1 Iyan heini lalag he mehitenged te Babilonia he impehayag te Nengazen diyà te ki Isaias he anak ni Amoz:

2 Ivayew is sevaha he bendirà diyà te puntur te mehiǥawan he vuntud. Ne zutun kulehia niw te mezaǥing is menge sundaru ne uyawi niw sikandan wey zan mekesurung duen te menge pultahan te inged te menge dungganen he menge etew. 3 Midsuǥù ku en is pinilì ku he menge sundaru te kedsilut te menge etew he egkeepesan ku. Heini he menge sundaru nengelipey sikandan su edsarig dan he edhimuwen ku heini he kedsilut.

4 Pemineǥa niw is keǥurub diyà te menge vuvungan te utew mahabet he menge etew. Pemineǥa niw is keǥurub diyà te menge ginhedian wey menge nasyun he edtiǥum. Edtiǥumen te Nengazen he Mekeǥeǥehem is menge sundaru zin he para te tebek. 5 Ebpuun sikandan diyà te utew meziyù he menge lugar. Edezeetan te Nengazen wey te menge sundaru zin is tivuuk he tanà.

6 Sineǥew kew su hapit en is andew te Nengazen, kes andew te kebpendezaat te Mekeǥeǥehem he Megbevayà. 7 Dutun he timpu eguyaan is langun he menge velad. Egkaawà is kevurut te langun he menge etew. 8 Egkerkeren sikandan tenged te kegkahandek. Egkeǥezam dan is utew mesakit; iring dan te vahi he ebeliliten. Ebpetengtengtengà sikandan he egkengehilewhilew su egkengeeled. 9 Pemineg kew! Egkeume en is andew te Nengazen, is andew te kegkaid wey utew zekelà he pauk. Edezeetan is tanà taman te kenè en egkeubpaan, ne ragkes en he edezeetan is mekesesalà dutun. 10 Kenè en ed-anlag is menge vituen. Egawas is andew he merusirem, wey minsan is bulan ne kenè en ed-anlag.

11 Migkaǥi is Nengazen te, “Ebpeeǥiyan ku te limas is kelibutan tenged te kelelalung kayi, wey is menge mekesealà tenged te salè dan. Ibpeengked ku is menge gelbuwen, wey is menge mepelevawen he wazè dan hizu. 12 Deisey zà is egkesamà he menge etew. Edhuna pa he mereǥen is kebpen-ahà kandan kenà te lunsey he vulawan he ebpuun diyà te Ofir. 13 Edhuyungen ku is langit wey is kelibutan. Ebeelan ku heini zutun te andew he ibpeehè ku is utew ku kegkepauk.”

14 Is menge midlangyew ziyà te Babilonia ebpemelaǥuy he ebpemenlikù diyà te menge lugar he ebpuunan dan ne henduen be te selazeng he ebpendel-asen. Ed-ulì dan he henduen be te kerehidu he wazè duen ebantey. 15 Is kada egkezekepan ne edresayen pinaaǥi te ispada taman te ebpatey. 16 Edrunteken is dezeisey pa he menge anak dan diyà te etuvangan dan. Egkuwaan is menge azen dan diyà te menge valey zan ne edleyuǥen is menge esawa zan.

17 Pemineg kew! Ibpesurung ku is menge tig-Babilonia te menge tig-Media he kenà ebpevayad te pelata wey vulawan. 18 Ebpenhimetayan dan pinaaǥi te panà is menge vetan-en diyà te Babilonia. Kenè dan egkehizuwan is menge vatà wey minsan is peririǥè pa. 19 Edezeetan ku iring te Sodom wey Gomora is Babilonia; iyan heini utew mekempet he ginhedian te langun, bentuǥan heini wey zekelà is dengeg te menge meǥinged kayi. 20 Ne kenè en heini egkeubpaan minsan keenu. Wazà Arabo he ebangun te tulda zin dutun. Wey wazà daan ebantey te menge kerehidu he ebpepenabtab te menge kerehidu zin dutun. 21 Egkehimu zà heini he ubpeey te menge leew he menge langgam. Is menge valey zan egkehimu zà he ubpeey te menge ekang wey zuma pa he langgam. Edlinglingketew zutun is leew he menge kambing. 22 Is menge langgam he henduen be te menge asu, ne edtaul ziyà te menge turi wey menge turuǥan dutun te Babilonia. Meǥaan en is ketepusan te Babilonia; kenè en heini egkeuǥet.