1 Pablo' sacerdote npiiçthẽ'jwe'sx vxite' judiu nthẽ'jsawe'sx pkhaakhesatx thegçxa', na'wẽk we'we:

—Yakhthẽ'jwe'sx, adxa' ãçxpkaçx Dxus dxi'pte jxpubath sũhwa'j yu'sa' ji'phmeeth jĩte', 2 sacerdote npiiçthẽ'j Ananiasa' Pablo yuwega petxa kaakh pukate ih ũssatx. 3 Aça' Pablo' na'wẽk we'we:

—Ãateçxáa ew we'weçxa' ũuste yu' ewmée yaakxpa'ga idxa's Dxus kastigaĩna. Idxa' ley jxkaahniçxá's kxtey yuusath ¿sũju'gá'? Txã'wẽçxa' ¿kĩjxa'ga adxa's petxakaja'? Leya' txã'wẽ jxkaaja'çme' jĩte', 4 kxte ũssa' na'wẽtx we'we:

—Dxusna selpisáa sacerdote npiiçthẽ'ja's txã'wẽ wẽesxuwa'j ji'phmeeg jĩte', 5 Pablo' pasçxa':

—Dxusna selpisáa sacerdote npiiçthẽ'jna sũju'çme'ntka. Jiiwaça', txã'wẽ paswa'jmeene'tka yu'. Txã'wẽ yuukahmeníik Dxus librutewa na'wẽ pta'sxi': Iidx çxhabte jxkaahsa's juuna' we'wenu jĩ'k naa pa'ga.

6 Txajũ' kxte pkhaakhesawe'sxa' saduceo vxite' fxariseowe'sx txãawe'sxtewa jiyuçxa', Pablo' na'wẽk sus we'we:

—Yakhthẽ'jwe'sx, adxa' fxariseo ji'j, fxariseo íiçxáath. Uusaawe'sxa' ki' ĩtxĩ yuuwa'jsa yuhta' sũhna yaakxsath. Txãa pa'ga yuuçxáa adxa's ewmeesa' jĩna ũsta'.

7 Txã'wẽ we'wete', fxariseo vxite' saduceowe'sx yakh txãawe'sx pwe'sx juuna' we'weçxa puutx txuteetx. 8 (Saduceowe'sxa' uusaawe'sxa' ki' ĩtxi yuutxna sũju'çmeeta', sa' uute' nasaa ũus vxite' angeleswe'sx txã'wẽsa ũstxna sũju'çwameeta', naapkaçxha' fxariseowe'sxa' txã'wẽsa jxuka ũstxna sũju'tx, txãasatx puutx txutee.) 9 Txã'wẽ yũuçxa txãawe'sx pwe'sx wala sustxi ũusçxa we'wena. Aça' fxariseowe'sx ju'gusa ley kaapiya'jsawe'sx maaíi yu' kiiteçxa na'wẽtx we'we:

—Naa piçthẽ'ja' ewmée yũusame'. Meeçxa' Dxus angel wá' yu', meeçxa' uusáa ũus wá' txã'wẽ vxyaa, nawa jiimeeçxa' kuçx we'wemeeyuga. Txã'wẽme', jiimeeçxa' Dxusa's wáa açewe'wesa yu'nja'w jĩ'tx.

10 Seena' ũusaçxana suste', komadante' Pablo's ikhewáatxna sũhna ũukhçxa soldautx yuukaahçxa, Pablo's kutxi'khaakh pkhaakhesa ksxavxyu kuartel yatnay jxũna u'khan.

11 Txãa kuste', Jesukristo' Pablo's vxyaaçxa na'wẽk we'we:

—Pablo, ũukhnu. Ay Jerusalente na'wẽg we'we adxna pta'sxna, txã'wẽy we'wewa'j ji'phgu Romatewa jĩk.

12 Kuskuskhẽ' judiuwe'sx maaíi yu' Pablo's ikh wẽesa na'wẽtx puutx we'we: Pablo's ikhmeeçxa yu' kĩh yuhwa ũ'me'nja'w jĩna. 13 Txã'wẽ Pablo's ikhmeeçxa yu' kĩh yuhwa ũ'ya'mée puutx we'wesa' kuarenta piçthẽ'j jxthaakwetx yu'. 14 Txã'wẽ yũuwa'ja's puutx we'weçxatx u'j sacerdote npiiçthẽ'j vxite' judiu nthẽ'jsawe'sx tasxna na'jĩna pta'sxya':

—Kwe'sxa' Pablo's ikhmeeçxa yu' kĩh yuhwa ũ'me'nja'w jĩnatha'w puutx we'we Dxus dxi'pte. 15 Aça' ãçxha' i'kwe'sx nthẽ'jsawe'sx jxuka pkhaakheçxa mpẽjxwe komadante's: Kuskusa' Pablo's mkaah kwe'sx tasxte, txajx yuwe's jwee ew paapẽjx ya'watha'w jĩna. Naapkaçxha' kwe'sxa' ayte pa'jmeyna ikhya' dxi'the yupu'nja'w jĩ'tx.

