1 Eto Iesu na temple jo ta eto araha ta puvutuhunu amita ambotani puvuto temple gerikari javotoho avo Iesu kioja ke eo Iesu na einge ena. 2 “Bande erevi ungona javotoho ere kogova te ungota degi erena, koro vahai na nei amita hamo ta mane tembeto iresuja rate tapa araraeto veto sio sao aisuja.” ainge Iesu na harikena.

3 Eto Iesu tiri olives ta arumbeto mihinu amita ambotani ungo oenga puvuto einge eto ingia. “Temple amo iji deina arara eto veau? Eto nei iji emita tutumota umo puvuresoa amita hajire do aingere avo tapa ejo ingore,” ainge eo 4 Iesu na mine einge ena, “Embomeni ke sokova hande aisora avoeto be kogue irivujo, 5 embo nei nei na javo nau jigama ue ke sokova na ijie puvuto “Ungo orekasi puvena” ainge ijirou ingihe embo isapamane enana ta ke sokova avo ambo ambo aisora 6 eto ungona isoro hombekari ta aisora amita asavi ingesova eto hoi ta asora amo duru ingihe osaga avojo. Ari ainge puvuresuja rate iji kombu ta auvehija ainge mane hotembasova. 7 Enda nei na ereto enda nei ga isoro aisora eto King vahai na ereto King nei tasuja. Nei beuje iji peni vahai puvutuhurou enda tapa ta titira puvuresuja. 8 Eto ari erena tapa erevi amo evohu na meni ingasi ue memenga kiaguja ainge dombo ra.

9 Eto ungo amo embomeni na andito humbuto embo nei ta ingeni ta ikaro humbuto aro memenga kesova eto taro pehasova. Eto ungo embomeni nau avoeto embo tapa na ungota degi hini kambari mahainge aisora. 10 Iji amikote nau embomeni nei nei na tunga hapereketo na ke be ae ue hini kambari mine ara ue namei ungota kitoho embo ta ingeni ta ikasora. 11 Eto peroveta sokova amina puvuto ke sokova ijiroro ingihe ambo ambo aisora 12 eto ari hotembari sasapura na pajito enda eneteto au namei kamei ta osari jamopo aisuja 13 rate embo amuna sove sove eto na ke be ijie irirou iji kombu ta embo amo God na oreketo humbasuja. 14 Eto God na tohota embomeni tihi jigesi siriketo ere uhua ke javotoho avo Judea embomeni te enda tapa embomeni te ta degi ke hande aro embo tapa ingesora eto amita engihita iji kombu ta puvuresuja.

15 Eto Peroveta Daniel na Donda Sapura be Sapura amita ke mahu kajena avo humbuto puvuto Degi Otohu ta ikaro hetasuja (ke erevi ehekari embo be ingijo) 16 kito ungo Judea ei ta miheva embomeni joru tiri ta pambuvu. 17 Eto embo bande i ta mihia amo veto amita donda mane sirikasuja. 18 Eto embo pure ta mihia amo mane egerembeto amita asukari humbasuja te tihi tambueto pambuvu. 19 Eto iji amite evohu urete te eto evohu meni isapa emi ta amita degi huhevari ngahia avoeto aja to erena! 20 Eto ungo joru pambasova iji avo ga iji te mane puvuresuja eto jangu indari iji te mane puvuresuja pari ta ainge evujo 21 amita be amo uhu te enda te eha ari iji te eto puvuna iji amite memenga osaga ainge puvurae be ra eto amita ambota ari ainge ehako mane puvuresuja. 22 Eto osaga kiari iji avo ugorota haekae aisora amo embo tapa vasiri te mane iresora rate God ta embomeni siriketo humbari avoembo God na iji avo ugorota haekasuja. 23 Eto embo na no degi ta “Kijo, ungotenau Orekari Embo puvija erevira.” eto iji nei “Hoi ta ere puvutuhua,” ainge aisuja ingito ke avo be hotembavojo 24 amita be amo orekari embomeni sokova eto peroveta embo sokova na ereto hajire nei te nei te aro embomeni kito mana mana ue ke be hotembasora. Eto God na siriketo humbari embomeni te tapa na enana ta ari kito ke be ke ijie ambo ambo asi hotembasora, 25 avoeto ari avo puvuresuja avoeto kihi ere harikihena ingivujo.

