1 Jesusa' txã'wẽ neewe'wena jxã'jçxa', Cedron yu'kuten ktejkana u'kh, txãa yakh u'jusawe'sx yã'jçxa teeçx walta ũsa' kxtee u'kaya'. 2 Txãa waltate' Jesus yakh u'jusawe'sxa' maz uswa txãa yakh pkhaakheya' u'kasatx yu', naa pa'gak Jesusa's ikhkahn dukhwa'jsa Judasa' jii yu'. 3 Txãasak Judasa' jiiyã'jçxa', soldauwe'sxtxi pe'jçxa kxtee pa'j u'j dxuus yat thegsawe'sx yã'jçxa. Txãa dxuus yat thegsawe'sx yu', sacerdote npiiçthẽ'j vxite' fxariseowe'sx jxkaahnitx yu'. Vxite' fxtũ, vxite' kçxilx, vxite' lampara atçxatx pa'j. 4 Nawa Jesusa' txã'sna ma'wẽwa pkxuuçxa ikhwa'j ãhte jiiyã'jçxa', puutx uyya' kasejk. Sa' na'jĩk:

—¿Kimnakwe pakwé'? jĩte', 5 txãawe'sxa' na'wẽtx pas:

—Jesus Nasarethuwe'sxa'stha'w pakwé' jĩte', Jesusa' na'jĩk:

—Adxíi txãath.

Aça' Judaswa kxtee txãawe'sx yakh ũsu'k, Jesusna kuuwe'jna. 6 Txajũ' adxíith jĩna Jesus we'weniteçxáa, Jesusa's tudwa'jsa' e'su ya'skaçxa kiwegatx wete. 7 Aça' Jesusa' ki' pẽjxku:

—¿Kimnakwe pakwé'? jĩte', txãawe'sxa':

—Jesus Nasarethuwe'sxa'stha'w pakwé' jĩnatx pas.

8 Aça' Jesus pasçxa':

—Adxíith jĩna pta'sxyã'th. Aça' adxa's pakweeççxa', adx yakh u'jusawe'sx ayte ũsta' txãawe'sxtxi' kuçx yuunuwe u'khan jĩk.

9 Jesusa' nyafxíi we'weçxa': Tata adxna jxpe'khan ũsku txã' jxukaysa yu' vxitumeeta' txã'jĩni' kxtey yuukahnku txã'jĩ.

10 Naapkaçxha' Simon Pedro' kçxilx ya'kxnisa's jxkuutxi'jçxa teeçx piçthẽ'j thũ'wẽ paçuwe'sxa'sku spẽ'th. (Txãa piçthẽ'ja' sacerdote npiiçthẽ'ja's selpisáa Malko yaasek yu'.) 11 Aça' Jesusa' Pedro's na'jĩnak jxkaah:

—Kçxilxa's wainutey myu'akh. Adx nxuste pxthaa yuuwa'ja'sku Tata' jxthãasu' aça' txã'sa' jxpa'gawa'jsameena sũju'wá'ga jĩk.

12 Txajũ' soldau npiiçthẽ'j txajx nasa yakh vxite' dxuus yat thegsawe'sx yã'jçxa Jesusa's tudçxa', 13 Anas tasxna khuẽ'y jxũna u'jtx. Txãa Anas duh Kaifxasa' sacerdote npiiçthẽ'kh yu' txãa anxute. 14 Txãa Kaifxasíik judiuwe'sxtxi na'jĩna we'wesa yu': Nasa jxukaysa pa'gate teeçx piçthẽ'jçxáa uuwaç wejx ewna jĩsak yu'.

15 Jesusa's tudçxa jxũna u'the', Simon Pedro' vxite piçthẽ'jyã'jçxa Jesus e'stey u'kh. Txãa vxite piçthẽ'j yu' sacerdote npiiçthẽ'j yakh jiisak yu', txãa pa'ga txãa npiiçthẽ'jsa yat patxute u'kak Jesus u'kanitey. 16 Nawa Pedro' u'kamée vxitx pukate neeyũuk. Txãasak sacerdote npiiçthẽ'j yakh jiisa' kxtee vxitxte thegsa yakh puutx we'weçxa Pedro's dxiite ka'ga'j. 17 Aça' vxitxte thegsa' pẽjxku Pedro's:

—Idxa' ¿naa piçthẽ'j yakh u'jusameegá'? jĩte', Pedro pasçxa':

—Txãa yakh u'jusameeth jĩk.

18 Txajũ' kxtee selpisaawe'sx vxite' dxuus yat thegsawe'sx yã'jçxa kumaçxa ipx yuthçxatx bajçxna ũsu' patxute. Aça' Pedrowa kxtee txãawe'sx yakh ipx pukate bajçxna ũsu'k.

19 Txajũ' Anasa' paapẽjxya' takhku Jesusa's:

—Idx yakh u'jusawe'sxa' ¿kimtxna? aça' idxa' ¿kĩhga kaapiya'ja'? jĩte', 20 Jesusa' na'jĩnak pas:

—Adxa' ãateçxaçxáa iiwe'weth nasa jxukaysa dxi'pte, judiuwe'sx pkhaakhenisu vxite' dxuus yatte judiuwe'sx jxukaysa ksxavxyte Dxus yuwe's kaapiya'jna. Adxa' paaçte yu' kĩhwa iipta'sxmeeth. 21 Aça' adxa's ¿kĩjxa'ga paapẽyi'? Adx pta'sxni's wẽse'jsatx mpaapẽjx, aça' txãawe'sxa' pta'sxitxna adx kĩh we'weni'swa. Txãawe'sxa' adx pta'sxni's jiita' na'.

