1 Migkaǥi is Nengazen te, “Pinuu ka ziyà te tanà, Babilonia. Pinuu ka he wazè nu pinuuwà te kedhadì. Sikew is iring te vahi he wazè pa mehileveti kenè ke en edtewaǥen he mezagwey etawa meredtan. 2 Neuripen ke en guntaan, umbe kuwa ka te ǥelingan ne ǥaling ka te trigu. Iawè nu is lembung nu, ne lislisa nu is bisti nu su para maahà is menge vuvun nu zutun te kedlayun nu te wahig. 3 Egkaahà is kegkelavasi nu ne egkepeel-elezan ka. Ebelesan ku sikew ne kenè ku en sikew egkehizuwan.”

4 Is Menluluwas tew, he iyan ngazan din is Nengazen he Mekeǥeǥehem, iyan Waǥas he Megbevayà te Israel.

5 Migkaǥi pa is Nengazen te, “He Babilonia, pinuu ka he melinawen diyà te merusirem he lugar. Su kenè ke en maan egngezanan te rayna te menge ginhedian. 6 Nepeukan ku is menge etew he ǥaked ku, ne inselikwey ku sikandan. Umbe imbeǥey ku sikandan kenikew, ne wazè nu sikandan mehizuwi. Ne minsan ganì is menge meǥurang en kandan ne midaagdaag nu. 7 Migkaǥi ke pa te is kegkerayna nu ne wazà pidtemanan! Umbe wazè nu en is-isipa heini is mibeelan nu te menge etew ku wey ke hengkey is egkehimu he rimeǥas kayi ziyà te kenikew. 8 Umbe ǥuntaan pemineǥa nu heini, sikew is dekelà is gehinawa zin te kedlipeylipey wey egkeisip nu he wazè en ebpekezezaat kenikew. Migkaǥi ka ziyà te gehinawa nu he iyan ke en Megbevayà, ne wazè en duma gawas kenikew. Mid-isip nu he kenè ke en egkevalu etawa egkeewaan te anak. 9 Piru egketik-ew heini egkehitavù kenikew: Egkevalu ka wey egkaawà diyà te kenikew is menge anak nu. Egkehitavù heini is langun diyà te kenikew minsan mahabet is netuenan nu he kedserumangka wey kedlamat. 10 Minsan lalung ka ne kunaan nu ke wazà ebpekezezaat kenikew su wazà nekaahà kenikew zutun te kedlalunglalung nu. Is ketau wey keuluwanen nu iyan neketazin kenikew, wey midsuǥù kenikew te kegkaǥi te, ‘Iyan a Megbevayà, ne wazè en duma gawas kediey.’ 11 Umbe, ebpekeuma ziyà te kenikew is kezeetan ne kenè nu egketuenan ke ebmenmenuwen nu te edsegseg pinaaǥi te kegkeselemengkiru nu. Ebpekeuma ziyà te kenikew is kezeetan he kenà egkehimu he ebayad ka para med-engked. Ebpeketik-ew ebpekeuma ziyà te kenikew is kezeetan he wazè nu isipa. 12 Sigi, ipelaus nu en is kegkeselemengkiru nu wey lamat he ebeelan nu puun te vatè ke pa. Kela ke mebmezeeǥen ka, etawa egkahandek is menge kuntada nu. 13 Emun edtepulen ke en te mahabet he egkesuatan nu te ebaal, ne peuǥup ka te menge etew nu he menge memimituen wey menge menenagnà he kada vulan is kedtegnaa zan te egkehitavù kenikew. 14 Benar iyan, iring dà sikandan te reǥami he melemu zà egkevinsuli. Kenà ganì sikandan ebpekelibri te keugelingen dan wey zan kenà metutung. Heini he hapuy kenà egkehimu he edhizezangan su utew meinit. 15 Ne hengkey is egkehimu te menge etew he ebuyuan nu te sambag puun te vatè ke pa? Ne netazin is kada sevaha kandan ne kenè dan ebpekelibri kenikew.