1 “Duen menge minahan he zutun egketuredu is menge pelata, wey zuen menge lugar he zutun edtunawa is menge vulawan. 2 Is putew egkekuwa puun te tanà, ne is brunsi edtunawen puun te vatu. 3 Egamit is menge etew te sulù su para kenà sikandan merusiremi is egkalut diyà te utew zizalem he vahin te tanà. Egkalut dan te menge vatu ziyà te kinezizeleman. 4 Egkalut dan te veyeey ziyà te minahan, diyà te lugar he wazà ubpai wey wazà beyai te menge etew. Ebpenaug dan pinaaǥi te menge pisì he edsayugsayug. 5 Diyà te zivavew he tanà edtuvù is menge pinemula he ebpuunan te keenen, piru ziyà te zizalem kayi henduen be te mibpurma te hapuy. 6 Is menge vatu zutun duen menge sapiru ne is eliyavuk dutun duen menge vulawan. 7 Is menge veyeey pehendiyà te minahan, wazà maahà te menge uwak etawa menge banug, 8 wey wazà egkeveyaan dutun te zumezaas he menge langgam etawa erimaung. 9 Egkeluten te menge etew is kinezesenan he menge vatu minsan diyà te zizalem he vahin te menge vuntud. 10 Ebudsiyan dan is dezekelà he menge vatu, su para zuen dan egkeveyaan, ne egketuredu zan is nekedseselekawà he klasi te mahalen he menge vatu. 11 Egkalut dan te ebpuunan te menge wahig, ne ed-uwiten dan diyà te merayag is nekeeles dutun he menge ketiǥeyunan.

12 “Piru hendei ves egkaahà is ketau wey kedsavut? 13 Wazà metueni te etew ke hendei heini egketuredu. Kenà heini egketuredu kayi te kelibutan. 14 Kenà daan heini egketuredu minsan diyà te kinezizeleman te zaǥat. 15 Kenà heini egkepemasa te vulawan etawa selapì. 16 Kenà ebpekerepeng te vali kayi is bali te lunsey he vulawan etawa mahalen he menge vatu he uniks wey sapiru. 17 Lavew pa heini te vulawan etawa kristal. Kenà heini egkeliwaan te elahas he vulawan. 18 Is bali kayi lavew pa te vali te paǥang, haspi, etawa rubi. 19 Kenà heini egkerepengan te tupasyu he ebpuun diyà te Etiopia, wey kenà heini egkepemasa te lunsey he vulawan.

20 “Ne hendei ves egkaahà is ketau wey is kedsavut? 21 Wazà linimbag he egeǥehinawa he ebpeketuredu kayi minsan pa is menge tagbis. 22 Minsan diyà te lugar te kezeetan he iyan is lugar te menge minatey ne vinèbeelan dà he tudtul mehitenged kayi is nezineg diyà. 23 Megbevayè dà is netau ke hendei egketuredu is ketau. 24 Su egkeehè din is minsan diyà te utew meziyù he vahin te kelibutan, ne egkeehè din is langun diyà te sihung te langit. 25 Hein inhiyup din is keramag, wey hein midsukud din ke sengemenu kezekelà is uzan he ibpetanè din, 26 wey hein midisisyunan din ke hendei zin ibpetanà is uzan wey ke hendei zin ibpevayà is kilat he egkezumahan te ruǥung, 27 iyan haazà timpu te kebpaahaa zin te ketau wey is ikemahal kayi. Migezaman din heini ne nekeuyun sikandin. 28 Ne migkaǥi sikandin diyà te menge etew te, ‘Egkehimu he zuen niw ketau wey kedsavut emun edtehuzen niw is Nengazen wey edlikey kew te mezaat he ulaula.’ ”