8
End aŝaɗaxan alëngw areɓi eŋ
1 Gër ɓend këne rende ɗek, eŋo xurik ex këɓën: aŝaɗaxan alëngw ŝot kënëŋone na. Aỹëpa ỹëpa ko gër liw̃ ir añëpara and owun or Kaxanu ƴaŋ gër orën. 2 Fën ko riyenixënd, lëf gër Aciw̃ amënëk, lëf gër aner and ɗal, and ri ko Axwën Kaxanu, xarak ax gi ex na and ri këni ɓela.
3 Enimin aŝaɗaxan alëngw ar ex yo, ala këno sanand eɓi dinënd ocaɗaxa ok ɓulunda in gë ɓeɓër këni w̃ëlarawënd ɓën do gë oyel or kënëɓi lasëgund ol. Awa aŝaɗaxan alëngw areɓi an afo exo cotënd ɓeɓër ko rixën ocaɗaxa. 4 Kido gër ebar ro hi baxo, axo gi dona dëŋ aŝaɗaxan gayik ɓela exëna ɓër kë rind ocaɗaxa ang rek acariya ak. 5 Cale ind këni lëgwelind ɓëŝaɗaxan ɓëjo iŋ, etëfëtëli ed ɓeɓër ex ƴaŋ gër orën fo ex. Andamat ex gë end Moyis eŋ, and baxo rind aner and Kaxanu aŋ. Yama Kaxanu sitin baŋo mondako: «Nëkonël ɗe aye, eƴ dixën ang aner and w̃asinëgu këmi ƴaŋ gër etënd ak✡ 8.5 Andocane 25.40.» 6 Ɓarikan, gërëgako Yesu ex aŝaɗaxan ar kë rind andiyen and xucak ekëɓën gë and eter eñanar gayikako mëŋ ex ah̃atelindër ar eter ed w̃ëlanëgu këɓo ɓekënaxik ɓend ɓeƴa këɓo Kaxanu an.
7 Enimin, kido eter eñanar el ŝenene ebax, ang ỹandi baŋo Kaxanu ak, axo nëmb dona gë eter ecëxe. 8 Ɓarikan Kaxamu are re baɓi ɓulunda irexëm in mondako:
«Wëno Axwën an ga re këme,
në eƴow ex amëd and këme ri eter ekaŝax
gë ɓulunda ir Isërayel do gë ir Yuda aŋ.
9 Afitar kë fitar gë eter ed ri bame gë ɓëxarëk ɓëreɓën el
and nëcëtëgu këmëni gër ebar ed Misëra aŋ.
Ɓën ɓayik ax tëf ex na ɓapela ɓand eter elo ɓaŋ
ata wëno seɓ këme eɓal ed endeɓën el.
Wëno Axwën an kë yeƴanënd mondako.
10 Do watin eter ed këme ri gë ɓulunda ir Isërayel el.
And kë xuca ɓakey ɓaŋo aŋ, wëno Axwën an ga re këme:
“Gër onden ondeɓën këme xwët ɓacariya ɓandam ɓaŋ,
gër ow̃ëkw oreɓën këme ỹëgw.
Wëno Kaxanu ireɓën këme hi
do ɓën eni gi ɓulunda iram.” 11 Gaɓatak aŋo ñana na eŋo tëƴalind, ar angol amat gë mëŋ an,
Gaɓatak aŋo ñana na eŋo pelënd imaỹe indexëm iŋ:
“Wëj nangëlo Axwën an.”
Enimin ɗek fo këne nang,
hik oɓaŝ ol, hik ɓëxarëk ɓën.
12 Gayikwa axaỹënan ke xaỹënan xali mëni teɓan ɓetëmbak ɓendeɓën ɓeŋ,
do ame ñana na me kwitand
ɓeñëŋënax ɓendeɓën ɓeŋ✡ 8.12 Yeremi 31.31-34.»
13 Gayikako Kaxanu w̃acëk eter ekinëm el «Eter ekaŝax», eñanar el anëka xarëk. Xarak aye nang këne er xarëk in anemi kë nemind.