1 Nehimu he hadì diyà te Israel si Jehoahaz he anak ni Jehu hein ike-23 he tuig te kedhadì ni Joash diyà te Juda te anak ni Ahazia. Diyà te Samaria med-ubpà si Jehoahaz, ne midhadì sikandin seled te 17 he tuig. 2 Mezaat is ulaula zin diyà te etuvangan te Nengazen. Mid-iringan din is menge salà ni Jeroboam he anak ni Nebat, he nehimu he hinungdan te kebpekesalà te menge tig-Israel. Ne wazè din engkezi heini he menge salà. 3 Umbe, nepeukan te Nengazen is menge Israilihanen. Ne meluǥayad he timpu is kebpesekupa zin kandan ki Hadì Hazael he hadì te Aram wey te anak din he si Ben Hadad.

4 Mibpengemuyù si Jehoahaz diyà te Nengazen, ne mibpemineg kandin is Nengazen, su naahà te Nengazen is utew subra he kedlisliseza te hadì diyà te Aram te menge Israilihanen. 5 Mibeǥayan sikandan te pengulu he ebpekepeǥawas kandan puun te kedluplupiǥa kandan te menge tig-Aram. Umbe mid-uman mebmelinew is kebpekesavuk te menge Israilihanen iring duen te nehuna. 6 Piru wazè dan engkezi is ked-iring te menge salà te pemilya ni Jeroboam, he nehimu he hinungdan te kebpekesalè dan. Wazè dan dèdeeti is tukud he simbulu te vahi he ed-ezapen he si Ashera he ziyà te Samaria.

7 Dutun te huziyan he timpu, is nesamà diyà te ki Jehoahaz, iyan dà is 50 he pereuntud te kudà, 10 he kerwahi, wey 10,000 he sundaru, su is duma mibpenhimetayan te hadì diyà te Aram, he henduen be te eliyavuk he midtekutakan.

8 Is duma pa he ǥuǥud mehitenged te kedhadì ni Jehoahaz, wey is nevantug he menge vaal zin wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel. 9 Ne hein minatey en si Jehoahaz, inleveng diyà te Samaria. Ne si Jehoash he anak din, iyan nekeilis kandin te kedhadì.

10 Nehimu he hadì diyà te Israel si Jehoash he anak ni Jehoahaz hein ike-37 he tuig te kedhadì ni Joash diyà te Juda. Diyà med-ubpà te Samaria si Jehoash, ne midhadì sikandin seled te 16 he tuig. 11 Mezaat is ulaula zin diyà te etuvangan te Nengazen. Wazà sikandin med-engked he ed-iring te menge salà ni Jeroboam te anak ni Nebat, he nehimu he hinungdan te kebpekesalà te menge tig-Israel.

12 Is duma pa he ǥuǥud mehitenged te kedhadì ni Jehoash wey is nevantug he menge vaal zin wey is langun he mibeelan din, ragkes is kebpekidtebek din ki Hadì Amazia he hadì te Juda, ne ingkesurat diyà te Libru he Midsuratan te menge Keguǥuza te menge Hadì te Israel. 13 Ne hein minatey en si Jehoash, inleveng sikandin diyà te Samaria, diyà te midlevengan te menge hadì te Israel. Ne is anak din he si Jeroboam II iyan nekeilis kandin te kedhadì.

14 Hein uuyag pa si Hadì Jehoash, nezeruwan si Elisha ne henduen be te ebpatey en sikandin. Midhendiyà si Hadì Jehoash te kandin ne midsineǥew haazà is hadì. Ke si Jehoash te, “Amey ku! Amey ku! Is menge kerwahi wey is menge perekerwahi te Israel!” 15 Migkaǥi si Elisha te, “Kuwa ka te panà wey menge vesut.” Ne midtuman haazà ni Jehoash. 16 Ne migkeǥiyan sikandin ni Elisha he gewezi zin haazà is panà. Ne hein egewezan din en haazà, migewezan ni Elisha is belad din 17 ne migkeǥiyan din te, “Puwasi nu is sulawà he zapit te edsilaan.” Ne mibpuwasan din heini. Ne migkeǥiyan sikandin ni Elisha he mebpanà sikandin, ne mibpanà sikandin, migkaǥi si Elisha te, “Heeyan is besut iyan tuus he ibpezaag kenikew te Nengazen is Aram. Ebpurungan nu edezeeti is menge Aramihanen diyà te Afek.”

18 Mid-umanan keǥiyi ni Elisha si Jehoash he megkuwa te menge vesut. Ne hein nekekuwe en sikandin, migkaǥi si Elisha te, “Penaa nu is tanà.” Ne mibpanè din te ketetelu, ne mid-engked sikandin. 19 Nepauk si Elisha ne migkaǥi te, “Ereg pezem he kelelima etawa keheenem nu penaa su para mepurung nu mezezeeti is menge Aramihanen. Ne tenged te ketetelu ke zà mebpanà, ne ketetelu nu zà daan egkezaag is menge Aramihanen.”

20 Dutun te huziyan he timpu minatey si Elisha ne inleveng.

Kada tuig duen grupu te menge Moabitanhen he edsurung te Israel. 21 Duen timpu he edleveng pezem is menge Israilihanen te minatey. Piru hein neehè dan te grupu te menge Moabitanhen he edsurung, inggaanggaan dan dà iseled haazà is minatey ziyà te surung he midlevengan ki Elisha ne mibpelaǥuy zan. Ne hein nekezegkit haazà is minatey ziyà te menge tulan ni Elisha, neuyaǥan haazà ne midhitindeg.

22 Midaagdaag ni Hadì Hazael he hadì te Aram is menge Israilihanen seled te tivuuk he timpu te kedhadì kandan ni Jehoahaz. 23 Piru ingkehizu wey ingkeipeng sikandan te Nengazen tenged te midhimu zin he kebpekid-uyun diyà te ki Abraham, ki Isaac, wey ki Jacob. Ne taman en guntaan ne wazè din sikandan dezeeti etawa ipaawà diyà te lugar zan he zutun kenà sikandin ebpekepekiduma kandan.

24 Minatey si Hadì Hazael he hadì te Aram, ne si Ben Hadad he anak din iyan nekeilis kandin te kedhadì. 25 Nezaag ni Jehoash is Aram te ketetelu, ne nahawì din diyà te ki Ben Hadad is menge inged he mid-aǥew te amey ni Ben Hadad he si Hazael hein nekidtebek sikandin te amey ni Jehoash he si Jehoahaz.