26 Eto embo na ungota degi “Kivu ungotenau orekari embo puvija avo ojagatambu aita mihia,” ke ainge ijirou ai ta pambavojo eto ke nei amo, “Kivu orekari embo puvuto degi nei ojikari ta mihia,” aisora ke avo ingovojo 27 amita be amo pipiri na ihane ta sariage eto pambuto sohe ta veaguja ainge dombo Embo ta Meni amo puvurou embo tapa kesora. 28 Eto o sari ta di asiko na veaguja aingeko dombo puvuresuja.

29 Eto osaga kiari iji avo irae au iji amo mume ururou hariga na usasa isapa aisuja eto uhu ta sovera na jahevau kuro soheto veasora, 30 eto iji amikote Embo ta Meni ta hajire avo uhu ta puvurou enda embo tapa na kito sinena ue jenge tasora, eto Embo ta Meni avo sovera te usasa te uhu ta johi hamo ta heteto veto ere hua avo embo tapa na kesora eto amina toho embomeni mahu siriketo humbari avo vahaita puvurora 31 huin husau asavi peni vahai au amita Anera isapamane ikau enda tapa kaina pahina ihane eto sohe ta pambuto umbaro puvuresora.

32 Na ji junga ta timu hatirari ke aisona ingivujo. Eto ji avo huvira oi kito iji ta iji ere puvutuhua ke eagora. 33 Eto ainge dombo ari erevi erena amo puvurou kesova amo Embo ta Meni na jo ta horasi bokiri pe ta auveto heteto mihia. 34 Na ungota degi ke be erena ungo eha miheva embomeni tapa mane sasari aisora rate huna mihirovo ari erena erevi puvurou kesova. 35 Eto ke peni be amo uhu te enda te avo irae aisuja rate nau ke avo mane irae aisuja te daroho iresuja, 36 rate ari erena amita puvurari iji amo embo tapa kiae be eto Anera te God ta Meni te tapa kiae, Mama God na vahai kiarira.

37 Eto embomeni Noah ta iji te mihahera ainge dombo mihiroro Embo ta Meni puvuresuja. 38 Amita be amo embomeni indie umbuhe evohu jijimbukihe mihio Noah e nga jo ta horihinu 39 do puvuresuja amo embomeni nei do hotembae ue mihio umo na irerembeto humbunu sasari ea, ainge dombo mihiroro Embo ta Meni puvuresuja, 40 eto iji amite embo heriso pure ue mihiroro puvuto embo vahai humbuto pahue vahai toasuja, 41 eto evohu heriso ambe pure ue mihiroro puvuto vahai humbuhe nei toasuja. 42 Avoeto jo te hotembari te tapa simba be eto kogo ue irivujo. Ungota Bada ta puvurari iji amo ungo kiae avoeto. 43 Eto ungo kiarira amo pegene embo ta puvurari iji amo bande mamona mahu kogua avoeto evae simba ue mihirou pegene embo puvuto kito mane bande pejeto horeto pegene aisuja. 44 Ainge dombo Embo ta Meni avo eha mane puvuresuja ainge hotembihe irirovo amo hepureketo puvuresuja avoeto mahu nununga eto irivujo.

45 Eto embo peni na amita pure embo vahai ta indari ageto undurari javotoho avo bande mamo na kito au bande ta indari tapa amo amina simba aja ke aisuja. 46 Eto pure avo eto kogoeto ururou embo peni bande ta puvuto pure embo avo kito tunga javotoho 47 eto ke au pure embo na amita donda tapa simba ue osa asuja avo erena, 48 rate pure embo nei amo ke sokova ari embo amina, ‘Bande mamo eha mane puvuresuja,’ ijie 49 ihiketo amita pure vahai ari embomeni torue embo sasapura ga umo sapura indito pipi konene ue bande mamo puvurari hotembae ue mihirou 50 iji ikae teho puvuto pure embo sapura avo kito ikau pambuto enana hotembari heriso embomeni amiga osaga inono kesuja. 51 Eto ai ta embo sasapura na memenga kogue sisisasi ijie ti kiroro kiroro aisora.” ke ainge Iesu na ena.