1 Migkaǥi is Nengazen diyà te ki Moises te, 2 “Pevaal ka te zezuwa he trumpita he pelata ne ǥemita nu heini te kedtiǥuma te menge etew wey kebpaandam kandan te kedhipanew. 3 Emun ibpedredsà te ebpezaǥing haazà is dezuwa he trumpita ne edtiǥum is langun he menge etew ziyà te ǥemawan duen te Tulda he Edtelevukaayan. 4 Emun sevaha zà is ibpezaǥing, ne iyan dà is menge pengulu te kada tribu is edtiǥum diyà te etuvangan nu. 5 Emun ibpezaǥing haazà is trumpita te para te kebpaandam te menge etew te kedhipanew, is tribu he ziyà megkampu te zapit te edsilaan duen te Tulda ne iyan medhuna medhipanew. 6 Ne emun ikezuwa he kebpezeǥinga zuen te trumpita, ne iyan en maan megenat is tribu he egkezivavà duen te Tulda. Is kebpezeǥinga kayi iyan tuus te kebpeǥenata kandan. 7 Piru selakew is kebpezeǥinga zuen te trumpita emun ibpetiǥum sikandan.

8 “Iyan dà is menge kevuwazan ni Aaron he menge memumuhat mebpezaǥing duen te menge trumpita. Heini he sulunuzen, kinahanglan he edtumanen niw wey te menge kevuwazan niw taman te taman.

9 “Emun diyè kew en te tanè niw, ne ebpekidtebek kew te menge kuntada niw he edrasey keniyu, ipezaǥing niw is menge trumpita su para siak is Nengazen he Megbevayè niw, egketenuzan ku sikiyu ne edlibriyen ku sikiyu te kedezaat te menge kuntada niw. 10 Emun timpu te kedlipey niw zutun te kedsilibra niw te menge pista te netendek he timpu te kebeeli zuen, ragkes en is Pista te Kebpuun te Hayag–pezaǥing niw is menge trumpita emun ebpemuhat kew te menge pemuhat he edtutungen wey pemuhat he para te meupiya he kedepità. Heini he menge trumpita ebpetanudtanud kediey te Megbevayè niw te kebpekid-uyun ku keniyu. Iyan a Nengazen he Megbevayè niw.”

11 Hein ike-20 he andew te ikezuwa he vulan, te ikezuwa he tuig puun te kegawas te menge Israilihanen diyà te Ehipto, midhendiyà te zivavew sikan is gapun duen te Tulda he Ed-ezapan he zutun itaǥù sikan is Kesuǥuan. 12 Ne midhipanew is menge Israilihanen puun te sibsivayan he Sinai ne edhalinhalin te menge lugar, taman te mibpundu sikan is gapun diyà te sibsivayan he Paran. 13 Iyan heini nehuna he timpu te kedhipanew zan, he sumalà te suǥù te Nengazen pinaaǥi ki Moises. 14 Is grupu he midhuna he uwiten dan is bendira zan iyan is grupu he ebpenguluwan te tribu ni Juda. Is pengulu zan iyan si Nashon he anak ni Aminadab. 15 Is tribu ni Isacar mibpenguluwan ni Netanel he anak ni Zuar. 16 Ne is tribu ni Zebulun mibpenguluwan ni Eliab he anak ni Helon.

17 Hein netines en sikan is Tulda he Ed-ezapan, midtival en heini te menge kevuwazan ni Gershon wey menge kevuwazan ni Merari. Ne midtinundug sikandan medhipanew.

18 Ne is midtinundug kandan he ed-uwit te bendira zan iyan is grupu he ebpenguluwan te tribu ni Reuben. Is pengulu zan iyan si Elizur he anak ni Shedeur. 19 Is tribu ni Simeon mibpenguluwan ni Shelumiel he anak ni Zurishadai. 20 Ne is tribu ni Gad mibpenguluwan ni Eliasaf he anak ni Deuel.

21 Ne midtinundug kandan is menge kevuwazan ni Kohat he ed-uwit te segradu he menge gelemiten duen te Tulda he Ed-ezapan. Kinahanglan he igkepelastar en sikan is Tulda te kenè pa sikandan ebpekeuma ziyà te lugar he egkempuwan dan.

22 Ne is midtinundug kandan he ed-uwit te bendira zan iyan is grupu he ebpenguluwan te tribu ni Efraim. Is pengulu zan iyan si Elishama he anak ni Amihud. 23 Is tribu ni Manase mibpenguluwan ni Gamaliel he anak ni Pedazur. 24 Ne is tribu ni Benjamin mibpenguluwan ni Abidan he anak ni Gideoni.

25 Is kinehuziyanan he midhipanew he ed-uwit te bendira zan iyan is grupu he ebpenguluwan te tribu ni Dan. Iyan sikandan nehimu he vantey ziyà te egkeiniyuǥan he para te langun he grupu. Is pengulu zan iyan si Ahiezer he anak ni Amishadai. 26 Is tribu ni Asher mibpenguluwan ni Pagiel he anak ni Ocran. 27 Ne is tribu ni Naftali mibpenguluwan ni Ahira he anak ni Enan.

28 Iyan heeyan kebpekedezepità te menge grupu te menge tribu te Israel dutun te kedhipanew zan.

29 Ne migkaǥi si Moises diyà te ki Hobab he uyang din he anak ni Reuel he Midianhen te, “Edhendiyè key en te lugar he migkaǥi te Nengazen he ibeǥey zin kenami. Umbe zuma ka kenami ne kenè dey sikew ebey-anan, su midsaad is Nengazen he edtuvazan din is Israel.” 30 Piru midtavak si Hobab te, “Kenà a. Edlikù a kayi te kediey he lugar wey ziyà te menge emurè ku te inged.” 31 Migkaǥi si Moises te, “Emun egkehimu ne kenè key kenikew ewai. Iyan ka netau ke hendei is meupiya he egkempuwan dey ziyà te sibsivayan. Iyan ka giya kenami. 32 Emun eduma ka kenami ebehinan dey sikew te langun he keupiyaanan he ibeǥey te Nengazen kenami.”

33 Umbe, mid-awà sikandan puun te vuntud te Nengazen ne midhipanew sikandan seled te tetelu he andew. Layun diyà te egkehunaan dan sikan is Kavan te Kebpekid-uyun su wey zan meturedu is lugar he egkehimelayan dan. 34 Emun maandew, ziyà sikan is gapun te Nengazen te zivavew zan te edhipanew. 35 Kada ed-uwita sikan is Kavan te Kebpekid-uyun, egkaǥi si Moises te, “Sigi en, Nengazen, gurigawa nu en is menge kuntada nu. Berakat he mebpemelaǥuy sikandan.” 36 Ne kada idsavuk sikan is Kavan te Kebpekid-uyun, egkaǥi si Moises te, “Nengazen, likù ke en kayi, te utew mezakel he menge etew te Israel.”