1 Txãa ensu' Jesusa' Galilea ĩkh kuten u'kh, txãa ĩkha's Tiberias jĩ'tx. 2 Txã'wẽ naa kiwete kim yuhwa vxit-ya' ãjanimeesa's kaavxya'ja'jna ãça'satxwa nuyçxhãçxhapa'ga, nasa wala kuh pkhaakhena Jesus e'stey u'jtx. 3 Aça' Jesusa' thã'j vxiçna u'jçxa kxtee kaçxku txãa yakh u'jusawe'sx yã'jçxa. 4 Txajũ' Judiuwe'sx fxiesta Paskua en ãjaçku yu' txãa ensu'. 5 Aça' nasa wala pkhaakhena yuhte uyçxa', Jesusa' Fxelipe's na'jĩnak pẽjx:

—¿Mtee ũ' weyuukxtha'w nasa jxukaysatx puuçwa'j?

6 Nawa Jesusa' Fxelipe ma'jĩtewa jiyuya'çxáak txã'wẽ pẽjx, ma'wẽ yũuwa'ja'swa jxuka jiiyã'jçxawa.

7 Aça' Fxelipe' na'wẽk pas:

—Dos cientos peso pan weyçxa jxukaysatx pe'ltedeçxa peesu'swaçwa, ãhmeena jĩte', 8 Jesus yakh u'jusa Simon Pedro nyakh Adresa' na'wẽk pta'sx:

9 —Ayte teeçx kuẽ e'z wedx tahç cebada pan ji'phsa ũsa'. Nawa kxazçxáasa yuja' ¿ãhma'k? jĩte', 10 Jesusa' txãa yakh u'jusawe'sxtxi': Mkaaçxi'jwe jxukaysatx jĩnak jxkaah. Aça' cinko mil piçthẽ'jsa kxaazkuẽesay txaksu kaçxna skhẽwtxi. 11 Aça' Jesusa' pantxi' jxpa'gaçxa', Dxusna weçxana'wa txãa yakh u'jusawe'sxtxi ũsu'sku. Aça' txãawe'sxa' kxaazkuẽesaytxi puuçna skhẽwtxi subapkaçx. Wedxnawa txã'wẽytxi yũu, makwe ũ'çxawa txikpkaçx.

12 Txajũ' jxukaysa txikna skhẽwte', Jesusa' jxkaakh txãa yakh u'jusawe'sxtxi':

—Jxuka mepkhakhwe pe'la kijxasaatxi' kĩhwa vxitukahmen jĩte', 13 doce kanastate utatx pkhakh txãa tahç cebada pan kijxasaatxi'. 14 Txã'wẽ Jesus yuuçxáa maa yuhwa ãjanimeesa's vxitte uyçxa', nasa' na'wẽtx weçxana we'we:

—Naa yuuçxá' isa Dxus yuwe pta'sxsa yuh yu'ga, naa kiwete pa'jana jĩ'tx txãaga yu' jĩna weçxaçxa', ãadxijimée jxkaahwa'jsa ki'pxa'watx yu'. Aça' Jesus jiyuçxa', 15 txãaçxáa txuteena u'kh thã'j vxiçte pa'j.

16 Çxhi'dxna kĩinite', Jesus yakh u'jusawe'sxa' ĩkh pukate kĩhçxa, 17 barkote khẽena'wa ĩkhuy ktejkana u'jtx Kapernaumte pa'jya'. Txã'wẽ jxuka çxhi'dxni yã'thewa Jesusa' sxawedna kĩhmeyna, 18 barko ĩkhuy u'jweçpkaçxha', wejxaa wala kiiteçxa ĩkha's seena' wala kẽese'kh. 19 Txã'wẽ seena' yuuçtewa ĩkh pxãhsu jxu'j u'jweççxa', Jesusa's ĩkh kajkwesu yuhte uytxi, sa' wala ũukhtxi. 20 Aça' Jesusa' na'wẽk we'we:

—Ũukhnuwe, adxthu jĩte', 21 wala weçxana jxpa'gatx barkote. Sa' yaakxnimeete naa dudtey ĩkh kutete pa'jtx.

