Dos Sulat ni
SANTIAGO
Unna nod Bosan
Iddos id sulat ka-ay, si Santiago no ari ni Disas diyon to inoy. Sokkad sikandin taddot od pombuyyahon tod pompomakoy riyot Jerusalem. Konna ra sokkad no id lolivuung nod pompomakoy kos id popiyoddan din ka-ay'n sulat, ko konna, idda en so langun.
Dos dontulon no id sulat din ini, su amoy id pomandu tod pompomakoy no ko-ilangan motallong kos ko-ubpa ran woy kodbovotasan. Pomon ka-ay, od kokita taddot dumon minuvu, no mooggot kos kopomakoy ran.
Dos dakkoon nonaw ni Santiago ka-ay'n sulat, idda en so mooggot no kopomakoy. Id paabbotlabbot din no ko-ilangan nod ti-is kos od pompomakoy to mgo kodgeddam woy mgo kosupittan. Id nonaw rin mandad, no konna ra iddos minuvu no duwon koruwonnan kos od oukuyon dan, ko konna, ko-ilangan no waa od podmusingon dan. Id nonaw ni Santiago no waa koru-anon to kopomakoy otik waa idda posivonnali ukit to pinuungan. Woy id nonaw rin no ko-ilangan no iddos od pompomakoy, od kotuig nod tohoo to kandan no dila. Id pomandu rin mandad, no konna od poratasdatas kos od pompomakoy, ko konna, od ingowollon dan kos moraom no koovottan no id pomon to Monama. Id nonaw rin mandad, no ko-ilangan nod dasaa iddos od pompomakoy atag to mgo oukuy woy mgo korumannan dan, woy dii ran od kopiyod nod puung to saa.
Dos mgo Nokota-aw:
Kodpokilaa (1:1)
Dos kodti-is to mgo kodgeddam (1:2-27)
Ko-ilangan no waa od podmusingon (2:1-13)
Waa koru-anon to kopomakoy otik waa pinuungan (2:14-26)
Dos moka-atag to dila (3:1-12)
Dos mooggot woy konna mooggot no moraom no koovottan (3:13-18)
Ko-ilangan nod po-iraom ki to kodponguu to Monama (4:1-17)
Dos pomandu atag to noruwonnan (5:1-6)
Dos pomandu moka-atag to kodti-is to mgo kosupittan woy dos pomandu moka-atag to koddasaa (5:7-20)
1
Kodpokilaa
1 Siyak si Santiago, sokkad no uripon to Monama woy tod Longaggon ta no si Disas Krays. Id sulat a koniyu no duma ku no mgo Judio nod pompomakoy no nokodsuwoysuwoy ka-ay to ampow't ingod. Momonnu kowd duwon?
Dos Kodgeddam to Kopomakoy
2 Mgo suwod ku riyon to kopomakoy, ahad duwon nokod-osso-osson kosupittan nod inguma koniyu, yo kow'd kotompoddi to puhawang, ko konna, kahaa-i row idda oraroy. 3 Oyyos nokosaddoo kowd no iddos kodgeddam no no-ukitan dow, idda en kos od pokomosalig to koniyun kopomakoy amoy'd pokoti-is kow tadda. 4 De-en ponayun kow kos ti-is to ahad ondan no kosupittan amoy'd buyyag kow riyot kopomakoy no waa kulang. 5 Iddos ahad ondoy koniyu no kulang kos moraom no koovottan, iyon moppiya nod buyu sikandin diyot Monama no movoggoyvoggoy, woy dii en sikandin od koohoddan taddot od buyu kandin. 6 Piru otid buyu sikandin diyot Monama, ko-ilangan no dii sikandin od duworuwa. Su iddos minuvu nod duworuwa, od poko-iling to baud to dahat no od piyoddon to monokkaan kaamag ahad ingkon. 7 De-en iddos iling ka-ay'n minuvu, konna sikandin od poko-imman nod kotanggap din iddos od buyuwon din diyon tod Longaggon. 8 Oyyos id duworuwa man sikandin to kodsalig diyon to Monama, woy dii mandad od koto-oo iddos langun nod puungan din.