16 Txã'wẽ puutx we'weçte Pablo npe'sx nçxi'k jiyuçxa', Pablo's pta'sxya' u'kh kuartel yatna. 17 Aça' Pablo' jiyuçxa', teeçx kpiitana's pa'yaçxa na'wẽk we'we:

—Naa luuçxa's meen pe'jna me'j komadante tasxna, txãa yakh puutx we'wewa'j ji'pha' jĩte', 18 kpiitana' luuçxa's pe'jçxa komadante tasxte kũhçxa pta'sxku:

—Karcelte ũssa Pablo' adxa's pa'yaçxa naa luuçxa's pe'jna kaakh, ayte idx yakh puutx we'wewa'j ji'pha' jĩte', 19 komadante' luuçxa's kusete pu'kisna u'jçxa paaçte pẽjxku:

—¿Kĩhga we'we wẽje'? jĩte', 20 luuçxa' pta'sxku:

—Judiuwe'sxa' na'wẽtx puutx we'we: Kuskusa' idxa's pẽyi'nja'w Pablo's kaakhan, judiu nthẽ'jsawe'sx tasxna yuuwe's jwee ew pẽjxya'watha'w jĩçxa. 21 Nawa txã'wẽ dxihna sũhçxa Pablo's kaahmeene'ga. Txã'wẽme', piçthẽ'j kuarenta jxthaakwesa Pablo's ikhmeeçxa yu' kĩh yuhwa ũ'me'nja'w jĩna Dxus dxi'pte puutx we'weçxa dxi'the yupna ũsta'. Sa' idx ma'jĩtewa txã'sçxáan ũythasna ũsta' jĩte', 22 komadante' luuçxa's na'jĩna we'weçxak kaah:

—Komadante's pta'sxthu jĩna kim yuhnawa pta'sxmeene'ga jĩçxa.

23 Txajũ' komadante' e'z kpiitantxi pa'yaçxa Cesarea çxhabna u'jya' pheu'khaakh. Doscientos soldau çxidaçxáa u'jwetxna, jibatewe'sx setenta, vxite' lansa ji'phsa doscientos, sa' ayjxu kasejetxna kus las nwewete. 24 Sa' txã'wẽy Pablo a'jwa'j jibawa pheu'khaakh, ne'jwe'sx Fxelix tasxte ikhmée ew dukhkahn. 25 Txãawe'sx yakh karta kaakh na'wẽ fxi'jçxa:

26 Klaudio Lisias fxi'jaçthu ne'jwe'sx Fxelixa's weçxana. 27 Naa piçthẽ'ja's judiuwe'sxa' karcelte txahçxa ikhya'watx yu'. Nawa romano nasatewa jiyuçxa', adxa' soldau yakh u'jçxa nwe'weth. 28 ¿Kĩh yũupa'gaki'tx txã'wẽ açe'? sũhçxa jxũna u'th judiuwe'sx nthẽ'jsawe'sx tasxna. 29 Aça' txãawe'sx ley pa'gaçxáata txã'wẽ açe', nawa ikhya' yu' ãjawa'jmeek yu' sa' karcelte txajxa'wa ãjawa'jme'. 30 Nawa Pablo's ikhya' yuuçxáa jĩna puutx we'weçxa yupna ũsta' jĩni's jiyuth. Txãasa iidx tasxte kajaçthu. Pablo's açesatxwa we'weth kĩh yũupa'gane'kwe açe' nawa ne'jwe'sx tasxte u'jçxa puutx we'wene'kwe jĩth. Txã'wẽçxáath idxa's pta'sxi' jĩnak fxi'j.

31 Txajũ' soldauwe'sxtxi txã'wẽ jxkaajxã'the', Pablo's pe'jna'wa kusçxáa u'jtx Antípatris çxhabna. 32 Kuskuskhẽ' soldau çxidaçxáa u'jsa' ki' sxawedtxi kuartel yatna, naapkaçxha' jibatewe'sxa' u'jtx Pablo yakh. 33 Cesarea çxhabte pa'jçxa', karta's ũsna'wa Pablonawa dukhtxi ne'jwe'sxa's. 34 Txajũ' ne'jwe'sxa' karta's lẽeyçxa' pẽjxku Pablo's: ¿Majũwe'sxga? jĩna. Sa' Ciliciajũwe'sxtewa jiyuçxa', 35 na'wẽk we'we:

—Iidx yuuwe's jiyu'nja idxna açesawe'sx pãatxhĩ'khya' pa'the jĩk.

Txajũ' Pablo's Herodes txaahni yatte kxuuphku thegwa'jsa txahçxa.