22-24 Kuskuskhẽ' Jesusa' kxtee meeyã'the', txãa yakh u'jusawe'sxwa meete', nasa' barkote khẽena' u'jtx Kapernaum çxhabna Jesusa's pakweya'. Txã'wẽ Jesus yakh u'jusawe'sx teeçx barkote khẽeçxa u'the', Jesus yu' txãawe'sx yakh u'jmeetewa jiyuçxane'ta pakweya' u'jna ũsu' ĩkh kuteju nasa neeyũusa'. Jesusa' Dxusna weçxaçxa pan puuçku txãa ja'date barko pa'jne'ta Tiberias çxhabuh yuusa, aça' txãatetx khẽeçxa pakweya' u'j.

25 Sa' ĩkh kutete pa'jçxa Jesusa's uyçxa pẽjxtxi:

—Idxa' ¿ma'wẽnga ayte pa'j? jĩte', 26 Jesusa' na'wẽk pas:

—Isath we'we', i'kwe'sxa' pana's txikpkaçx ũ'çxaçxáa i'kwe txã'wẽ adxa's pakwé'. Nawa adx txã'wẽ maa yuhwa ãjanimeesa's vxitthu txã's yu' jiyuçxa txã'wẽ yu'çmeei'kwe. 27 Txik ũ'çxa fxi'zewa'jçxá's pakwewa'jme', wejxwa ũ' bagaçxte yuhwa pçumée ĩtxi kaafxi'ze'jwa'jsa's pakweewa'ja'. Aça' Dxus Nçxi'k Nasa Yuusa' txã'wẽ pçumée ĩtxi fxi'zewa'ja's ũsu'nja, txã'wẽ yũuwa'ja's adx Tata' ũsku naa pa'ga jĩk. 28 Txã'jĩte', na'wẽtx pẽjx:

—¿Ma'wẽ yũukxtha'w Dxus jxkaahnitxi' kxtey yuuna fxi'zeya'? jĩte', 29 Jesusa' pta'sxku:

—Dxus jxkaahnitxi' kxtey yuu wẽeçxa', adxa's mpa'gawe, adxa' Dxus kaahnisath naa pa'ga jĩk.

30 Aça' ki'kin pẽjxtxi:

—Idxa' Dxus kaahnisane'ga sũhna kwe'sx ew jiyukahn ãçxha' ¿kĩh kaavxya'ja'jya'waga? 31 Kwe'sx yaçgawe'sx manteywe'sxa' nasa u'pnimée kiwesu u'juçxa', ũ' maná yaasesa's ũ'tx. Aça' txã'wẽ yũuni's Dxus librute na'wẽk we'we': Dxusa' cielujũ ũ'a's puuçku jĩ'k. 32 Aça' txã'jĩte', Jesusa' na'wẽk pas:

—Isath we'we', cielujũ ũ'a's Moises puuçme'. Cielujũ ũ'a's adx Tatak puuç. 33 Aça' Dxus puuçni ũ' cielujũ kĩisa' naa kiwetewe'sxtxi pçumée ĩtxi kaafxi'ze'jwa'jsa'.

34 Txã'jĩte', na'wẽtx pẽjx:

—Kwe'sxtxi jxpe'jsa, cielujũ kĩisa ũ'a's pejka puuçune'ga kwe'sxtxiwa jĩte', 35 Jesusa' pta'sxku:

—Ũ' ĩtxi kaafxi'ze'jwa'jsa' adxthu. Aça' maazkuẽesawa adx tasxte pa'jsa' bagaçxte yuhwa wẽemeetxna. Sa' txã'wẽy adxna ũuste jxpa'gasa' peena yu' yũ'wẽemeetxna. 36 Adxa' kimçxawa i'kwe'sxtxi pta'sxyã'th, nawa i'kwe'sxa' makwe uyçxawa, adxa's cielujũ kĩisana sũju'çmée i'kwe. 37 Makwe i'kwe'sx yu' adxa's jxpa'gameetewa, adx jxpe'khan Adx Tata dukhnisawe'sx yu' jxukaysa adx tasxteçxaçxáa pa'jatxna. Aça' maawa adx tasxte pa'jsatxi' ahçemée weçxana jxpa'ga'nja. 38 Txã'wẽ cielujũ kĩhçxawa peekx adx ũus yaakxniçxá's kxtey yuuya' yuwe'çmeeth. Adx Tata ma'wẽ yũukaathe' txã'sçxáanath kxtey yuuya' yuwé'. 39 Adx Tata' adx jxpe'khan dukhnisatxi' teeçxçxáa yuhwa ivxiitu jxthãasu'çme', kxajíi adxa' nmeh ente' ki' ĩtxi vxitu'nja. 40 Adxna kaahsa jxthãasni' na'wẽ': maawa jxukay Dxus Nçxi'ka's ũuste jxpa'gasa' pçumée ĩtxi fxi'zewa'ja's ji'phu jxthãasu'k. Txãa pa'ga txã'wẽ ũuste jxpa'gasatxi' adxa' nmeh ente' ki' ĩtxi vxitu'nja.

