1 Ne sevaha he andew, migkeǥiyan ni Jonatan kes betan-en he tig-uwit te ǥumaan din te, “Hengkayi ke en, su edhendiyè ki te bentayà te menge Filistihanen su ebpeniid ki.” Piru wazè din ipetukew is amey zin te mibeelan din.

2 Ne te haazà he andew diyà si Saul te sihung te kayu he pumigranata ziyà te Migron, te dulunà te Gibea. Duma is 600 he menge sakup din. 3 Sevaha zutun te sakup din si Ahia he memumuhat, he migkukumbalà te ipud. Si Ahia anak ni Ahitub, he suled ni Ikabud. Si Ahitub, anak ni Finehas. Si Finehas, anak ni Eli he memumuhat dengan te Nengazen diyà te Shilo. Wazà netau te kegenat ni Jonatan.

4 Dutun te zalan he ibayà ni Jonatan pehendiyà te bentayà te menge Filistihanen ne kelendiǥan is pesiziveluyà; is divaluy, ne egngezanan te Bozez, ne is divaluy, ne egngezanan te Sene. 5 Is divaluy zutun he zempilas, ne zapit te zizaya dehipag te Micmash, ne is divaluy he zapit te zivavà, dehipag te Geba.

6 Migkeǥiyan ni Jonatan kes tig-uwit te ǥumaan din te, “Hengkayi ke en, ebeyaan ta is kampu te menge etew he wazà mekekilala te Megbevayà. Kela ke edtevangan ki te Nengazen, su wazà ebpekevelavag kandin emun edhimuwen din he mekezaag is etew, mezakel man wey ke deisey.” 7 Midtavak haazà is tig-uwit te ǥumaan din te, “Beeli nu is egkesuatan nu; duma a kenikew minsan hengkey is egkehitavù.”

8 Migkaǥi si Jonatan te, “Kuwa ke en, edhendiyè ki su ebpeehè ki kandan. 9 Emun egkaǥi zan te teǥazi key su ebpekidtebek dan, kenè ki en edtekezeg, kekenà, edteǥazan ta. 10 Piru emun egkaǥi zan te iyan ki edtekezeg, edtekezeǥan ta sikandan, su iyan tuus haazà he ibpezaag te Nengazen sikandan kenita.”

11 Hein mibpeehè dan is dezuwa te menge Filistihanen, mid-undaunda zà sikandan te menge Filistihanen he egkaǥi te, “Ahaa niw man is menge Hebriyuhanen! Midliǥawang dan en dutun te budsi he ed-elesan dan.” 12 Ne zutun migkulahì dan si Jonatan wey kes sineriǥan din te gumaan, “Tekezeg kew kayi te kenami, su zuen ibpenurù dey keniyu!” Migkeǥiyan ni Jonatan kes tig-uwit te gumaan din te, “Sunud ka kedì su siguradu he ibpezaag en te Nengazen sikandan te Israel.”

13 Mibpenanap si Jonatan ne edsunud kandin kes tig-uwit te ǥumaan din he edtekezeg. Ne mibpenhimetayan din kes menge Filistihanen, ne iyan daan mibeelan te tig-uwit te ǥumaan din. 14 Ne te nehuna he kedsurung dan, ne 20 is nepatey zan he Filistihanen dutun te lugar he tengà he hiktarya is keluag din. 15 Utew nengahandek is menge Filistihanen sikan is dutun te kampu, diyà te vevesukà, diyà te bentayà, wey minsan sikan is nenurung. Ne zutun midlinug, ne utew zan dutun nengahandek.

16 Diyà te Gibea, he sakup te tanà he Benjamin, naahà te menge bantey ni Saul is menge sundaru te menge Filistihanen, ebpemelaǥuy minsan hendei zà ebpekepevayà. 17 Migkeǥiyan ni Saul is menge sakup din te, “Tiǥuma niw is menge sundaru wey ahaa niw ke hentei is naawà.” Netuenan dan dutun he si Jonatan wey kes tig-uwit te ǥumaan din is naawà dutun.

