1 Or nderid Jesús thib ta, tsa mwii Jesús thib mbyi kuu ngol syeg. 2 Tsa lee re zha kuu ngeteed lo Jesús mnaabdiz lo Jesús ne nzhab:

―Maestr, ¿chebee syeg mbyi ree ngol mbyi? ¿Chu tak mndaa xut mbyi ne xnaa mbyi falte o chu tak leeka mbyi mndaa falt konay?

3 Tsa lee Jesús mkab ne nzhab:

―Ngolt mbyi tabaa, por falt chaan xut mbyi ne xnaa mbyi, neeka nagte por falt mbyi, tabaa ngol mbyi, tsa por lee mbyi loo Diox re kuu tak tsow Diox. 4 Ne nal beet raa tse nziʼaa, ndoblo tsowʼn rtsin zha kuu mtaalʼn, tak leettsa nlaa yaal neeka thib zha gagt raa ke tsiin. 5 Nal kuu bee ndon lo yezlyu ree, xni nakʼn lo re men yezlyu ree.

6 Or ngwalo nzhab Jesús re koree, tsa mtsuk Jesús lo yu, ne mtsow Jesús lut ben ne mdaab Jesús ben ngutlo syeg. 7 Tsa nzhab Jesús lo syeg:

―Gwa, gwateech ngutloʼa roo tank kuu le Siloé. (Diiz ree nak: “Ntaal zha zha”.)

Tsa ngwa zha syega ngwateech ngutlo, ne leettsa mretab zha nyeniʼa ngutlo zha. 8 Tsa lee re zha kuu nzo gax liz zhaʼa, ne re zha kuu mwii lee zha mnaab karida, mnaabdiz zha lo re altaa zha ne mbez zha:

―¿Chu leet zha ree kuu nyatob nyanaab karida ganda wiz?

9 Tsa thib net zha mbez:

―Lee zhay.

Lee tedib net zha mbez:

―Leet zhay, tegal tata na zha.

Per lee zha mbez:

―Nay.

10 Tsa mnaabdiz re zha lo zhaʼa ne nzhab zha:

―¿Xomod nzhaaka ngwiiʼa?

11 Lee zha mkab ne nzhab:

―Lee mbyi kuu lee Jesús mtsow lut ben, ne mdaab mbyiy ngutlon, tsa ne mbyi lon: “Gwa roo tank Siloé gwateech ngutloʼa”. Ne oraaka ngwan ne mteechʼn ngutlon, ne lee ngutlon mzhaal.

12 Tsa mnaabdiz re zha lo zhaʼa ne nzhab zha:

―¿Ma mbyiʼa tsa?

Tsa nzhab zha:

―Netʼn, ma mbyi.

13 Tsa ndano re zha zha kuu ngok syega lo re fariseo. 14 Ne wiz sabd kuu ndroxkwan re zha Israel, wiza mtsow Jesús lut ben ne mtegwe Jesús ngutlo zha kuu ngok syega. 15 Tsa lee re fariseo mnaabdiz lo zha kuu ngok syega ne nzhab re zha:

―¿Xomod mgwe ngutloʼa?

Lee zha mkab ne nzhab:

―Lee mbyiʼa mdaab ben ngutlon, ne mteechʼn ngutlon, ne lee nal nzhaaka ngwiin.

16 Lee chop tson fariseo nzhab:

―Nagt mbyiʼa thib zha kuu mtaal Diox, tak ngotsowt zha wiz sabd kuu ndroxkwanaa.

Per techop tson zha mbez:

―¿Xomod nzhaak ntsow zha re milagr thoz ree, os zha kuu nap falt nak zha?

Ne ta mod ngok rol re zha. 17 Tsa mre re zha mnaabdiz zha lo zha kuu ngok syega, ne nzhab zha:

―Lee lu, ¿cho nak zha kuu mtegwe ngutloʼa ndaka?

Lee zha mkab ne nzhab:

―Na ni lee zha nak thib profet chaan Diox.

18 Per lee re zha Israel ngwalaazt zha lee zha kuu ngok syega, nzhaaka ngwii, tsa mtaal re zha chop tson zha ngwachez xut zhaʼa ne xnaa zha, 19 ne or mzin xut zha ne xnaa zha, tsa mnaabdiz re zha lo xut zha ne lo xnaa zha, ne nzhab re zha:

―¿Chu zhiinn goo nak mbyi ree? ¿Chu wli goo syeg zha ngol zha? ¿Ne xomod nzhaaka ngwii zha nal?

