16
Paulo an'tumiza mamuko kuna abale wa kuRoma
1 Ndirikukudziwisani kuti Febe ni mpfumakazi yathu, diyakoni* Diyakoni: Ayai wakutumikira. wa gereja ya kuKenkereya. 2 Ndirikukumbira kuti mum'tambire mwa Mbuya ninga bzin'themera wakucena, ndipo mum'thandize pa bzomwe angasaye, pakuti ambathandiza wanthu azinji, napo na inembo.
3 Pasani kulimba Pirisira na Akwira† Akwira akhali mwamuna wa Pirisira. Wonani mulivu la Mab 18:2,18,26., andzangu wa basa mwa Krixtu Jezu. 4 Akhadakondzeka kupereka moyo wawo kuti apulumuse moyo wangu. Sikuti ndine ndekha dirikutenda kuna iwo, tsonombo magereja yentse ya omwe ni aJuda lini.
5 Limbisanimbo gereja yomwe imbakoncezana panyumba pawo.
Limbisani m'bale wangu wakufunika Epeneto, omwe adayamba kutendeuka kuna Krixtu kucigawo ca Aziya.
6 Limbisani Maliya omwe adaphata basa kwene-kwene pacipande canu.
7 Limbisani Andoroniko na Juniya adzindza wangu, omwe akhali m'kawoko na ine. Iwo ni wambiri pakati pa atumiki‡ Atumiki amwewa akhali atumiki basi, akhali lini ninga Paulo ayai winango khumi na m'bodzi., ndipo akhadatendeuka kuna Krixtu ine ndikanati.
8 Limbisani Ampiriyato, m'bale wangu wakufunika mwa Mbuya.
9 Limbisani Urubano, mwandzathu wa basa mwa Krixtu, na m'bale wangu wakufunika Xitaki.
10 Limbisani Aperesi, wakutawiridwa mwa Krixtu.
Limbisani omwe ni wa nyumba ya Arixitobulo.
11 Limbisani Herodiyau, m'dzindza wangu.
Limbisani wa m'nyumba ya Nalisiziyo omwe ali mwa Mbuya.
12 Limbisani Trifena na Trifoza, mpfumakazi zomwe zin'phata basa kwene-kwene mwa Mbuya.
Limbisani wakufunika Periside, mpfumakazi yomwe idaphata basa kwene-kwene mwa Mbuya.
13 Limbisani Rufu, wakusankhulidwa mwa Mbuya, na mai wace, omwe ambakhala ninga mai wangumbo.
14 Limbisani Asinkirito, Feregonte, Heremesi, Patolobasi, Heremasi na abale omwe ambakoncezana nawo.
15 Limbisani Firologo na Juliya, Nereu na mpfumakazi yace, napombo Olimpasi na mbumba ya Mulungu yentse yomwe imbakoncezana nawo.
16 Musanani wina na mwandzace na lufoi lacadidi.§ Lufoi lacadidi: MuciGiriki ambalewa kuti: “Kupsompsona kwakucena”.
Gereja zentse za Krixtu zirikupereka kulimba kuna imwe.
17 Ndirikukumbirani abale, kuti khalani na cheru na wale omwe ambabweresa kupambulana ndipo ambaphingiza wanthu mwakupitana na mapfundziro yomwe imwe mudapfundzisidwa. Fundukirani kwa iwo. 18 Nakuti wanthu amwewa alikutumikira lini Krixtu, Mbuya wathu, tsono alikutumikira bzakufuna bzawo.** MuciGiriki ambalewa kuti: “Alikutumikira mimba zawo”. Kudzera mwa mafala yabwino na yapsete, ambanyengeza mitima ya wanthu wakusaya kuzindikira. 19 Pakuti wentse adabva kulewa bza kubvera kwanu, ndipopo ndidakondwa kwene-kwene thangwe ra imwepo, tsono nin'funa kuti mukhale wakudziwa bzabwino, ndipo wakusaya thangwe kuna bzakuipa.
20 Mulungu wa m'tendere an'dzam'tsotola Sathani pantsi pa minyendo yanu patapita nthawe pang'ono.
Nkhombo za Mbuya wathu Jezu zikhale na imwe.
21 Timoti, mwandzangu wa basa, an'pereka kulimba kuna imwe, napombo wadzindza wangu Lusiyo, Jasoni na Sosipato.
22 Ine, Terisiyo m'nembi wa Paulo, omwe ndanemba tsambali, ndirikukulimbisani mwa Mbuya.
23 Gayo, omwe adatambira ine na gereja yentse, an'pereka kulimba kuna imwe. Eraxto, wakukoya cuma ca mzinda, na m'bale wathu Kwarto alikupereka kulimba kuna imwe. 24 [Ndipo nkhombo za Mbuya wathu Jezu Krixtu zikhale na imwe mwentse. Ameni.]†† Bzakunemba bzizinji bza kale bziribe dipsa 24.
25 Tsapano, kwa Mulungu omwe ni wamphambvu zakukulimbikisani kudzera mwa Mafala Yabwino yangu na kupalidza bza Jezu Krixtu, malingana na kuwonesedwa kwa cintsintsi comwe cikhadabisala nthawe ikulu kuyambira kale, 26 tsono tsapano cidawonesedwa na kudziwisidwa kudzera mwa Bzakunemba bza apolofita, malingana na lamulo la Mulungu wakuyenda-na-kuyenda, lakuti mbumba zentse zidzakhulupirire Iye na kum'bvera, 27 kwa Mulungu omwe ndiye yekha m'dziwi, atumbizidwe kwakusaya kumala, kudzera mwa Jezu Krixtu. Ameni!
*16:1 Diyakoni: Ayai wakutumikira.
†16:3 Akwira akhali mwamuna wa Pirisira. Wonani mulivu la Mab 18:2,18,26.
‡16:7 Atumiki amwewa akhali atumiki basi, akhali lini ninga Paulo ayai winango khumi na m'bodzi.
§16:16 Lufoi lacadidi: MuciGiriki ambalewa kuti: “Kupsompsona kwakucena”.
**16:18 MuciGiriki ambalewa kuti: “Alikutumikira mimba zawo”.
††16:24 Bzakunemba bzizinji bza kale bziribe dipsa 24.