1 Midsurat si Hadì Nebucadnezar te pahayag he para te langun he nekedseselekawà he menge nasyun, menge kepuun, wey menge kineǥiyan kayi te kelibutan. Ne iyan heini ingkesurat:

“Berakat he mebmeupiya is kebpekesavuk niw.

2 “Egkesuatan ku te edtudtul ziyà te keniyu is menge singyal wey menge egkein-inuwan he menge vaal he mibeelan te Utew Lavew he Megbevayà kayi te kediey.

4 “Emun bahin te kebpekesavuk ku kayi te turuǥan, ne meupiya wey meuswaǥen a. 5 Piru zuen ku teǥeinep he ingkahandek ku wey ingkesemuki ku. 6 Umbe, mibmandù a he zumaha kayi te kediey is langun he memetau kayi te Babilonia su para meseysey zan kayi te kedì is kehuluǥan kayi te teǥeinep ku. 7 Kebpekeuma te menge selemengkiru, menge veyilan, menge menenagnà, wey menge mengingingkuris, ne midtudtul ku ziyà te kandan is teǥeinep ku, piru kenè dan igkeseysey kayi te kedì is kehuluǥan din.

8 “Dutun te huziyan he timpu, midhendiyà si Daniel te kedì. (Migngezanan sikandin te Belteshazar he iyan ngazan te ed-ezapen ku. Ne ziyà te kandin is mulin-ulin te waǥas he menge ed-ezapen.) Midtudtul ku kandin is teǥeinep ku. 9 Ke siak te, ‘Belteshazar, he pengulu te menge selemengkiru, netuenan ku he is mulin-ulin te menge ed-ezapen, ne ziyà te kenikew, ne melemu nu zà egketueni is nekeeles he menge ketutuanan. Iseysey nu kediey is kehuluǥan te menge nelewasan ku ziyà te teǥeinep ku. 10 Iyan heini nelewasan ku hein midlipezeng a: Neehè ku is utew metawis he kayu ziyà te teliwazà te kelibutan. 11 Ne mid-iseg pa heini medekelà wey mebmetawis taman te nekeuma ziyà te langit ne egkaahà heini te tivuuk he menusiyà. 12 Mekempet is menge zahun din wey mahabet is menge veǥas din ne minsan egkaan kayi is langun ne ereg heini. Midhelung kayi is menge langgam wey midsesalag is tagbis diyà te menge subpang din. Ne zutun egkuwa is langun he linimbag te egkekaan dan.’

13 “Ne neehè ku zaan is sevaha he velinsuǥuen he nenaug he ebpuun te langit. 14 Ne ingkulahì din is lalag he edhenduen te, ‘Pilaya niw heeyan is kayu ne penempeza niw is menge subpang din. Pen-ewaa niw is menge zahun din wey ipenimbag niw is menge veǥas din. Buǥawa niw is menge langgam he nemenhelung duen wey is menge tagbis he nenesalag diyà te menge subpang din. 15 Piru vey-ani niw en is tued din diyà te vevesukà he nevedbed te putew wey brunsi.’

“Is etew he impetug-iring duen te kayu, ne layun egkahames te zehemug ne ebpenabtab sikandin te sagbet duma te menge langgam. 16 Ne seled te pitu he tuig ne egkaawà diyà te kandin is isip te etew, ne is isip din egkehimu he isip te langgam. 17 Iyan heini hukum he migkaǥi te menge velinsuǥuen su para metueni te langun he is Utew Lavew he Megbevayà, duen din gehem diyà te menge ginhedian te menge etew. Ne egkehimu ke edhimuwen din sikandan he sakup te minsan hentei he egkesuatan din he mehimu he egalen, minsan pa ke haazà is etew iyan en kineminusan te langun he menge etew.

18 “Ne iyan haazà, Belteshazar teǥeinep ku. Umbe, siak si Hadì Nebucadnezar, egkeǥiyen ku kenikew te, ‘Iseysey nu kedì is kehuluǥan kayi su wazà minsan sevaha zuen te menge uluwanen kayi te ginhedian ku he ebpekeseysey te kehuluǥan kayi. Piru igkeseysey nu mulà heini su ziyà te kenikew is mulin-ulin te waǥas he menge ed-ezapen.’ ”

19 Neipeng wey nahandek si Daniel (he egngenazan daan te Belteshazar) te kegkezineǥa zin dutun te lalag te hadì. Umbe migkeǥiyan sikandin dutun te hadì te, “Belteshazar, kenè ka meipeng tenged te teǥeinep ku wey kehuluǥan din.” Ne midtavak si Belteshazar te, “Mahal he Hadì, meupiya pezem ke is teǥeinep nu wey is kehuluǥen din, ne ziyà egkehitavù te menge kuntada nu ne kenà diyà te kenikew. 20 Is kayu he neehè nu he midekelà wey mibmelayat he nekesungkul ziyà te langit, egkaahà haazà diyà te minsan hendei kayi te kelibutan. 21 Mekempet is menge zahun din wey mezakel is menge veǥas din ne egkekeenan duen is langun. Midhelung dutun is menge langgam wey midseselaǥan te menge tagbis is menge subpang din. 22 Mahal he Hadì, iyan ka haazà is kayu. Su nehimu ka he mekeǥeǥehem ne iring te nekeume en diyà te langit is kegkemekeǥeǥehem nu, ne is kedhadì nu nekeuma ziyà te minsan hendei kayi te kelibutan.”

