1 Txajũ' Jesusa' nasatx Dxus yuwe's pta'sxna jxã'jçxa', Kapernaum çxhabna u'kh. 2 Txãa çxhabte' teeçx kpiitan ũsu'k romanowe'sx. Sa' txãa kpiitana' teeçx selpisáa ji'phu'k wala peeygãanisa. Nawa wala ãçã'çxa uuya'wayã'kh yu'. 3 Txajũ' kpiitana' Jesusa' ma'wẽsatxwa nuykatxhi'k jĩni's wẽsẽ'jçxa', judiuwe'sx pkhaakhenite npiiçthẽ'jsatx jxkaakh Jesusa's pxthaa we'weya', txã'sna selpisa's nuykatxhiya' yuukahn. 4 Aça' txãawe'sxa' Jesusa's utxaaçxa', na'jĩnatx pxthaa pi'kxna we'we:

—Txãa kpiitana'sa' idx pu'çxwaça' ewna sũjũ'tha'w. 5 Txã' kwe'sxtxi peeygãhçxa pkhaakhewa'j yat yuhwa ktxaaja'kh naa pa'ga jĩte', 6 Jesusa' txãawe'sx pe'jni u'kh. Nawa yat utxa pa'jaçteçxáa, kpiitana' txajx namikutx kaakha Jesusa's na'jĩkahn:

—Adxa' wala ãhmeekwesath aça' wejx yuuwa adx yatte u'kaya' yuhmée tee yuu. 7 Adxa' txã'wẽ ãhmeekwesaçxa íiçxáath idxa's adx yuu pakweya' yujxa' thaame. Aça' wejx yuuwa txãjũçxáa yuwejuçxáa mwe'we aççxáa adxa's selpisa' katxhina. 8 Adxwa jwee npiiçthẽ'jsa jxkaahni's nwẽesẽ'jna ũsthu, nawa jweeju adx jxkaahnisa soldau ji'pthu. Sa' txãawe'sxtxi' teeçxsa's me'j jĩte', adx jxkaahni's kxtey yu'k. Sa' vxite's pa'yate', txãawa kxtey nwẽesẽ'je'k. Sa' adxa's selpisa's kĩh jxkaathewa, kxtey yu'k jĩnak yuwekaah.

9 Txajũ' na'wẽ kpiitan yuwe kaahni's Jesus wẽsẽ'jçxa', kuh yajkxnak neeyũu. Sa' e'ste yuusatx thegçxa' na'jĩk:

—Isath we'we', Israelwe'sx mteewe'sx yuhwa txã'wẽ adx we'weteçxáa katxhina sũhsa yu' iiuymeeth naa kpiitan na'wẽsa yu' jĩk. 10 Txajũ' jxkaahnisawe'sxa' yatnay sxawedçxa', kpiitan jxpe'jnisa' katxhyã'j u'ptetx uy.

11 Txãa e'su', Jesusa' teeçx çxhab Nain yaasesatek pa'jya' u'j, txãa yakh u'jusawe'sx vxite nasa kuhsa yakh. 12 Sa' çxhabte u'kaçte', teeçx uusá's pedaaya' nasa wala kuh u'jweçtek uy. Txãa uusá' vxiuda nçxi'k txãaçxáasak yu'. 13 Aça' Jesus uyçxa', txãa vxiuda's peeygãhçxa kvxiisxa'jna:

—Ũ'nenuçx jĩnak we'we.

14 Sa' Jesusa' utxaaçxa, taula's jxa'dxku. Aça' yakhçxa u'jsa', nee yujutx. Naapkaçxha' Jesusa' uusá's na'jĩk:

—Piçtakx, mkiite jĩ'th idxa's jĩte', 15 uusá' kaçxçxa we'wek. Aça' Jesusa' njĩ'ja's dukhku. 16 Na'wẽ yũuni's nasa uyçxa', jxukaysa wala ũukhçxawa, txã'wẽytxi Dxusa's wala weçxana na'jĩ':

—Dxus jxkaahni wala yuhsa kwe'sx ksxavxyte vxyaak jĩ'tx. Sa' ki' we'weçxa':

—Dxusa' txajx nasatx pu'çxya' kĩjk jĩ'tx.