18 Migkeǥiyan ni Saul si Ahia te, “Uwita kayi kes Kavan te Kebpekid-uyun te Megbevayà.” 19 Ne te kemulu ebpekidlalag si Saul zutun te memumuhat mid-iseg is keǥurub diyà te kampu te menge Filistihanen. Umbe migkeǥiyan ni Saul kes memumuhat te, “Kenè nu en insai is Megbevayà.” 20 Ne zutun midtiǥum ni Saul is menge sakup din, ne migenat dan is ebpekidtebek. Neehè dan is menge Filistihanen he egkegurigew su mid-uuney zan mebpehimhimetayà te ispada. 21 Is menge Hebriyuhanen he midtampu ziyà te menge Filistihanen he miduma kandan ne ziyè en maan medtampu te ki Saul wey ki Jonatan wey te zuma pa he menge Israilihanen. 22 Is menge Israilihanen he nemen-eles diyà te vuvungan te Efraim nezineg dan he nemelaǥuy en is menge Filistihanen, ne mid-apil en sikandan he ebpendal-as te menge Filistihanen. 23 Ne zutun nekeume en diyà te Bet Aven is edtebek. Mibpengelinteuwan te Nengazen he mekezaag is menge Israilihanen.

24 Haazà he andew, mibpengguyaan is menge Israilihanen te kegkevitil su midsesapà si Saul he egkagi te, “Edrewakan is minsan hentei he egkaan te kenè pa ebmezukilem, te kenè e pa ebpekevales te menge kuntada ku.” Umbe wazà minsan hentei he migkaan kandan. 25-26 Ne is langun he menge sundaru ne nemenhendiyà te ketelunan, ne zuen neehè dan he teneb he edtiǥis diyà te tanà. Piru wazà migkaan kandan dutun tenged te nahandek dan te sapà.

27 Piru wazà metueni ni Jonatan is sapà te amey zin he engayan he edtumanen te menge etew. Umbe intiyuk din is purù te tuked din dutun te teneb ne migkaan sikandin, ne mibmeupiya is gehinawa zin. 28 Migkeǥiyan sikandin te sevaha zutun te menge sundaru te, “Kenà egkehimu he egkaan kiw su midsesapà is amey nu he edrewakan is minsan hentei he egkaan guntaan he andew. Umbe ebmemeǥuyà is menge etew.” 29 Migkaǥi si Jonatan te, “Kenà meupiya is ebeelan te amey ku kayi te nasyun. Ahaa niw man, utew a nekeuhang te nekeǥezam a te deisey zà he teneb. 30 Edhuna pa pezem he meupiya is kegezamgezam tew ke migkaan kiw zutun te nekuwa tew puun dutun te menge kuntada tew, wey mezakel pa utew is egkepatey tew he menge Filistihanen.”

31 Dutun he andew is menge Israilihanen, te nezaag dan en is menge Filistihanen puun te Micmash taman te Ayalon, nengeveley sikandan wey nengevitil utew. 32 Umbe, egkengezegdeǥusu zan is ebpemenguwa te nengaaǥew zan he menge kerehidu wey menge vaka, ne midlapè dan haazà, migkaan dan is usa he zuen pa zutun lengesa. 33 Duen sevaha zutun he midsumbung ki Saul, “Ahaa nu man mibaal is menge etew te salà diyà te Nengazen pinaaǥi te kegkaan te usa he zuen pa lengesa.” Migkaǥi si Saul te, “Menge limbungan! Ililid niw kayi te uvey ku heeyan is dekelà he vatu. 34 Ne beyai niw is menge etew ne keǥiyi niw te med-uwit is uman sevaha kandan te vaka wey kerehidu, ne lepaa zan kayi wey keena zan. Ne keǥiya niw kandan he kenè dan mebaal te salà diyà te Nengazen pinaaǥi te kegkaan te usa he zuen din pa lengesa.” Umbe te haazà he kezukileman mid-uwit is kada sevaha te kandin he vaka ziyà te ki Saul ne midlapè dan dutun. 35 Ne zutun mibaal si Saul te pemuhatà para te Nengazen. Iyan haazà nehuna he pemuhatà he mibeelan din.