41 Txã'wẽ adxíi ũ' cielujũ kĩisath jĩpa'ga judiuwe'sxa' Jesusa's açewe'weya' takhtxi:

42 —¿Naa pihçíi Jose nçxi'kmeená'? Sa' ¿ma'wẽga cielujũ kĩisath jĩna we'we'? Txã'jĩkahmeníi kwe'sxa' txajx neywe'sxtxi ew jiitha'w.

43 Txajũ' Jesusa' txã'jĩni's jiyuçxa', na'wẽk we'we:

—Maa yuhwa txã'wẽ açewe'wen ũswa'j ji'phmeei'kwe. 44 Adxa' Tata jxkaahnisath aça' txãaíi adx tasxte kuutxa'the yuuçxáa txãatxi' jxukaysatx nmeh ente' ĩtxi vxitu'nja. 45 Txã'wẽ yũuwa'ja's Dxus yuwe pta'sxsa librute na'wẽ fxi'jni ũsa': Dxusa' kaapiya'jana jxukaysatx ¿jĩ'çmeená'? Kxajíi maawa adx Tata kaapiya'jni's wẽse'jçxa txajx jxkaahnitx kxtey yuusa yuuçxáa adx tasxte pa'jatxna.

46 Maa yuhwa Dxusa's iiuymeeta'. Adx yuuçxáa Dxus tasxu yuusath na' txã'sna iiuythu. 47 Adxa' isath we'we': Adxa's jxpa'gasa' pçumée ĩtxĩ fxi'zewa'ja's ji'phutxna, 48 txãasa pçumée ĩtxĩ kaafxi'ze'jwa'jsa ũ'a', adxthu. 49 Kwe'sx yaçga manteywe'sx nasa u'pnimée kiwesu u'juçxa' maná yaasesa's ũ'çxawa, pejka uu ena's ji'phutx. 50 Nawa adxa' cielujũ kĩisa ũ'a'sthu pta'sxi', txã'sna ũ'çxa' uukahmen. 51 Adxíi cielujũ kĩisa ũ' ĩtxisath. Maawa txãa ũ'a's ũ'sa', bagaçxte yuhwa uumée ĩtxi fxi'zewa'ja's ji'phutxna. Aça' ũ' adx ũsu'nja txã' adx kakwe', kxah maa nasawa pçumée ĩtxi fxi'zewa'ja's ji'phukahn txã'wẽ adx kakwe's ũsu'nja.

52 Txã'jĩte', judiuwe'sxa' na'wẽtx puutx ya'paapẽyi':

—Naa piçthẽ'ja' ¿ma'wẽ txajx kakwe's kwe'sxtxi puuçya' ãjakx? jĩte', 53 Jesusa' na'wẽk pta'sx:

