu'tx Oliwos vxiç utxaga kxtee pa'jya'çxáa txãa yakh u'jusa e'zsatx kaakh 30 na'jĩna:

—Naaga çxhab ũsa' kxtee me'jwe. Sa' kxtee pa'jaççxa', teeçx buçxukuẽ uyuune'kwe kim yuhwa a'jnimeesa tudni ũsna. Txã'sa' jxũkhwedeçxa jxũna yuweene'kwe. 31 Jxũna yuhte', maaíi yu' pẽyiwáatxna aça': Kwe'sxtxi jxpe'jsak nikxya' kaah jĩne'kwe. 32 Aça' txã'jĩte' u'jçxa', Jesus ma'wẽne' we'we txã'wẽy uytxi. 33 Txajũ' buçxu's jxũkhwedeçte', namuwe'sxa' pẽjxtxi:

—¿Kĩjxa' buçxu's jxũkhwedeçkwe? jĩte', 34 txãawe'sx pasçxa':

—Kwe'sxtxi jxpe'jsak nikxya' kaah jĩtx. 35 Sa' Jesus tasxte jxũna kũhçxa', txãawe'sx atxhtxi pusçxa Jesusa's ka'ja'jtx.

36 Txajũ' Jesus u'jwa'j dxi'jsu yaçtetx txãawe'sx atxhtxi pusna u'jwe'. 37 Sa' Oliwos vxiç e'skhẽ u'jweçpkaçxha', Jesus yakh yuusa nasa' Dxusa's wala weçxana weyya' takhtxi txã'wẽ Jesusa' kĩjkĩhwa ew yũuna u'juni's uyçxa. 38 Sa' na'jĩnatx weyi':

—¡Dxus kaahni wala yuh ew jxkaahwa'jsa yuja'! ¡Dxus cielutewe'sxa's weçxaaga wala ew yũupa'ga! jĩ'tx.

39 Txajũ' nasaa ksxavxyte yuusa fxariseowe'sxa' na'jĩtx:

—Iidx e'ste kuçx susna yuusatx mwe'we, sxuuna' yuukahn jĩte', 40 Jesus pasçxa':

—Makwe txãawe'sx yu' sxuuna' yuutewa, kweta' Dxusa's tuuthe'jetxna jĩk.

41 Txajũ' Jerusalente utxa pa'jçxa', çxhaba's thegçxa ũ'nek 42 na'jĩna:

—I'kwe'sxa' wẽt kfxi'ze'jwa'jsa's jiyuçxa naa ente jxpa'gawaça', wala yuh ewna. Nawa i'kwe'sxa' jiimée ũsi'kwe na' jxpa'gameene'kwe. 43 Naa pa'ga i'kwe'sxtxi' nxuswa'j en pa'jana, aça' txãa ente' çxhaba's jxuka yupna ktadxiiçxa 44 çxhaba's kĩh yuhwa nvxihtmée jxuka suwuutxna kxtee ũssatx ikhna. Sa' teeçx kwetçxáa yuhwa kẽese'jnimée yu' neeyũumeena, i'kwe'sx ksxavxyte Dxus kĩhtewa, jxpa'gameei'kwe naa pa'ga jĩk.

45 Txajũ' Jesusa' dxuus yatte u'kaçxa kxtee txweyna ũssatx jxuka eka kasxisxku 46 na'jĩna:

—Dxus librute na'wẽ fxi'jni': Adx yata' Dxus yakh puutx we'wena ũswa'j yatçxá' jĩna fxi'jni'. Nawa i'kwe'sx yu' peswée pkhaakhena ũsni kafx na'wẽçxáa vxitçxa ji'phi'kwe jĩk.

47 Jesusa' een isak dxuus yatte u'kaçxa kaapiya'ja'. Naapkaçxha' sacerdote npiiçthẽ'jwe'sx vxite' Dxus leya's kaapiya'jsawe'sx vxite' çxhabte ne'jwe'sx txãawe'sx yu': ¿Ma'wẽ yũuçxa ikhekxtha'w? jĩnatx puutx we'wena ũsu'. 48 Nawa ikhya' yu' ãjã'çmeeta', nasa jxukaysa Jesus ju'guçxaçxáatx ũsu' naa pa'ga.