1 Gahan Hanipyah oh orhe kis matip nathei han ihir orhorsi patina gahan komdapat 72 han ihirnong ambura Gin gur yot han yot hanwi hama nohe kwit ma ihat sasipra ohe ap mutuho be ohe aptei apteio anong sonmur. 2 Ma ihat sapri aptei atei oh Got ohe meng amram ohe danong hatin ohe da oh ruumsan ihir den dam datin ohe tan hat patimur. Ihan gur susa den dam suhdin han hatin hat sus Got ohe danong hatin ohe meng oh pot pisonmur. Pot pisonmat oh dam suhdin oh ruumsan hat pat ohoh ihan gur Nure bes teiwi na yah hatiproh ma hapat daham ru nita han ohnong Gorhe den dam nasuhdin han nuhur pang hat pati ohoh ihan gorhor kat han gon tit darhetinmur. Darhetporhan nuhur den dam oh ruumsan han ham nadatiprohemur por dahamtinmur.

3 Gur sonmat oh mamengnong mohhe dahat sonmur. Gur sipsip bap hatin hat pati orhor sipsip bap ihirnong kotwa ihir sum dapti dusnong nadarhermur.

4 Gur sonmat oh manio mandap kasip hatin ohe den ungo tong apo ohsi hat sapri. Be kombita sonmur. Saptin kuuhan ihir mandap apriptihanhe ihirsi meng saro hat sapri. Guragure ma saper riya teinong oh kapkap sonmat oh saptiwi henmur. 5 Susa aptei kora Gin map ropera daham ap gwatei kat ronmat oh gurdapat ihirnong Map ma pati kuuhan gurnong Got oh orhe manap goshat paten ohe da ohsi nahat ha napaptenohmur por ronmur. 6 Rosa wandeiyaoh Got ohe yah mat papindin danong hatin han ti patihanhe gure por ma roya meng oh dam timam ihirsi patepramur. Ihtin han ti na patihanhe gure por ma roya meng oh dam na timam it guragure boknong naham napaptepramur.

7 Ap gwatei ap gwatei hathe sasipri. Guragure ma roya ap ohwi indinmur. Patin deno tomo ma namdeya oh tamreipti han ihir yan daripti ohoh ihan nure tamreiya ohe pe oh napriya ma hapat daham denmur.

8-9 Gur ap mutuhnong saperhan ihir gurnong amam naham namburiyahanoh ama ap mutuh orhor indinmur. Patim ire den ma napriya den oh damo ama ap mutuh ohe sik hat pati han ihirnong yah maro Got orhe hrepnong naham napapindin oh gin kakduup hahmur poro hat indinmur. 10 Gur ap mutuhnong saperhan ihir gurnong na nambur hahap naham kom nasariyahanoh ama ap mutuh oh mandam saperim gur ama ap mutuh orhe mandap tei oh tandeima ama ap mutuh kuuhan ihirnong 11 We. Gur gin moh wamtin. Gure nuhurnong ma san nahaya ohe pe oh nure tong bok moh ap mutuh moh ohe huhun tambor ma tamder oh nuhur ap mutuh mama it hirmat namdaya ohmur. Hirmat namdaya orhora; Got orhe hrepnong naham napapindinheri gin kakduup hah ma hapat daham potahat dahat indinmur gipora tong bok ohe huhun tambor ma tamder oh hirmat mandam sonmur.

12 Noh arpin meng napotiprohmur. Kaput Got ohe pepe dik bopor heisup ma nahatipra dik oh Sodom ap mutuh ma pateshe kuuhan ihirnong orhe heisup mat papat ohe batbet isip oh apripra orhor gurnong ma hahap naham kom nasariya bap ihirnong oh batbet isipnap apripramur pongopri. Giporpat ihirnong darhengopri.

13 Jisas oh Korasin apteio Betsaida apteio gur Got ohe heisup nahat napapat ohe da ohsi batbet isip ma napripra oh gur hinhinsi han baprano. Gurnong na wandeipti da namgipat orhor gur Nuranure er da moh na mandama orhorsi hat patepera dahat ma pati oh ermuro. Gurnong ma namgipat da moh rih Taia apteio Saidon apteio ihirnonghe pinggisuhneng ihir Nure er hat pati da moh gin mandatpera daham saheih ham simbap ariyao sirap ariyao hapti mandatpanengmur. 14 Ihtin ohoh ihan Got oh Taia apteisi Saidon aptei ihitnong ma heisup mat papat ohe batbet ma apripra oh isip orhor ama batbet oh garpok batbet apripramur. Gin namgitperhan am hat patim ma ihapti aptei gurnong oh batbet oh isipnap nahatipramur.