—Adxa' isath we'we': Dxus Nçxi'k Nasa Yuusáa kakwe's ũ'çxa txajx eenawa tudxmeeçxa yu', pçumée ĩtxi fxi'zewa'ja's ji'phumeene'kwe. 54 Aça' maawa adx kakwe's ũ'çxa adx eenawa tudxçxa yuuçxáa pçumée ĩtxi fxi'zewa'ja's ji'phutxna, kxah txã'wẽ yũusatxi' adxa' nmeh ente' ĩtxi vxitu'nja. 55 Txãa pa'gatey adx kakwe' peena yu' kwẽeje'jmeena, aça' adx eewa peena yu' kxũ'wẽ'jmeena. 56 Maawa adx kakwe's ũ'na txã'wẽy adx eenawa tudxsa', bagaçxtewa adx yakh ih ũsuna, aça' adxwa txãa yakh ih ũsu'nja. 57 Tata' adxna kaakh txã' ĩtxĩsa'. Txãa pa'ga adxwa ĩtxĩsath. Aça' adxwa Tata yakh ma'wẽ ĩtxĩsatka'w, txã'wẽy ĩtxĩ fxi'zewa'ja's ji'phutxna maawa adx kakwe's ũ'sa'. 58 Cielujũ kĩisa ũ'a'sthu pta'sxna we'we'. Kwe'sx yaçgawe'sx manteywe'sxa' maná yaasesa's ũ'çxawa pejka uu ena's ji'phutx. Nawa naa ũ'a' txãa maná na'wẽsame'. Maawa naa ũ'a's ũ'çxa', bagaçxte yuhwa pçumée ĩtxĩ fxi'zewa'ja's ji'phutxna jĩnak pta'sx.

59 Jesusa' txã'wẽk pta'sx Kapernaumte judiuwe'sx pkhaakhenite. 60 Aça' txã'wẽ kaapiya'jni's wẽse'jçxa', txãa yakh u'jusawe'sx maaíi yu' na'wẽtx we'we txãawe'sx pwe'sxçxáa:

—Na'wẽ pta'sxni', wala thẽya' jiyuwa'j, aça' ma'wẽ yuhwa ya'jiyu'çme'.

61 Nasa jiyumeeçxa kuh jwed we'wena ũste Jesusa' jiyuçxa', na'jĩk:

—Adx pta'sxni's jiyumeeçxa ũusçxa yaaki'wá'kwe. 62 Txã'wẽ jiyumée ũsçxawa, Dxus Nçxi'k Nasa Yuusa' cielun teekaçte uyçxa', ¿maa sũjuki'kwe? 63 Na'jĩ'th na': Dxus Espiritu' ĩtxi kaafxi'ze'jsa', aça' txãaçxá'sthu we'wena pta'sxi', naa kiwete ũ'çxa ĩtxĩ fxi'zeni's pta'sxi'çmeeth. Adxa' isath pta'sxi' Dxus yakh ĩtxĩ fxi'zewa'ja's. 64 Nawa maaíi yu' isane' pta'sxi' sũju'çmeei'kwe jĩk.

Jesusa' dxiikhẽy jiiyã'kh yu' maa txã'wẽ açeçtewa, sa' kim ikhkahn dukhwa'jsatewa, txãa pa'gak dxiikhẽy txã'jĩna we'we.

Sa' ki' we'weçxa':

65 —I'kwe'sx maaíi yu' açeçte jiiçxath adx Tata kuutxa'the yuuçxáa txãawe'sxa' adx tasxte pa'jatxna jĩna we'we.

66 Jesus txã'wẽ pta'sxteçxáa, txãa yakh u'jusawe'sx maaíi yu' txuteena u'jtx. 67 Txajũ' Jesusa' pẽjxku docesatx:

—¿I'kwe'sxwa adxa's txuteeçxa u'jya'wakwe'? jĩte', 68 Simon Pedro' na'wẽk pas:

—Kwe'sxa' ¿kim yakh u'jwekxtha'w? Idx yuuçxáa pçumée ĩtxĩ fxi'zewa'ja's pta'sxna ũsgu aça'. 69 Txãa pa'gatey kwe'sxa' idxa's jiyutha'w, txãasatha'w idxa' Kristo, Dxus ĩtxisa Nçxi'kne'ga sũju'.

70 Txã'jĩte', Jesus we'weçxa':

—Adxa' i'kwe'sx docesatx txhitxhçxa pa'yatewa, teeçxsa' eçxthẽ'j jĩia' jĩnak pta'sx.

71 Jesusa' Simon nçxi'k Judas Iskariote's we'weçxak txã'jĩ, Judas txã'wẽ docesatewe'sxçxawa Jesusa's ikhkahn dukhya'wak yu' naa pa'ga.