1 Or kuu ndetsin gaxa re zha yez naro Jerusalén, tsa mzin re zha gax rop yez kuu le Betfagé ne Betania, gax yii kuu le Olib, tsa mtaal Jesús chop zha kuu ngeteed lo Jesús, 2 ne nzhab Jesús lo rop zha:

―Gwa goo yez kuu nzi baa. Ne or tab goo yeza, tya yetsal goo thib burr yeen kuu ndekedoo, thib maa kuu neeka thib zha ter ke. Xak goo maa ne yaadno goo maa. 3 Ne os cho naabdiz lo goo ne: “¿Chebee ntsow goo kobaa?” Tsa gab goo lo zha: “Lee Zha Nabee ndeche maa, tsaraa yaadtaan zha maa”.

4 Ne ngwa rop zha ne mzal zha burr, lee burr ndekedoo roo pwert thib lad roo net ne mxak zha burr.

5 Ne lee chop tson zha kuu nzi tya mnaabdiz lo rop zha ne nzhab:

―¿Kwan ngetsow goo? ¿Chebee ngexak goo burr?

6 Lee rop zha mkab taxal nzhab Jesús lo zha, tsa mlaa re zhaʼa rop zha. 7 Ne ndyaadno rop zha burr lo Jesús, ne mxoob re zha xab zha dits maa, tsa mke Jesús dits maa. 8 Kwaro zha mdix xab laaz net, ne tedib net zha mga baat ne mdix zhay laaz net. 9 Ne lee re zha kuu ndener ne re zha kuu ndeke, tenzhee mbez re zha:

―¡Aka wen nak Diox! ¡Wen nak zha kuu ndyaad kon le Zha Nabee! 10 ¡Aka wen leettsa nabee zha taxal mnabee teyaa David zha ndala! ¡Kwathoz wen nak Diox kuu ndob yibaa!

11 Tsa mndaab Jesús leen yez naro Jerusalén, ne ngwa Jesús lee roo gwodoo ne mwii Jesús re ladta, ne mziʼa yezlyu, tsa nda Jesús yez Betania kon re zha kuu ngeteed lo Jesús.

12 Tedib wiz leettsa mroo re zha yez Betania, mlann Jesús. 13 Ne tith mloo thib ya ig kuu ndab la lo Jesús, tsa ngwa Jesús lo ya naa chu ndab xle lo ya. Per or mzin Jesús xann ya yent xle lo ya, beeta la ndab lo ya, tak nagt tyemp kuu ndaa ya xle. 14 Tsa nzhab Jesús lo ya ig:

―Neeka tedib welt wut raa zha xle loʼa.

Ne mbin re zha kuu ngeteed lo Jesús, kuu nzhab Jesús.

15 Leettsa mzin Jesús yez naro Jerusalén, tsa mndaab Jesús lee roo gwodoo naro, ne mndelo Jesús mloo re zha kuu ntho, ne re zha kuu ndi. Ne mlobi Jesús re mes chaan re zha kuu ntsiil temi, ne mlobi Jesús re asi chaan re zha kuu ntho palom. 16 Neeka thib re zha kuu ndyaadno kuu ntho, mlaat Jesús gariid lee roo gwodoo. 17 Ne mndelo Jesús mloo Jesús lo re men ne nzhab Jesús:

―Lo xkiiz Diox nzhab: “Lee lizʼn nak yuu ta ndediz re men lo Diox”, per lee re goo ntsowe taxal liz wann.

18 Ne mbin re ngwleyy ne re maestr kuu nloo xkiiz Diox re kuu nzhab Jesús, tsa mndelo zha nkwaan zha naa xomod kuth zha Jesús, tak nzeb re zha ne zha re men yez, tak reta men yez nyow leettsoo xa nloo Jesús, ne kwathoz mzegey leettsoo re zha xa nloo Jesús. 19 Per leettsa mziʼa yezlyu, tsa mroo Jesús kon re zha kuu ngeteed lo Jesús yeza.

20 Ne til tedib wiza, leettsa mriid re zha lo ya ig, tsa mwii zha lee dib lozh ya mbiz. 21 Tsa mtelaaz Pey kuu nzhab Jesús tedib wiza, tsa nzhab Pey lo Jesús:

―Maestr, wii lee ya ig kuu mlodeʼa mbiza.

22 Jesús mkab ne nzhab:

―Gwalaaz goo kon dib ndroo leettsoo goo, lee Diox tak tsow reta kwaa. 23 Wlipaa na nin lo goo, loka cho thib zha kuu gab lo yii ree: “Beche nzhee ne bla leen nitdoo”, ne os gagt chop xgab zha, sinke yelaaz zha lee Diox tak tsowe ne leey gak. 24 Tata nin lo goo, reta kuu naab goo lo Diox, gwalaaz goo lee Diox taay ne tekayaa gooy. 25 Ne or tediz goo lo Diox, bloo goo yek goo reta kuu went kuu mtsow taben goo lo goo, tsa noga Xutaa kuu ndob yibaa, tuyy reta kuu went kuu mtsow goo. 26 Tak os lee goo koot goo yek goo, re kuu went kuu mtsow taben goo lo goo, noga Xutaa kuu ndob yibaa tuyyt zha reta kuu went kuu ntsow goo lo zha.

27 Tsa mre re zha yez Jerusalén, ne or lee Jesús ndiy lee roo gwodoo, tsa ngwa re ngwleyy kuu nabee lo re ngwleyy, re maestr chaan ley ne re zha gol lo Jesús. 28 Tsa nzhab re zha lo Jesús:

―¿Cho mndaa diiz loʼa ntsowa koree? Ne ¿cho nabee loʼa tsow luy?

29 Jesús mkab ne nzhab:

―Noga na naabdizʼn thib kuu lo goo. Os lee goo kab goo kuu naabdizʼn lo goo, tsasi tenin lo goo naa cho mndaa diiz ntsowʼn koree. 30 ¿Cho mtaal Juan kuu mtsowleyy re men? ¿Chu Diox mtaal zha o re men mtaal zha? ¡Kab goo!

31 Tsa lee re zha mndelo zha nzhab zha lo re altaa zha:

―Os leeʼaa gabaa: “Diox mtaal zha”, tsa ne zha loʼaa: “¿Chebee ngwalaazt goo kuu ne zha?” 32 Ne os leeʼaa gabaa: “Re men mtaal zha…”, per gagt gabaa tata ―nzhab re zha.

Tak nzeb re zha ne zha re men, tak ne re men yez lee Juan nak profet kuu mndaa kwent xkiiz Diox.

33 Tsa nzhab re zha lo Jesús:

―Net nee cho mtaal zha.

Tsa nzhab Jesús lo re zha:

―Neeka na nitʼn lo goo, naa cho mndaa diiz ntsowʼn koree.