23 Ne mibpedayun megkaǥi si Daniel te, “Ne elin neehè nu, Mahal he Hadì, is sevaha he velinsuǥuen he mibpenaug he ebpuun te langit he ingkulahì din is lalag he edhenduen te, ‘Pilaya niw heeyan is kayu piru vey-ani niw en is tued din diyà te vevesukà he nevedbed te putew wey brunsi. Ne is etew he impetug-iring kayi he kayu ne layun egkahames te zehemug wey ebpenabtab duma te menge leew he langgam seled te pitu he tuig.’

24 “Mahal he Hadì, iyan heini kes kehuluǥan te neehè nu he ibpesavut te Utew Lavew he Megbevayà is egkehitavù diyà te kenikew: 25 Edsegseǥen ka pehendiyà te meziyù te menge etew ne ed-amur ka te leew he menge langgam. Ne egkeiring ka te vaka su ebpenabtab ka te sagbet wey layun ka egkahames te zehemug. Ne kegketapus te pitu he tuig, ne egkilelaan nu he is Utew Lavew he Megbevayà, duen din gehem diyà te menge ginhedian te menge etew ne egkehimu ke edhimuwen din sikandan he sakup te minsan hentei he egkesuatan din he mehimu he egalen dan. 26 Ne vahin duen te migkaǥi te velinsuǥuen he ebey-anan is tued, ebpesavut haazà he idlikù diyà te kenikew is ginhedian nu emun egkilelaan nu he iyan is Megbevayà edhadì te langun. 27 Umbe, deyzey ke edewaten nu is sambag ku kenikew, Mahal he Hadì: Engked ka he ebaal te salà ne metazeng is beeli nu wey kehizuwi nu is menge pubri. Emun ebeelan nu heeyan ne kela ke ebmeuswaǥen ka ǥihapun.”

28 Is langun kayi neulaula ziyà te ki Hadì Nebucadnezar. 29 Su kedlavey te senge-tuig puun te kedseysaya ni Daniel te kehuluǥan duen te teǥeinep, ne iyan heini nehitavù:

Edhihipanew si Hadì Nebucadnezar ziyà te patag he atep te turuǥan din diyà te Babilonia 30 ke sikandin te, “Utew mekeǥeǥehem is Babilonia he midhimu ku he lavew he inged pinaaǥi te kediey he sigudu wey para te ventuǥan ku.”

31 Ne te wazè pa sikandin mekepasad he egkaǥi, duen laǥeng he ebpuun diyà te langit he edhenduen te, “Hadì Nebucadnezar, pemineǥa nu heini: Midhawì en diyà te kenikew is keǥehem nu te kedhadì. 32 Edsegseǥen ka pehendiyà te meziyù te menge etew ne ed-amur ka te leew he menge langgam. Ne egkeiring ka te vaka su ebpenabtab ka te sagbet. Ne kegketapus te pitu he tuig, egkilelaan nu he is Utew Lavew he Megbevayà, duen din gehem diyà te menge ginhedian te menge etew ne egkehimu ke edhimuwen din sikandan he sakup te minsan hentei he egkesuatan din he mehimu he egalen dan.”

33 Ne segugunà, heini neulaula ziyà te ki Nebucadnezar. Midsegseg sikandin pehendiyà te meziyù te menge etew ne nenabtab sikandin te sagbet iring te vaka. Ne layun sikandin egkahames te zehemug, wey mibmelayat is bulvul zin he iring en te vulvul te kulaǥu ne is sulu zin iring te sulu te tagbis.

34 “Ne kegketapus te pitu he tuig, ne siak, si Nebucadnezar, midangep a ziyà te Megbevayà, ne zutun midlikù is meupiya he ked-isip-isip ku. Umbe midalig ku wey mibeǥayan ku te zengeg is Utew Lavew he Megbevayà he uuyag te wazà pidtemanan. Migkaǥi a te,

36 “Ne hein midlikù en kayi te kediey is meupiya he ked-isip-isip ne inlikù daan kayi te kediey is dengeg wey ventuǥan te hadì. Midawat e en maan duen te menge upisyal ku wey menge megsesambag ku, ne edhunè a pa he mekeǥeǥehem kenà duen te nehuna he kedhadì ku. 37 Umbe, ǥuntaan edeliǥen ku wey ebeǥayan ku te zengeg is hadì diyà te langit, su hustu wey metazeng is langun he menge vaal zin ne ibpekevavè din is minsan hentei he ebpelavew.”