20 Lee xut zha ne xnaa zha mkab ne nzhab:

―Wli xgann nee nak zha, ne syeg zha ngol zha, 21 per net nee chebee nzhaaka ngwii zha, ne neeka net nee cho mtegwe ngutlo zha. Bnaabdiz goo lo zha zha byeʼa zha, lee zha tak ney lo goo.

22 Tata nzhab xut zha ne xnaa zha, tak nzeb rop zha ne zha re zha Israel kuu nataak, tak lee re zha kuu nataaka myaan re zha diiz, os lee thib zha gab lee Jesús nak Zha Kuu Mtaal Diox Nabee, koo zha zhaʼa xid re zha ta nkaltaa re zha nteed zha xkiiz Diox. 23 Ta mod nzhab xut zha ne xnaa zha: “Bnaabdiz goo lo zha zha byeʼa zha”.

24 Tsa lee re zha Israel mre mrez zha kuu ngok syega, ne nzhab re zha lo zhaʼa:

―Bloo rooʼa lo nee delant lo Diox. Tak neʼa nee lee mbyiʼa nak thib zha kuu ndaa falt.

25 Tsa lee zhaʼa mkab ne nzhab:

―Netʼn chu zha nap falt nak zha o nagt zha zha kuu nap falt. Beeta kuu nen nak, ngokʼn syeg, per lee nal nyeniʼa ngutlon.

26 Tsa mre re zha mnaabdiz zha lo zhaʼa nzhab zha:

―¿Kwan mtsow zhaʼa loʼa? ¿Xomod mtsow zha par mzhaal ngutloʼa?

27 Lee zha mkab ne nzhab:

―Niʼa nay lo goo, per nyelaazt gooy. ¿Chebee nlaaz goo bren ni nay lo goo tedib welt? O, ¿chu no goo nlaaz goo teke goo dits Jesús?

28 Tsa mtsalzhoo re zha zhaʼa, ne nzhab re zha:

―Lu ndekeʼa dits mbyiʼa, per lee nee ndeke nee dits Moisés. 29 Nee ne lee Diox mni lo Moisés, per lee mbyiʼa neeka net nee pa mroo mbyiʼa.

30 Lee mbyi kuu ngok syega mkab ne nzhab:

―¡Koree si wlipaa nzegey leettsoo men ngwii men! Tak ¿chebee net goo pa mroo zha, ne lee zha mtegwe ngutlon? 31 Retalee neʼaa nzhont Diox xkiiz re zha kuu nap falt, per nzhon Diox xkiiz re zha kuu nyelaaz Diox ne ntsow kuu nlaaz Diox. 32 Thitanax neeka mas ter yath, lee thib zha ntsow nyeni lo thib zha kuu ngol syeg. 33 Os lee mbyiʼa ndyaadt por Diox, yent kwan tak tsow mbyi.

34 Tsa nzhab re zha lo zha kuu ngol syega:

―¡Zhiinn wan zha naka! Ne nlaaza teniʼa nee.

Tsa mloo re zha zhaʼa ta nkaltaa re zha nteed zha xkiiz Diox.

35 Tsa mbin Jesús lee re fariseo mloo zha kuu ngol syega, ta nkaltaa zha nteed zha xkiiz Diox, ne or mzaal Jesús zha kuu ngok syega, tsa nzhab Jesús lo zha:

―¿Chu nyelaaza, Zha Kuu Mtaal Diox Ngok Men?

36 Lee zha kuu ngok syega mkab ne nzhab:

―Zha Nabee, ne lon choy, tsa yelazʼn zha.

37 Jesús mkab lo zha ne nzhab:

―Mwiiʼa lu zha, tak na nak zhaʼa kuu ngetediz loʼa.

38 Tsa lee mbyiʼa mtobxub lo Jesús ne nzhab:

―Zha Nabee, nyelazʼn lu.

39 Ora nzhab Jesús lo zha:

―Na ndyalʼn lo yezlyu ree par naabʼn kwent lo re men yezlyu ree, tsa lee re zha kuu syeg yeni lo, ne lee re zha kuu nyeni lo yaan syeg.

40 Per lee chop tson fariseo kuu nzi tya, or mbin zha kona, tsa mnaabdiz zha lo Jesús ne nzhab zha:

―¿Chu no nee nak nee taxal syeg?

41 Jesús mkab lo re zha ne nzhab:

―Os gagak goo syeg, napt goo falt lo Diox. Per tak mbez goo wen nyeni lo goo, kona nap goo falt lo Diox.