17 Txajũ' Jesus txã'wẽ yũuni's nasa jxuka jiyutx Nain çxhab peeku'jsuwe'sx vxite' Judea kiwesuwe'sxwa jxuka.

18 Jesus txã'wẽ yũuni's Juan Bautista' jxuka jiyuk Juan yakh u'jusawe'sx pta'sxte'. Sa' txãa yakh u'jusa e'zsatx pa'yaçxa', 19 Jesus tasxna kaakh paapẽjxya':

—Idxa' ¿isa Kristo naa kiwete kĩiwa'jsa ũsu'k txãa dxihgá', meeçxa' vxite ũythasuwá'nja'w? jĩnak pẽykaah. 20 Aça' e'z jxkaahnisa' Jesus tasxte pa'jçxa' txã'wẽy pẽjxtxi:

—Juan Bautista' kwe'sxtxi' kaakh idxa's paapẽjxya': ¿Kristo naa kiwete kĩiwa'jsa ũsu'k txãa dxihgá', meeçxa' vxite ũythasuwá'nja'w? jĩnatx pẽjx.

21 Sa' txã'wẽ paapẽysawe'sx pa'jaçte', Jesusa' nasa wala kĩjkĩh wee kazxsate ãçã'satxwa nuykatxhik, eçx luuku vxit-satx ũuste ji'phsa vxite' uyya' ãjãsamée maazkuẽesatxwa jxuka nuykatxhik. 22 Sa' Jesusa' paapẽysawe'sxtxi' na'wẽk pas:

—I'kwe'sx ma'wẽne'kwe wẽsẽ'jna uy txã'wẽy pta'sxine'kwe Juana's na'jĩna: Uyya' ãjãsameewa uyu'tx. Aça' legsawa katxhiçxa legmeetx neeyũ'. Wã'jy wee kazx ji'phsawa katxhinitx neeyũ'. Aça' wẽsẽ'jya' ãjãsameewa wẽsẽ'jya' ãjã'tx. Uuniisawa ki' ĩtxĩ yu'tx. Sa' naa kiwete pxthaakuẽsa yuutxi' Dxus tasxte pa'jwa'ja's pta'sxnik yuu. 23 Aça' adxa's kuh yajkxna jxpubasame', weçxana fxi'zesa yuuna jĩnak pta'sxkaah.

24 Juan yuwe kaahnisawe'sx u'the', Jesusa' Juan ma'wẽsatewa pta'sxku na'jĩna:

—Nasa u'pnimée kiwesu' i'kwe'sxa' ¿kĩja'skwe thegya' u'j? ¿Khĩih tasx wejxate ẽsẽ'sesa's wá'kwe thegya' u'j? 25 ¿Khĩmeeçxa' teeçx piçthẽ'j ropa zhiçxkwesa athçxa u'pna sũhçxa wá'kwe thegya' u'j? I'kwe'sxa' jii i'kwe txã'wẽ ropa zhiçxkwesa athçxa wẽt weçxana fxi'zesa' jxkaahni yat-suçxáatx u'pu'. 26 ¿Kim yuunakwe thegya' u'j? ¿Dxus yuwe pta'sxsa's wá'kwe thegya' u'j? Isa txã'wẽ dxih yuuçxa' Dxus yuwe pta'sxsate teeçx jxthaakwe walasa's ne'kwe uy. 27 Juana's we'weçxak Dxus librute na'wẽ pta'sxi':

28 Na'jĩ'th na': naa kiwete Dxus yuwe pta'sxsate maa maatewa jxthaakwesa' Juan Bautistak yu'. Txã'wẽtewa, maawa makwe ãhmeekwesaçxawa Dxus jxkaahnite u'kasa yu', Juante jxthaakwesa yuutxna jĩte', 29 Juan bautisãynisa nasa jxukaysa vxite' gobierno jĩi vxyu pkhakhsa txãawe'sx wẽsẽ'jçxa', Dxusa' maa yakhwa jxuka ewsana sũhnatx neeyũu. 30 Nawa fxariseowe'sx vxite' ley kaapiya'jsawe'sx Juan bautisãynimeesa yu', txãawe'sxtxi Dxus ew yũu wẽeni yu'sa' jxpa'gamée ahçetx. 31 Aça' Jesusa' na'jĩk:

—Naa ensu nasatxi' ¿kiim yakh kaaja'da'jaki'th? ¿Kiim na'wẽta yu'? 32 Luuçx le'çxkuẽ na'wẽtx yu'. Txãawe'sxçxáatx plaasasu pweesa'jya' kaçxçxa, vxite luuçxtxi sus pa'yana na'jĩ': Zhiçxkwetha'w tujkana kuvxí' nawa ku'ju'çmeei'kwe. Sa' nxus nxustha'w memu', nawa ũ'ne'çmeei'kwe jĩ'tx. Txã'wẽsata' naa entewe'sxa'. 33 I'kwe'sxa' Juan Bautista's eçx luuku vxit-sa's ji'phna txãasak pan ũ'mée vxinowa tudxi'çmée jĩ'i'kwe, txã'wẽ kĩhwa ũ'mée tudxpa'gameeçxáa. 34 Nawa Dxus Nçxi'k Nasa Yuusáa kĩhçxa', ũ'we'th, tudxi'th, aç yu': Naa thẽ'ja' wala pũ'we', wala tudxsa'. Gobierno jĩi vxyu pkhakhsawe'sx vxite' pkalsawe'sx yakh namiku' jĩ'i'kwe. 35 I'kwe'sxa' jiimeeçxai'kwe txã'jĩ'. Nawa maawa jiyuwa'jsa yuutxi' Dxusa' kaajiyu'juna adx ma'wẽsatewa jĩk.

36 Teeçx fxariseo' Jesusa's pi'kxku sã'jĩya', aça' Jesusa' txãa fxariseo yatna u'jçxa', mesate kaçxku ũ'ya'. 37 Naapkaçxha' teeçx u'y iiméh kazx ewmée yũuna u'jusa txãa çxhabtey u'psa jiyuk Jesusa' fxariseo yatte ũ'ya' u'jni's. Sa' teeçx fxrasko aceite wẽt putasana atçxa fxariseo yatte pa'kh. 38 Sa' ũ'nena utxaana kũhçxa', yafx yu'ju Jesus çxidatx pkhi'kxku. Khĩçxak txajx dxkhasju adxi'jçxa weçxá'. Sa' aceite wẽt putasa's Jesus çxidakhẽ awku. 39 Txã'wẽ yũuni's fxariseo Jesusa's pi'kxsathẽ'j uyçxa', na'wẽk yajkx: Naa piçthẽ'j isa Dxus yuwe's pta'sxsa dxihwaça', jiyuna naa u'ya' pkalsa ewmeesaçxa txã'wẽ çxidatx pkhi'kxna aceite awna u'ptewa sũjũ'k. 40 Aça' Jesusa' na'jĩk:

—Simon, idxa's na'wẽ we'wewa'j ji'pthu jĩte', fxariseo pasçxa':

—Mwe'we jĩte', 41 Jesusa' na'jĩk:

—Teeçx piçthẽ'ja's e'z nasatx yuul yu' vxyu pki'jçxa. Teeçxsa' kinientos pesok yuul yu'. Aça' vxite' cinkwenta pesok yuul yu'. 42 Aça' e'zíi txãawe'sx yuultxi dukhya' ãjãmeete', vxyuu pki'jsa' txãawe'sxtxi' peltunãyku. Aça' ¿maa sũjũki'g txãa yuulusa e'zsatx maaki'k wejx thaakwe weçxa pki'jsa's? jĩte', 43 Simon pasçxa':

—Wala yuulusane' wejx thaakwe weçxa jĩte', Jesusa':

—Isa yuh we'we'g, jĩk.

44 Txajũ' Jesusa' txãa u'ya's thegçxa' Simona's na'jĩk:

—Adxa' iidx yatte pa'thewa, yu' ũsmeeg adx çxidatx pkhi'kwa'j. Nawa naa u'ya's mtheg, txajx yafx yu'juk pkhi'khi' sa' txajx dxkhasjuk adxi'j. 45 Adxa's weçxameeg. Nawa naa u'ya' ayte u'kaíin nvxiitnime' adx çxidatx weçxana. 46 Adx jxkwetkhẽ aceite awmeeg. Nawa naa u'ya' aceite wẽt putasaak aw adx çxidakhẽ. 47 Na'jĩ'th na', pkal iiméh wala kazxsatewa peltunãyni neeyũusa' txã'wẽyku wala wedxna utxá' peltunãysa's. Nawa walamée peltunãynisa' jwee yu' weçxana utxa'çme'.

48 Txajũ' txãa u'ya's we'weçxa':

—I'kwe' peltunãyni yã'ji'kwe jĩk.

49 Aça' pi'kxnasa Jesus yakh ũ'na u'psa' txãawe'sx pwe'sx na'wẽtx puutx we'we':

—Naa piçthẽ'ja' ¿kiimki saki'k pkalsa yuhtxwa peltunaĩ'? jĩ'tx.

50 Aça' Jesusa' na'wẽk we'we txãa u'ya's:

—Adx peltunaĩna sũhçxane'kwe adx tasxte utxáa naa pa'ga ewte yã'ji'kwe neeyũu na' ãçxha' wẽt weçx weçxa me'jwe jĩk.