Dos Pomandu Atag to Worowora woy taddot od Koruwonnan
9 Na, sikiyu no mgo suwod diyot kopomakoy no worowora, kahaa kow, su mowwet kow riyot kod-ontong to Monama. 10 Woy sikiyu nod koruwonnan, kahaa kow otid kosorollan dow no iddos koniyun korotuwan, waa koru-anon diyot kod-ontong to Monama, oyyos od poko-iling idda to kovukaran no go-os od kahangu. 11 Su otid moohiting don kos allow, od kaanos kos mgo sabbot woy'd pongo-umpad kos mgo kovukaran, woy od ka-awa ron kos kogolingoy tadda. Iling en mandad tadda kos minuvu nod koruwonnan, su laggun tod kosasow sikandin to mgo korotuwan din, tigkow od inguma kandin kos kopotayan.
Dos Dontulon to Kodgeddam
12 Na, moppiya kod kotomanan taddot minuvu nod pokoti-is to mgo kodgeddam. Oyya su otid pokoti-is sikandin tadda, od kotanggap din iddos ganti, no idda en so umuun waad tomanon no id tandu to Monama atag to langun nid ginawa kandin. 13 Otik duwon minuvu no nopiyod diyot kodpuung to saa, konna en ollog nod ikahi sikandin, no iddos Monama kos id piyod kandin to kodpuung to saa. Oyyos konna en od kopiyod kos Monama riyot kodpuung to kororattan, woy konna mandad sikandin kos od piyod to ahad ondoy riyot kodpuung to saa. 14 Su iyon od pokopiyod to minuvu nod puung to saa, idda en so morat no ingowollon din, no iling to oppan nod pokoposahad kandin. 15 Su otid duurumannan din iddos morat no ingowollon, iyon od ingumannon tadda, iddos saa. Woy dos ponayun nod puung to saa, iyon od ingumannon tadda, iddos kopotayan no waad tomanon.
16 De-en id ginowannan ku no mgo suwod, yo kow'd pa-akaa to poomdom dow no Monama kos od piyod koniyu riyot kodpuung to saa. 17 Oyya su iddos langun no moppiya woy waa kulang nod kotanggap ta, id pomon diyot Monama no mid bovaa to langun nod ponse-aa riyot datas to langit. Ahad od kopalin iddos od ponse-aa riyot langit, dii en od kopalin kos Monama. 18 Oyyos pomon to kandin nid kopi-i, novovallan ki no mgo anak din ukit to kodpaabbotlabbot keta taddot bonnaan nonaw. Id puungan din ini, amoy siketa kos lampas kos koru-anon to langun no binovallan din.
Dos Kodpominog woy Kodtuman to Kahit Monama
19 Na id ginowannan ku no mgo suwod, poomdomma row ini. Ko-ilangan nod kotuig kow od pominog, konnod awang od ooseng woy konna moomok od langot. 20 Su iddos langot, konna od undag to motallong no ko-ubpa no id kopi-it Monama. 21 De-en tonani row iddos langun nod pokolibmit woy morat no pinuungan dow. Poobbava kow riyot Monama, woy tumana row iddos kahi rin no nokopomuwa riyot pusung dow, su idda en kos od pokotobbus koniyu.
22 Yo row okali kos koniyun ko-ugolingun ukit to kodpominog da to kahit Monama, ko konna, tumana row idda. 23 Oyya su iddos ahad ondoy nod pominog to kahit Monama woy diid tuman tadda, noko-iling sikandin taddot minuvu no id ontong diyot oungan. 24 To nokita rin kos ko-ugolingun din, id ipanow sikandin woy idda ron en, nolingawan din don kos boyo rin. 25 Piru iddos minuvu nod pominog to suhu to Monama, no idda en kos od pokopolegguang kandin pomon diyot saa woy dii rin idda od kolingawan, ko konna, od tumanon din, od tovangan en sikandin to Monama taddot langun nod puungan din.
26 Na, otik duwon minuvu nod ikahi no mopompomakoy sikandin, piru dii rin od kotoholan kos bivig din, id okalan din kos ko-ugolingun din woy waa en koru-anon to kandin no kopomakoy. 27 Piru iddos mooggot no kopomakoy no waa id pokosawoy riyot kod-ontong to Monamon Amoy ta, idda en so kodtavang to mgo ilu woy mgo bau nod kohirapan, woy dii mandad sikandin od kopiyod to morat no botasan to mgo minuvu no waa Monama.