1 Tere ji yame onowou oojo bonade golo wagu, ji fere Kristus nomo onowou oojo boni goloni.

2 Tere gai-gai ji boya ninatege isi boya beele oruwanga ji tedu boni tigene waha yaasu de‑deya. Onou waha boni ji leni, tere fanyimu gai hilobainga onoya. 3 Onou wa tere beele ete fere benou isagu ganga boni gau hina. Fai oruwanga nebere mora wa Kristus, ariya, aita nomo mora wa nomo au. Kristus nomo mora wa Itou. 4 Onou waha bona fai ete no mora kutaudu hauya wona yo profet beele malalamudu lewei mata wona yo, wa no nogo nomo mora mayaumu taina, wa Kristus. 5 Onou dorofenga aita ete no mora kutauwei uwa hauya wona yo, uwa profet beele malalamudu lewei mata wona yo, waha fere nomo mora mayaumu taina. Wa aita no tawa oruwa karudu kaitena dorofe. 6 Aita no tawa ada kutau bona wonga, no nomo tawa karudu tutumu wona. Onodu no tawa karudu tutumu wona yo oruwanga iredu kaitei nomo mayau tuwei mata wonga, no mora kutau wona. 7 Fai no mora ada kutau wonbona, taate bona, no Itou nomo danga bagu nomo unyi anyakaro bagu abitimuwei nomo agotete dorofe yafana. Ono ganga aita no fai nomo danga bagu nomo unyi anyakaro bagu abitina.

8 Itou no aita gogala langa fai tafa tuwei uwa. Itou no fai gogala langa aita tafa tuwai. 9 Onodu Itou no aita bona ninau isidu fai hoyo tuwei nomo bona tafa tuwei uwa. Itou no fai bona ninau isidu aita hoyo tuwei nomo bona tafa tuwaiha. 10 Onou waha bona aita no Itou nomo haruwe tena waha isisiwou dorofe no mora kutau wonbona, ono wonga ensel nere edo urodbode.

11 Onou wa Anyakaro nomo fai-aita bagu langa aita nere nagenga yafegu uwa, onodu nere fai fere nere nagenga yafegu uwa. Aita no fai nomo hoyo tuwou yafa ganga, fai no aita nomo hoyo tuwou yafana. 12 Amugou langa Itou no fai gogala langa aita tafa tuwaiha, ariya elebe aita gogala langa fai heige-heigede. Onodu Itou no nogo dada oruwanga nomo hugu.

13 Tere tage beele beha haawe wagu. Aita no mora kutauwei uwa Itou hauya tuwona wa, fanyimu hilobainga yo? 14 Fai-aita bagu ere hage ebere fanyige langa waha tere benou abitimu tigina, fai no tawa ufaro wonga wa tigini uwa. 15 Aita no tawa ufaro wonga, no nomo mujari hilobainga dorofe. Wa taate bona, Itou no tawa ufaro waha no mora kutauwei nomo bona tuwaiha. 16 Onou wa fai ete no ji yame beele beha bona beele langa warawei nomo wonga, no benou isi dewona, ere onowou ila hogo fere-fere ada oojo-oojoya, onodu nere Itou nomo sios fere onowou ila uwau.

17 Ariya, ji elebe tere onowou ila oojo wagu ganga waha boni letigonboni. Onodu ji dada waha boni lewoni ononi waha, ji tere fanyitege ono-onoya waha boni edegawou beele ada lewonboni. Uwa. Saini tere bori boya komoya waha langa onowou hiloute ada heige-heigena. Uwa. Tere tebere onowou gai inyanga hilou uwa. 18 Ji amugedu beha lewonboni. Ji beele benou isinaha, saini tere bori boya komoya waha langa, tere kejiwe fofouradu boya tere tage gamatege langa beele langa wara-waraya. Onodu ji menanga beele beha boni huwanyafe ngalengana, 19 taate bona, ji benou isini tere tebere sios menanga fofoura waha, tere isi dewagu, tebere fai-aita ani nere onowou Itou gau tuna waha tigini oojode. 20 Onou waha bona saini tere bori boya komo boya da haiyaya waha, Anyakaro nomo da tigini uwa. 21 Tere etenga-etenga fasayadu tere tage tebere da waha elegedu nyi-nyiya. Ono geyenga nere ila huweli yafa ganenga, nere ila wain yaage inyangaro nyidu bode moranege hilala ganga golode. 22 Adadu? Tere da yaage bagu nyei nomo mata uwau rute? Tere Itou nomo sios waha dada ewe rute iboya maidu, nere baabo gane ono nigi geyenga nere da uwa bode mayau tede yo? Ji tere beele adadu letigoni? Ji tere tebere onowou waha boni edegawou beele letigoni rute? Ji dada waha boni tere beele edegawou ada letigonboni. Gai uwanga uwa.

23 Ji beele letigini beha, ji Anyakaro langanga teneha. Beele waha benou. Ooru langa Judas no Yesus nere honggoro fai owonege langa tafa tuwaiha, ooru waha langa Anyakaro Yesus no beret tedu bona, 24 Itou hilobainga tudu bona lalatiwai, onodu bona lewai, “Beha ji yame geefe gala, ji tere hoyo tigei nomo tigini. Tere ji bonade ninatege isei nomo bonade onou ono wagu.” 25 Onodu saini nere nyi boro wanenga, no wain kap bagu tedu bona onowou amugedu onowai onounga onowai, no benou lewai, “Wain kap beha beele agili mala karuwou eege ji yage yame ganefe langa heigemuni. Tere gai-gai kap beha langa nyi bonade, ji bonade ninatege isei nomo benou ono wagu.” 26 Yesus nomo beele beha no benou abiti higina, tere gai-gai beret beha nyi bonade kap beha langa nyi bonade, tere Anyakaro no jimiri tedu umai waha bonade malalamudu legadenga, goi saini no ege gidu mayona langa edo wonbona.

27 Onou waha bona fai ete no fanyimu tigini onowei uwa no Anyakaro nomo beret nyei mata bona Anyakaro nomo kap langa nyei mata wonga, no Anyakaro nogo nomo gogala bagu nomo ganemu bagu inyabamuna dorofe, onou waha bona no nomo onowou waha bona no nyabuluwou bagu. 28 Fai no ngasunga no nogo nomo huwanya haawedu bona, no dabu beret waha nyi bona kap waha langa nyonbona. 29 Wa taate bona, fai no Anyakaro nomo gogala bona ninau isi dewei uwa, no beret nyi bona wain nyona wa, no nomo nyabuluwou no nogo langa tamaina, onou waha bona Itou no inyabamu tuwonbona. 30 Hugu wahanga langa, nere fai-aita baingaro tere gama langa nere danganege uwau, nere taura elegedu bode ila umeru waneha. 31 Onou wa ere hage ebere huwanyage haawe dedu nyoya wa, ere nyabuluwou uwau. 32 Onou wa saini Anyakaro no ere ebere onowou tigini uwa waha uredu bona ou ila higina wa, no ere tiginimu higonga ere fai-aita oulaha bagu adai yaae woya, waha bona no onou onona.

33 Onou waha bona tere yame baabo gane, tere da nyei nomo komowei mata bonade wonga, tere ila itari nigidu bonade. 34 Ete no huweli tuwei mata wonga, no nomo mata langa nyona. Gamaji tere tebere komowou waha no kot heigemu tagoga. Beele matau gai inyina, iinga saini ji mai tere terigoni langa tiginimu wonboni.