22 Txã'wẽ we'wete', dxuus yat thegsawe'sx teeçx kxtee ũssa' kuseju Jesus dxi'pga pehtxaçxa', na'wẽk juuna' we'we:

—Anasa' sacerdote npiiçthẽ'ja' aç yuja' ¿txã'wẽ pasu'gá'? jĩte', 23 Jesus pasçxa':

—Adx ewmée we'wete', mpeeta'sx kĩhsu ewmée we'weçtewa. Nawa ewsaçxá's we'weçte', ¿ma'wẽtega adxa's txã'wẽ pkxú'? jĩnak pas.

24 Txã'wẽ yũunijũ' Anasa' Jesusa's tudni ũsíin, jxũna u'khaakh sacerdote npiiçthẽ'j Kaifxas tasxna.

25 Naapkaçxha' Pedro' ipx pukate bajçxna ũsíiçxáak yu'. Aça' kxtee ũssawe'sxa' na'wẽtx pẽjx:

—Idxa' ¿naa piçthẽ'j yakh u'jusa yuh meega wakx? jĩte', Pedro':

—Adxa' txãameeth jĩnak pas.

26 Aça' sacerdote npiiçthẽ'ja's selpisáa teeçxsa' na'jĩnak pẽjx:

—Idxa's ¿uymeewá'ntka waltate txãa yakh ũste? (Txã'jĩna pẽysa' Pedro teeçx piçthẽ'j thũ'wẽ's spẽ'thku txãa piçthẽ'j nwe'sxku yu'.)

27 Txã'jĩna ki' pẽjxte', Pedro' ki'kin ĩsxiijaçpkaçxha', atalxa' we'wek.

28 Txajũ' Kaifxas yatu Jesusa's jxũna u'jtx ne'jwe'sx Pilato tasxte nuypa'jya'. Naapkaçxha' khikhiiçku yu'. Txajũ' judiuwe'sxa' ne'jwe'sx u'pnite u'kameeta', pkal pẽetheejena sũhçxa. Txã'wẽ pkal pẽetheethe', Paskuatewe'sxa's ũ'ya' ãjame'nja'w sũhçxatx u'kamée. 29 Txãa pa'gak Pilato' eka kasehçxa' na'jĩna paapẽjx:

—Naa piçthẽ'ja' ¿kĩhga yuu aç txã'wẽ pãatxhĩ'khna yujkwe? jĩte', 30 txãawe'sxa' na'wẽtx pas:

—Kĩhwa yuuwemeewaça', iidx tasxte nuypa'jwa'jmeene'tka'w yu' jĩte', 31 Pilato' na'jĩnak jxkaah:

—Jxũna me'jwe, sa' i'kwe'sx ley ma'wẽ jxkaathe', kxtey yuune'kwe jĩte', judiuwe'sxa' na'jĩnatx we'we:

—Kwe'sxa' judiuwe'sxtha'w na' ¿ma'wẽ ikh kaajxa' ãjakxtha'w?

32 Jesusa' ma'wẽ uuwa'jsaçxawa pta'sxku txãa pta'sxni' kxtey yuukahntxi txã'jĩna we'we.

33 Txajũ' Pilato' txajx u'pnite ki' kũhçxa', Jesusa's pa'yaçxa na'wẽk paapẽjx:

—¿Idxa' judiuwe'sxtxi jxkaahsawá'ga? jĩte', 34 Jesusa' na'jĩk:

—¿Iidx ũusuh yajkxçxaga txã'jĩ'á'? meeçxa' ¿vxitesa txã'jĩna adxa's kxsuusni's wẽse'jçxawá'ga txã'jĩ'? jĩte', 35 Pilato' na'wẽk pas:

—Adxa' judiumeeth. Iidx nwe'sx vxite' sacerdote npiiçthẽ'jwe'sxtxi adx tasxte idxa's nuykũh, aça' idxa' ¿kĩhga ewmée yũu? jĩte', 36 Jesusa' pta'sxku:

—Adx jxkaahwa'ja' naa kiweteme'. Txã'wẽ naa kiwete jxkaahwa'jsawaça', adx ju'gusawe'sxa' puiiwa'jne'ta yu', judiuwe'sx kusete adxa's dukhkahmen. Aça' naa kiwete jxkaahsameeth.

37 Txã'jĩte', Pilato' ki' pẽjxku:

—Txã'wẽçxa' ¿idxa' jxkaahsa dxihgá'? jĩte', Jesusa' na'jĩk:

—Idx kxsusu'g txã'wẽíith. Naa kiwete upxçxa isasaçxáana pta'sxya'th yuwé'. Maawa isasa's nwẽese'jwa'jsa' adx we'weni's jxpa'yakxtxi wẽse'je' jĩte', 38 Pilato' na'wẽk paapẽjx:

—Na'wẽ isasa' jĩna we'we'g txã' ¿kĩhna?

Txã'wẽ Jesusa's paapẽjxçxa', Pilato' ki' eka kasejk judiuwe'sxtxi na'jĩna pta'sxya':

—Naa piçthẽ'j ewmée yũuni's kĩhte yuhwa uyu'çmeeth. 39 Nawa Paskua fxiesta iisa teeçx preesu kaatxhweete'je'i'kwe na' ¿ãçxwa txã'wẽy txhweete jxthãasu'kwe' naa judiuwe'sxtxi jxkaahsa's? jĩte', 40 jxukaysa na'jĩtx:

—Txã'sa' kaatxhweete'jnu. Barabasçxá's mkaatxhweete'j jĩnatx weyi'.

Txãa Barabasa' iiméh jxthaakwe pesweesak yu'.