1 “Penenglitan, egkehitavù diyà te keniyu heini is menge tuvad wey menge rawak he nekaǥi ku ziyà te keniyu ne egketenuzan niw heini ke ziyè kew en te menge nasyun he impevihag kew kandan te Nengazen he Megbevayè niw. 2 Ne emun ebpekid-uliey kew wey is menge anak niw te Nengazen he Megbevayè niw, ne edtumanen niw te kedtuman he ebpuun diyà te tivuuk he gehinawa niw wey kedsavut niw is langun he insuǥù ku keniyu ǥuntaan, 3 egkehizuwan kew te Nengazen he Megbevayè niw. Edtiǥumen kew zin puun te langun he menge nasyun he zutun kew zin ipevihag, ne zutun idlikù din is meupiya he kebpekesavuk niw. 4 Minsan diyè kew zin pa segseǥa te kinemeziyuan he parti te kelibutan, edtiǥumen kew ǥihapun te Nengazen he Megbevayè niw. 5 Ne ibpelikù kew zin diyà te tanà he ǥaked te menge kepuun niw, ne ed-umanan niw heini ed-engkena. Subra pa is kebpeuswaǥa wey kebpekehebeta zin keniyu te kebpeuswaǥa wey kebpekehebeta zin te menge kepuun niw. 6 Ebeǥuwen te Nengazen he Megbevayè niw is menge ǥehinawa niw wey is menge ǥehinawa te menge kevuwazan niw su para mahala niw sikandin te ebpuun diyà te tivuuk he ǥehinawa niw wey kedsavut niw, ne egkembuwayan kew. 7 Ibpeseǥazan te Nengazen he Megbevayè niw te menge kuntada niw he midumut wey midaagdaag keniyu sikan is menge rawak. 8 Ne ebpezumdumahan niw en maan is Nengazen ne edsunuzen niw en is langun he menge suǥù din he ibeǥey ku keniyu ǥuntaan. 9 Ibpeuswag kew te Nengazen he Megbevayè niw ziyà te langun he menge vaal niw. Ibpemahabet din is menge anak niw, menge uyaǥen niw, wey ibpezekelè din is menge abut niw, su igkelipey en maan te Nengazen is kedtuvad keniyu iring te ingkelipey zin is kedtuvad te menge kepuun niw. 10 Egkeulaula heini emun ebpezumdumahan niw is Nengazen he Megbevayè niw wey edsunuzen niw is langun he menge suǥù din wey is menge sulunuzen he ingkesurat kayi te Libru te Kesuǥuan. Uya, egkehitavù heini emun edlikù kew ziyà te kandin te ebpuun diyà te tivuuk he gehinawa niw wey kedsavut niw.

11 “Kenà mereǥen is kedsevuta wey kebeeli kayi he menge suǥù te ibeǥey ku keniyu ǥuntaan. 12 Kenè kew ebpekeinsà te, ‘Hentei is edhendiyà te langit te kegkuwa keniyan su para ikeseysey ziyà te kenitew su wey tew mesunud?’ 13 Etawa kenè kew zaan ebpekeinsà te, ‘Hentei is edlayun te zaǥat te kegkuwa keniyan su para ikeseysey ziyà te kenitew su wey tew mesunud?’ 14 Heini he menge lalag diyà te keniyu, diyà mismu te vèbè niw wey ǥehinawa niw, umbe egkehimu niw heini te edtuman.

15 “Pemineg kew! Guntaan he andew ibpepilì ku sikiyu kayi: untung etawa kemetayen, keuswagan etawa kezeetan. 16 Ebmenduan ku sikiyu ǥuntaan he mahala niw is Nengazen he Megbevayè niw, pengungubpaan kew he sungkad te menge paaǥi zin, wey tumana niw is menge suǥù din wey is menge sulunuzen. Emun ebeelan niw heini ebpekaangken kew te meupiya he ked-ubpà wey ebmahabet kew, ne edtuvazan kew te Nengazen he Megbevayè niw diyà te tanà he edselezan niw wey niw maangken.

17 “Piru emun kenè kew ebpezumazuma wey edsunud kandin, ne ed-azap kew wey ebpenilbi te selakew en he menge ed-ezapen, 18 ne ebpetizeenan ku en sikiyu ǥuntaan he kenà duwazuwa he egkengezeetan kew. Kenè kew ebmantas duen te tanà he edselezan niw su ed-engkenen niw he ziyà layun te Jordan.

19 “Guntaan he andew ebpengum-umawen ku is langit wey tanà su ibpetistiǥus ku ke hengkey is ebpilien niw kayi: untung etawa kemetayen, tuvad etawa rawak. Pilia niw is untung su para meuyag-uyag kew wey is menge anak niw. 20 Mahala niw is Nengazen he Megbevayè niw. Pezumdumahi niw sikandin wey kenè niw sikandin iniyuǥi, su iyan sikandin untung niw. Emun ed-ul-ulahan niw heini, ebmeluǥayad is untung niw zuen te tanà he impenangdù din he ibeǥey zin diyà te menge kepuun niw he iyan ensi Abraham, Isaac, wey Jacob.”