1 Wem fei lepe, wem Pita lire Jon wala tirpepe mete, mete piti peptawio Ma Ili siye, pire yalu pau liti lontoluwo winem liti Ma Ili pire Sadyusi pe pepi pau. Pe pau falenge. (Mete piti Sadyusi linaulipe il piti mete nou peilo wem pe pa.) 2-3 Pau falenge fei, pe enke olpe pasienge wusoli te rounge teptalo mete tire il piti Jisas wem le nou leilo le pe ma retai polpepei, pa ma nou peilo. Le pe pengeleinge pautingi tifei winem oli ma nolowi wo, wusoli ningli ma mulpouye. 4 Wolo mete wuru fei pingitepe il pepe pe pulpope le mete fei pepe wurutei pe fale watafei 5,000.

5 Nolowi pire mul mete lipi piti peptawio Ma Ili siye pire mete piti pinuwepe re mete piti peptalo il lipi pau peifo nemple pifei Jerusalem. 6 Le mete fei pepei pau pire metine ili liti leltawio Ma Ili siye nange lele Anas. Le lau lire Kaiafas re Jon lire Aleksander le ilepe pe alpe piti metine ili lepei. 7 Leye lo pe pautetei mete titi tingowo Jisas tile. Leye lo pe pouteteiye “Ise rounge yeila metine ire olpe lepei yolomen? Le singe peise rounge fei polomen so ise rounge yingepe pepe? Le nange liti mi so ise rounge yiri lepe?”

8 Riri Teingi lau lunkuwo Pita lirkilau, leye lo le namti lirpepeye “Fei ise mete amare lipi yire mete piti yinuwepe mete, 9-10 wuso ise fei yeitouku yire towa teingi fei falowo metine ire olpe, le piti polomen le fale teingi. Le fei ise yire mete piti Israel ma yiretai yolpepei, metine fei lile lepei, singe piti Jisas Krais liti Nasaret wuso isotei yaltei laitei nimpe, wolo Ma Ili nou leila tani tulum liti pa lepe. So le weisi metine lepei fale teingi. 11 Wuso il paitei yousi piti Ma Ili pirpeiye,

‘Nimpe liti yaltei winem tupe lifei, wolo ise yinauli lepe, fei le fale nimpe teingitei liti lila winem.’

Le fei Ise yinauli Jisas watafei nimpe lepei wolo Ma Ili laltei le Metine Ili louku. 12 Wusoli le loteteiye miso kanouku mratei mingi wem wem, le nange fei lepei so Ma Ili laltei watepe mete pepe. Wusoli metine nele liti tef lepe ma watafei le, soma le kanouku wolo olotei.”

13 Wem pe puluwenge Pita lire Jon tirkilau tirpei le pe puluwenge retange polpepei, te mete titi uf, leye lo pe retai te rounge tire Jisas pepi pesio towa le pe il re pirpei koloye. 14 Wolo pe ma pirpei il men, wusoli pe puluwo metine wuso fale teingi lepe lire Pita re Jon pepi pile. 15 Leye lo pe pirpepe Pita lire Jon re metine fei lepe naro pe tani winem leinginim fei mete lipi pifei pepe, leye lo pe poteteiye pifei pirpei nemple.

16 “Fei ku ma kali men mire mete fei pepei?” pe pifei peite nemple ye. “Wusoli mete wuru pratei uf ili Jerusalem pretai towa ili fei lotei fale lepei te kanio metine ire olpe. Ku mire metine fei kanio fale teingi lepe, le ku ma maplingi molomen? 17 Wuso ku mirpolo towa lepei ma loungo rufro kolo le mete wuru pretawo kolo, ku ma mirpenge mete fei tepei ma nou tirpepe mete tire il piti Jisas kolo, oloye. Ma tusa towa fei lepe latoye.”

18 Leye lo pe nou pinange tinki te, le pe pirpenge il singe polpepei, te ma nou tirpepe lo teptalo il tire nange liti Jisas pato. 19 Wolo Pita lire Jon namti tirpepeye, “Kuna isotei yirpei yingitei isotei. Le ise yirpolo ku ma wingiteise lo, ku ma wingitowo Ma Ili? 20 Wusoli ku ma wusa towa fei ku kutou lutepe le ku wingitepe ma pato kolo.”

21 Leye lo mete lipi pirpenge il singe piti ma te rounge tolpepe pato, leye lo pe pusange te. Le pe miso perengape il pal piti ma watenge moingi kolo wusoli mete wuru pe peila nange liti Ma Ili pire towa teingi fei fale lepe. 22 Le metine wuso le fale teingi lepe, le ratei le taurungu pele wurutei punwei fale watafei 40.

23 Wem fei lepeye, wem pe paisinge rounge te Pita lire Jon nou karepe mete pelnge piti pulpowo te, le te tirpepe il wuso mete lipi piti peptawio Ma Ili siye pire mete piti pinuwepe pirpei pepe. 24-25 Leye lo wem pe pingitepe pe mete wuruye fei pepe peletei Ma Ili piti kaniepe le pe pirpei polpepei “Ye Yaitei liti altei teplai lire tef re periai fale pire men nange pasiepe, le ye asi Riri Teingi lau lirpei fale nemi liti metine liti lesio towa leiye mani louku Devit, le lirpei lolpepei,

27 Fei il piti mani louku Devit fale punkomye, wusoli Herot lire Pontius Pailat rounge tau tire mete piti Israel re mete nemple peifo nemple pifei uf ili pirpei il pingio Jisas piti ma palpo, le metine teingi liti lesio towa leiye. Le ye yotei altei watafei metine ili. 28 Wolo mete lipi pau peifo nemple pingi tisi wuso ye yotei altei lire singe peiye, pe palpo la. 29 Wolo fei, Ma Ili, ye yotei ma ingitouku le ku mirpeiye piti pe polomen polomen pirouku le ye altei singe leiye lau ku mete peiye piti mesio towa leiye, soma il pal pile yaupe wem ku meptalo. 30 Fei ye yotei ma kaniepe mete kaninu re moingi falepe eilape pe fale teingi. Ye kaniepe nomnaipe soma mete puluwepe singe peiye. Le ye ma aptei singe lipi fale ire nange teingi liti metine liti lesio towa leiye nange lele Jisas.”

31 Wem pe peletei Ma Ili ma kaniepe fei le, pe puluwo tulum fei pifei lepe watafei maiene lini. Leye lo Riri Teingi lau lunkuwepe, le pe peifale pirkilau pile peptalo il piti Ma Ili. 32 Fei le mete piti pulpowo, enke pelpe fale nenpeiyeye le metine nele miso leifale lirpolo men nange pele kolo, pe kapi wainemple. 33 Le mete piti pingowo Jisas pire singe lipi pe pile peptalo il piti Jisas le nou leilo lepe. Le Ma Ili le lailelepetei, le mete re paptepe mingim. 34-35 Le mete wuso winangou wuru pire tef pe paptei pe le mete paisepe, leye lo pe kapi mole pilape pau weisipe paptei pe watepe mete piti pingowo. Leye le, mole fei pepe pe kapi watepe mete piti pe mole yini olo. Pe fei polpepei metine miso men nange olo kolo.

36-37 Fei Josep ninge paliene liti Livai, pila ratei Saiprus, le mete piti pingowo pinawo polpepei Barnabas (il pal piti nange fei lepei, metine liti lalpope weli). Le laltei tef lele le mete paise le le kapi mole lilape lau weisipe watepe mete piti pingowo, watepe yalipe.