15 Kapaneam aptei ma pati bap gurhe Nuhur yah hat pati ohoh ihan Got oh nambura nure win nadaptuhur aw teinong nahatipramur dahaptida. Basra. Gur er hat pati bapo rim kurwam ohe ga teinong tapan nadutipramur pongopri.

16 Giporpat orhe han ihirnong Gur susa meng oh ihirnong potperhan gure meng amram dindeiyahanoh oh nohe mengnong amram dinahaptimur. Gure meng na amram kom nasariyahanoh oh nohnongsi; nohnong ma nadarhetip han nuhutnong tap mat kom nasariptimur pongopri.

17 Gahan Jisas orhe 72 han ma darhetir han ihir meng pot pisaptidapat amam isip tit hat it apingopari. Aprisa Hanipyaha. Nure gorhe kasip ohsi ma imat pihiri oh be sik hat pati han ihirnongwi na pomtirimur. Mongsup ihirnongsi Nuhur Jisas orhe kasip ohsi gin mongsup gur maras sona naporiyamur potperhan ihir maras sayao mat pihirimur pongopari.

18 Potperhan Jisas oh gur indeiptin noh wandeioh Satan oh aw teidapat kakdahnong moh wandangwermur. 19 Gur nohe kasip ma napir mengnong moh amratinmur. Noh gurnong inapawamo tohaho mahaw nahaya hano ihirnong tonggamar ambapte matin ohe kasip ohsi nahat napapatmur. Ihtin kasipsi nahat napapat ohoh ihan gure boknong er nahatin oh timbasmur. 20 Ihtin kasipsi nahatporhan gur Nuhur ama ohe kasip ohsi mongsup ihirnong maras sona potperhan nure meng amram maras saptihe daham ama ohe danong ham amam hapri. Nure win oh Got oh aw tei mahat brak mar nat patwa daham ama ohe danong amam ham patenmur pongopri.

21 Jisas oh ameng oh pot manda tei Got orhe Yahsup oh amam da apriporhan amam hangopri. Amam hapat itap ohnong Nohe ata. Aw tano mong tano gonsi ma pat han oh gorhorwi Hanipyahnap hat patmur. Ihat pat han go gorhe da oh hanip ihir noh dakuu amsi hanmur ma dahapti han ihirnong na pinggima aremama brer ire da hatin hat sus Noh dakuu hat indin ohe da oh timbas hat patwa ma dahat pati han ihirnong asoh pinggipatmur. Go ihat pati han ihirnong gorhe da oh pinggipato rim noh gonong weso napor amam nahapatmur. Ma ihpat oh at gorhe damdapat orhor ihtipora daham ihpatmur pongopri. 22 Pora kuuhan ihirnong At oh erer oh gonsi norhe bes teinongwi namat pat ohoh ihan norhor pokwi am hat patmur. Orhe brer nohnong pomat am hatin ohe da oh gur gonsi nohnong pomat na dahat patimur. At orhor pokwi am hat patmur. At ohnong am hatin ohe dahe gur gonsi hanhan hat patimur. Mon norhorsi; norhe ma namgipat han gursi dir pokwi at ohnong am hat patimur pongopri.

23 Giporpat bos tamburkera orhe pinggit pisapat han ihirnongwi Gurnong oh nohe ma namgipat da oh wamar am hapti ohoh ihan amamsi hat pati bap gurmur. 24 Gure amramo wamaro ma hapti da moh rih oh propet bapo mong ohe kakhan hat pateshe han bapo ihir gure ma wandeipti da oh Nuhurhe wandeiptineng dahashemur. Gure ma amrapti meng oh Nuhurhe ihtin meng amraptineng dahashemur. Ihat dahashe orhor ihir mihtin danong wandeiyao mihtin meng amrayao ti na hashemur. Gur wandeiyao amrayao hat pati ohoh ihan gur amamsi hat pati han bap gurmur pongopri.

25 Gahan Jisas oh meng am deipatin pohon sawa mengnong amnap hat pat han tit tandeima Jisas ohe mengnong adason matporim ohnong Tisa. Noh kinhahrit dipwi yah hat paten ohe da oh datiproh por dahandeingopri.

26 Por dahamtiporhan Jisas oh Got ohe ritporhan Moses ohe ma natip sawa meng oh de meng oh go sama Mama mengnong moh noh dimat ahanoh noh eimat paten dasi hatipra ma hapat dahapat pongopri. 27 Potporhan oh Noh mama ohe brak matip mengnong mohwi sam dahapatmur. Tit oh Guragure Hanipyah Got ohnong bopor mat papten oh da muhutdapat orhor orhornongwi bopor mat paptenmur. Dahe orhornongwi dahat patenmur. Kasiphe orhornongwi kasip hat patenmur. Amaru hat orhorwi bopor mat paptenmur ritporhan ma brak matip ohe meng ohmur. Tit oh Guragure Noh ihat yah hat inpora daham gorhe boknong ma yah hat dahapatru hat orhor arwananah ihirnong asohhe imat orhor da apris bopor mat paptenmur ritporhan ma brak matip meng ohmur. Ama yot mengnong oh noh dahapatmur pongopri.

