1 Is menge lalag kayi he libru, ne mehitenged te Nineve. Impahayag heini te Nengazen diyà te ki Nahum he tig-Elkosh.

2 Kenà igkesuat te Nengazen he Megbevayà is ked-azap te menge etew te zuma he menge ed-ezapen. Nepeukan din is menge kuntada zin ne ebelesan din sikandan. 3 Kenè sikandin melemu he egkepauk, piru mekeǥeǥehem sikandin ne edsilutan din is nekesalà. Emun edsaǥad sikandin edselenuhug is keramag wey ebpemagyu. Is menge ǥapun henduen dà te eliyavuk diyà te menge paa zin. 4 Pinaaǥi te kebmandù din ne egkemezahan is menge zaǥat wey menge wahig, egkengeǥangu is menge pinemula ziyà te Bashan, diyà te Buntud he Carmel, wey ziyà te Lebanon. 5 Diyà te etuvangan din egkehuyung is kelibutan, ragkes is menge vuvungan, wey ragkes he egkerkeren is menge etew kayi te kelibutan. 6 Hentei is ebpekeeguwanta emun utew egkepauk is Nengazen? Emun duen din egkepeukan ne henduen be te edrepu sikandin te hapuy, ne ebpememeka is menge vatu ziyà te etuvangan din.

7 Meupiya is Nengazen; melig-en sikandin he eputà emun timpu te kelised, ne ed-elimahan din is edangep diyà te kandin. 8 Iring sikandin te meseleg he zalem su ed-eminen din edezeeti is menge kuntada zin. Edel-asen din is menge kuntada zin taman te egkengepatey zin sikandan. 9 Sikiyu is menge tig-Asiria, ke hengkey is mezaat he pelanu niw ziyà te menge etew te Nengazen, ne id-awà heeyan te Nengazen, ne kenè ne heeyan egkeuman-uman. 10 Iring kew te etew he nelangut he nesepinit diyà te zuǥiyen he zezeisey he kayu. Edezeetan kew iyan iring te ebinsulan he reǥami. 11 Is sevaha te menge pengulu niw ne mibpelanu te mezaat he idezaat din te menge etew te Nengazen. Mezaat is insambag din.

12 Iyan heini migkaǥi te Nengazen diyà te menge tig-Juda: “Minsan mahabet wey mezesen is kuntada niw he menge tig-Asiria, edezeetan ku sikandan taman te egkahanew sikandan. Minsan te midrasey ku sikiyu ne kenè ku en heini ed-umanan ebeeli. 13 Su ǥuntaan egeuzen ku en sikiyu puun te ǥehem te menge tig-Asiria.”

14 Iyan heini migkaǥi te Nengazen diyà te menge tig-Asiria: “Id-awè ku is menge kevuwazan niw wey edezeetan ku is ledawan he kayu etawa mital ziyà te simbahan he ed-ezapan niw te menge ed-ezapen niw. Ed-endamen ku en is menge edlevengan keniyu su kenè kew ereg he egkeuyag.”

15 Tengtengi niw is menge tig-Juda! Duen menge menunudtulà he ed-abley ziyà te menge vuvungan su edtudtulan kew zan te meupiya he tudtul he zuen en kelinew ziyà te lugar niw. Umbe silibraha niw en is menge pista niw ne tumana niw is menge penaad niw ziyà te Nengazen. Su is lalung he menge etew ziyà te nasyun he Asiria kenè en maan ebpekesurung keniyu, su ebpurungan ku sikandan edezeeti.