1 Si Ahaz he anak ni Jotam wey apù ni Uzia, hein hadì sikandin diyà te Juda, duen midsurung diyà te Jerusalem. Is nenurung iyan si Hadì Rezin he hadì te Aram wey si Hadì Peka he hadì te Israel, he anak ni Remalia. Piru wazè dan maaǥew is Jerusalem.

2 Ne hein nezineg te hadì te Juda he midsevaha is Aram wey Israel, migkerker sikandin wey is menge etew zin tenged te kegkahandek. Migkerker zan iring te menge kayu he egkehuyung te keramag.

3 Ne migkaǥi is Nengazen diyà te ki Isaias te, “Dumaha nu is anak nu he si Shear Jashub ne sinuǥunga niw si Ahaz diyà te netemanan te zal-ug diyà te zivavew he peneng, dutun te kilid te zalan pehendiyà te lugar he pemìpiey. 4 Ne iyan heini keǥiya nu kandin, ‘Pengandam ka! Ipehulenè nu is gehinawa nu wey kenè ka mahandek. Kenè ka mebpekulbà tenged dà te utew kegkepauk ni Hadì Rezin he hadì diyà te Aram wey ni Hadì Peka he anak ni Remalia. Heini sikandan, iring dà te zezuwa he tued he ed-evel piru wazà duen hapuy. 5 Mibpelanu sikandan te kedezaat kenikew. Ke sikandan te, 6 “Edsurungen ta is Juda ne edaaǥen ta. Ebehinen ta is tanà kayi ne iyan ta ibpahadì duen is anak ni Tabeel.”

7 “ ‘Piru migkaǥi is Nengazen he MEGBEVAYÀ te kenà heeyan egkehitavù. 8-9 Su is Damascus iyan dà kepital te Aram, ne si Rezin, diyè dà sikandin midhadì te Damascus. Ne is Samaria iyan dà kepital te Israel, ne si Peka he anak ni Remalia ziyè dà sikandin midhadì te Samaria. Egkezeeten is Israel seled te 65 he tuig, umbe kenè ne heini egketawag he sevaha he nasyun. Emun kenà melig-en is kedtuu niw ne egkezeetan kew iyan.’ ”

10 Dutun mid-uman megkaǥi is Nengazen diyà te ki Ahaz te, 11 “Buyù ka te tuus kayi te kediey, te Nengazen he Megbevayè nu he ebpenistiǥus he edtumanen ku is impenaad ku. Ibeǥey ku minsan pa ke haazà is tuus diyà ebpuun te zizalem, he ziyà te iveyaan, etawa ziyà te zivavew, diyà te langit.” 12 Midtavak si Ahaz te, “Kenà a ebuyù te tuus. Kenè ku egezaman is Nengazen.”

13 Migkaǥi si Isaias te, “Pemineg kew is menge kevuwazan ni David! Kenè be subre en is kebpetigkerà niw te menge zuma niw he menge etew? Ne ǥuntaan iyan niw en maan ibpetigker is Megbevayè ku! 14 Umbe iyan mismu is Nengazen ebeǥey keniyu te tuus. Ne iyan heini tuus: Ebmeǥingey is betan-en he vahi ne ed-anak te maama. Ne egngezanan din haazà is batà te ‘Emmanuel.’ 15 Gatas wey teneb is egkehimu he keuyaǥan kayi he vatà taman te egketeǥuan en te hustu he isip. 16 Ne te kenè pa sikandin egketeǥuan te hustu he isip, is tanà duen te zezuwa he hadì he igkahandek nu, Ahaz, egkezeeten ne ebey-anan dà heini. 17 Diyà te huziyan he timpu, sikew wey is menge etew nu, ragkes en is lavew he pemilya nu, ibpesurung te Nengazen te hadì te Asiria. Ne egkeseǥazan niw is kelised he wazè niw pa keenu meseǥazi puun te kebpekidsivayà te Israel te Juda.

18 “Dutun he timpu, ebpemunsuwit is Nengazen he ed-umew te menge tig-Ehipto wey tig-Asiria. Ne ebpekeuma is menge tig-Ehipto he henduen be te menge langew he ebpuun diyà te meziyù he menge wahig diyà te Ehipto, ne ebpekeuma zaan is menge tig-Asiria he henduen be te menge petiyukan. 19 Ebpekeuma heini sikandan ne ed-ubpè dan diyà te minsan hendei: diyà te merusirem he menge zal-ug, diyà te vudsi te zezekelà he menge vatu, diyà te zuǥiyen he zezeisey he kayu, wey ziyà te menge penebtavà.

20 “Dutun he timpu, egemiten te Nengazen is hadì te Asiria te kebpurung kedezaat te tanè niw. Iring sikandin te men-aalut he ebpuun te ziyà layun te Wahig he Eufrates he midsuhulan te kegkiskis te vulvul niw, berehibu niw, wey ragkes en is sumpè niw.

21 “Dutun he timpu, is egkeelimahan te menge etew tigselimbaha zà he zumeraǥa he vaka wey zezuwa he kambing, 22 ne iyan dà haazà egkuwaan dan te ǥatas. Gatas wey teneb is egkehimu he keuyaǥan te langun he egkesamà diyà te Juda. 23 Dutun daan he timpu, is pemuleey te paras he zuen duen 1,000 he puun he 1,000 he pelata is bali zin egkeeneb te zuǥiyen he zezeisey he kayu ne ebmeribpesen en heini. 24 Ebpenuǥes is menge etew zutun he uwiten dan is menge panà wey vangkew zan, su geina te meribpesen en heini he neeneb te zuǥiyen he dezeisey he kayu. 25 Wazè en edhendiyà te menge vuvungan dutun he hein aney ebpemulaan, su ǥeina te neeneb en heini te zuǥiyen he zezeisey he kayu. Egkehimu zà heini he penebtavà te menge vaka wey menge kerehidu.”