28 Potporhan Jisas oh Dawa go arpin kis dei meng rimur. Go ama yot mengnong oh dimat ahanoh go eimat paten dasi ham patepramur pongopri. 29 Potporhan oh Amrat pati han maihir nohnong Go dahat pat meng orhor ohnong kianorim ohnong dahandeipat napotipri dahapat it Jisas ohnong Noh arwananah ihirnong bopor mat papindin oh de ihirnong bopor mat ha papindinoh dahapat por dahandeingopri.

30 Por dahamtiporhan Jisas oh Noh mama paham meng moh napotporhan go ama han ihirnong imat papindinmur napotip ma hapat dahatinmur. Paham meng oh mamaru hat patmur.

Tit han tit Jerusarem ap mutuh oh patesuhri. Patdapat gahan Gin noh Jeriko apteinong waporo rim waihipri. Wapatin mandap oh gapah han bap ihir aprisa ohe erer oh adatinmat kawsi sutperhan oh haputin ina hat patin ohoh erer oh sa adar pipari. 31 Saperhan oh haputin ina hat mandap tei oh patin Got orhe ap yawar hanat bok han ihir tit han ama mandap kup apingopri. Aprisa hanipnong wamara na panggeim kom asar mandap manggap pe puh amdapat sangopri. 32 Saporhan Ripai bap Got ohe ap yawar atamreipti han bap ihir tit han apingopri. Aprisa wandeipat na panggeim kom asara mandap manggap pe puh amdapat sangopri.

33 Saporhan gahan iraire mahaw goshat pati han Samaria ihir tit han apris wamara hinhina isipnap tit deingopri. 34 Hinhina isip mara ohe duupnong aprisa gapah han ihir ma ina mong mong suta ohe batbet oh ha pang hatinoh rim orhe wer sano wain tom gap sano oh dar amongopri. Amorpat aban deingopri. Aban deipat tapama orhe donki basnong deipat apteinong pangopri. Pasa iraire kakun sus timapti han ire apnong oh mara den pandemo paptema timatiri.

35 Timorimdapat kutwi mong da hatporhan oh saporim mani tan yot tit dara ap wamat pat han ohnong Ohe ap ma indiproh ohe ap yano den pandiproh ohe yano oh mama napir ohmur. Ihan go ohnonghe pomat papindinmur. Pomat papatina yan oh tit hatip hahhanhe noh it apris yan napripramur pora yan apris sangopri. Ihtipari pongopri.

36 Giporpat sawa mengnong am hat pat han ohnong Gin arwananah ire danong ham ma bopor deipti da oh gin mama yitir han maihir de han oh ihtin dasi hat apris gapah han ihir rum hemat itiri han ohnong ambur yah matipo. Go ritino pongopri. 37 Potporhan sawa mengnong am hat pat han oh Ohra hanip ohnong ma hinhina mar panggeitip han oh ama han orhor ihtin dasi ham ambutipmur pongopri. Potporhan Ihan ohe ma mahaw goshat pati han ohnong hinhina mar ma panggeitipru hat orhor gohe ihirnong hinhina mar yahwi mar panggeit pisashenmur pongopri.

38 Gahan Jisas oh orhe pinggit pisapat han ihirsi irair susa Mata uhe pat aptei oh kotpari. Kotperhan uh Gin nohe apnong sus den damo hatiprohemur por ambur pisangopri. 39 Ambur pisusa uh den tendeipatin arwap Maria uh Jisas oh ihirnong meng am deipat ohe meng oh amratporo rim ohe tong duup oh tongnoma meng amrat angopri. 40 Meng amrat patin Mata uh Maria uh nohnong na napanggeipat moho. Noh norhap den temaro ruumsan tamreipat moho daham da er hapat apris Jisas ohnong Hanipyaha. Uh nohnong na napanggeitporhan noh norhap tamreipat moh go kinham na dahapat. Ihan daham Go uhnong panggeitina potinmur pongopri.

41 Potporhan Hanipyah oh We. Kora kora. Go tihan tihan danong oh ham da ruumsup hatipra. 42 Ohri isip hat pat da oh tit pokwi hat patmur. Ama danong oh Maria uh datpora daham darpatmur. Oh yahnap dat na mandatin ohe da dar ohoh ihan kinmat it dat amdatiprohe pongopri.