36 Migkaǥi si Saul te, “Edsurungen tew ǥuntaan te mezukilem is menge Filistihanen. Ebpenhimetayan tew sikandan langun wey ebpenguwaan tew is menge azen dan taman te egkepawà.” Midtavak is menge etew te, “Beeli nu ke hengkey is meupiya.” Piru migkaǥi is memumuhat te, “Ed-insaan te pa is Megbevayà mehitenged keniyan.” 37 Umbe, mibpekisayud si Saul ziyà te Megbevayà te, “Edsurungen dey ve is menge Filistihanen? Ibpezaag nu en be kenami sikandan?” Iyan, wazà medtavak is Megbevayà te haazà he andew. 38 Ne zutun migkeǥiyan ni Saul is menge pengulu te menge Israilihanen te, “Uvey kew kayi, su wey tew metueni ke hengkey he salà is neveelan tew te heini he andew. 39 Idsaad ku te uuyag he Nengazen he iyan midluwas te menge Israilihanen, he is ebpekesalà ne edhimetayan, minsan si Jonatan he anak ku.” Ne zutun wazà minsan hentei he midtavak.

40 Migkeǥiyan ni Saul is langun he Israilihanen te, “Hitindeg kew keniyan, wey is anak ku he si Jonatan ne kayi edhitindeg.” Ne mibpemineg is menge etew. 41 Ne nengemuyù si Saul. Ke sikandin te, “Nengazen he Megbevayà te Israel, petueni nu kenami ke hentei is nekesalà.” Ne pinaaǥi te ripa, si Jonatan wey si Saul is nekesalà ne kenà iyan is menge etew. 42 Ne migkaǥi si Saul te, “Ripahi niw ke hentei kenami ki Jonatan is nekesalà.” Ne is neripahan ne iyan si Jonatan. 43 Ne migkeǥiyan ni Saul si Jonatan te, “Hengkey ves is mibeelan nu?” Midtavak si Jonatan te, “Intiyuk ku is purù te tuked ku zuen te teneb ne migkaan a te deisey zà. Ne, kinahanglan buwa he edhimetayan a?” 44 Midtavak si Saul te, “Uya! Su emun kenè ku sikew ebpehimetayan, deyzey pezem ke iyan ad edsilutan te Megbevayà te utew mereǥen.” 45 Piru migkaǥi is menge etew ziyà te ki Saul te, “Si Jonatan is nekeveǥey te kezeeǥan tew, ne ǥuntaan edhimetayan tew sikandin? Kenà egkehimu! Idsesapè dey ziyà te uuyag he Nengazen he kenà sikandin ebmenuwen, su is Megbevayà is midtavang te mibeelan din guntaan.” Umbe wazà himetayi si Jonatan, su midluwas sikandin te menge etew. 46 Ne si Saul wazè en mebpedayun te kedal-as te menge Filistihanen, ne midlikù sikandan diyà te lugar zan.

47 Hein kedhadì ni Saul te Israel, mibpekidtebek sikandin te nekelingut kandin he menge kuntada zin. Iyan heini menge kuntada zin: is menge tig-Moab, menge tig-Ammon, menge tig-Edom, is menge hadì diyà te Zoba, wey is menge tig-Filistia. Is minsan hentei he kuntada zin ne egkezaag din. 48 Mevurut sikandin he ebpekidtebek, wey nezaag din daan is menge Amalikanhen. Te heini he paaǥi midluwas din is menge Israilihanen puun te gehem te langun he menge midsurung kandan wey te mibpen-aǥew te menge azen dan.

49 Is menge anak he maama ni Saul iyan si Jonatan, si Ishvi wey si Malkishua. Ne is menge anak din he menge vahi iyan si Merab he iyan kakey, ne si Mical, is hazi. 50 Is esawa ni Saul iyan si Ahinoam, he anak ni Ahimaaz. Is peremandar te menge sundaru zin iyan is id-aǥew zin he si Abner, he anak te anggam din he si Ner. 51 Is amey ni Saul he si Kish wey is amey ni Abner he si Ner ne menge anak ni Abiel.

52 Layun dà edtebek is menge Israilihanen wey menge Filistihanen seled te kedhadì ni Saul. Ne emun duen egkeehè din he mevurut wey mezesen he etew edhimuwen din he sundaru.