1 Ne sevaha he andew, nenginginsà si David te, “Duen pe be nesamà te pemilya ni Saul he igkepeehè ku kandin is gaǥew ku tenged ki Jonatan?” 2 Impetawag din is sevaha he etew he egngezanan ki Ziba, he suluǥuen dengan te pemilya ni Saul. Hein nekeuma sikandin ne mid-insaan sikandin ni David, “Iyan ke ve si Ziba?” Midtavak sikandin te, “Uya, Mahal he Hadì.” 3 Mid-insà is hadì, “Duen pe be nesamà he pemilya ni Saul he igkepeehè ku kandin is keupiya te Megbevayà?” Midtavak din is hadì te, “Duen pa, kes anak ni Jonatan he maama he nepigket.” 4-5 Mid-insà is hadì te, “Hendei sikandin?” Midtavak si Ziba te, “Diyà te Lo Debar, diyà te valey ni Makir he anak ni Amiel.” Ne midsuǥù si David te ibpekuwa kandin diyà.

6 Is ngazan te anak ni Jonatan ne iyan si Mefiboshet ne apù sikandin ni Saul. Hein nekeuma sikandin diyà te ki David ne midluhud sikandin he edtahud. Migkaǥi si David te, “Mefiboshet?” Ne midtavak sikandin te, “Uya, datù.” 7 Migkeǥiyan ni David sikandin te, “Kenè ka mahandek, su ibpeehè ku kenikew is keupiya ku tenged te amey nu he si Jonatan. Id-ulì ku kenikew is langun he menge tanà te apù nu he si Saul, ne kenà iyan dà heeyan, kekenà, kayi ku en sikew ibpekaan duma kedì.” 8 Midluhud si Mefiboshet ne migkaǥi te, “Hentei e ves is utew nu igkeǥaǥew? Iring e zè man te minatey he asu.”

9 Ne impetawag te hadì si Ziba, he suluǥuen dengan ni Saul, ne migkeǥiyan din te, “Ibeǥey ku ki Mefiboshet, he apù te egalen nu he si Saul, is langun he azen ni Saul wey te pemilya zin. 10 Sikew, is menge anak nu, wey is menge suluǥuen nu iyan edterebahu te tanà para kandin, ne uwita nu ziyà te kandin is menge abut, para zuen egkekaan te pemilya zin. Ne si Mefiboshet mulà iyan ad ebpekaan kandin kayi te kedì.” (Si Ziba ne zuen din 15 he anak he menge maama ne 20 is suluǥuen din.)

11 Migkeǥiyan ni Ziba is hadì te, “Mahal he Hadì, edtumanen ku is minsan hengkey he idsuǥù nu kedì te suluǥuen nu.” Puun dutun, diyè en egkaan si Mefiboshet te ki David he iring te sevaha te menge anak din.

12 Duen anak ni Mefiboshet he maama he egngezanan ki Mica. Is langun he sakup te pemilya ni Ziba ne nehimu en he suluǥuen ni Mefiboshet. 13 Si Mefiboshet is pigket ne ziyè en med-ubpà te Jerusalem ne ziyè en daan layun egkaan duma ki Hadì David.