16
Tacu zinomwe (7) za ukali bwa Mulungu
1 Pamwepo ndidabva fala lamphambvu likhacokera kumbuto yakucena ndipo likhalewa kuna anju anomwe (7) kuti: “Ndokoni mukathululire padziko la pantsi tacu zinomwe zire (7) za ukali bwa Mulungu”.
2 Anju wakuyamba adayenda ndipo adathululira tacu yace padziko la pantsi, ndipo bzidafunguka bzironda bzakuipa ndipo bzakuwawa kwa wale omwe akhana cizindikiro ca cirombo ndipo akhambatumbiza cifanikizo cace* Eks 9:10.
3 Anju waciwiri adathululira tacu yace munyandza, ndipo madzi yace yadasanduka mulopa ninga wa munthu wakufa, ndipo bzakulengedwa bzentse bzakukhala m'madzi bzidafa.
4 Anju wacitatu adathululira tacu yace mumikulo na muntsantsa, ndipo madzi yabzene yadasanduka mulopa† Eks 7:17-21. 5 Tsono ndidabva anju omwe an'nyang'anira madzi adati:
“Imwe ndimwe wakulungama,
Imwe, Wakucena, omwe ndimwe ndipo mukhali,
nakuti mudatonga mwakulungama.
6 Nakuti wakuipawo adathulula
mulopa wa wakucena
na wa apolofita wanu,
ndipo Imwe mudawapasa mulopa
kuti amwe,
nakuti ndibzo bzikhadathemera kuna iwo”.
7 Ndipo ndidabva fala likhacokera paguwa liciti:
“Inde, Mbuya Mulungu Wamphambvu-zentse,
kutonga kwanu ni
kwacadidi ndipo kwakulungama”.
8 Anju wacinai adathululira tacu yace kudzuwa, ndipo dzuwa lidapasidwa mphambvu kuti litenthe wanthu na moto. 9 Amwewa adatenthedwa na kaluma yamphambvu kwene-kwene, ndipo adatukwana dzina la Mulungu, omwe ni mtongi wa bzisi bzimwebzi. Tsono alibe kusiya bzitazo bzawo kuti atumbize Mulungu.
10 Anju wacixanu adathululira tacu yace padzulu pa mpando wa umambo wa cirombo, mwakuti umambo bwacene udakhala m'mdima‡ Eks 10:21. Thangwe la kuwawidwa kwene-kwene, wanthu akhaluma malirime yawo, 11 ndipo akhatukwana Mulungu wa kudzulu, thangwe la kuwawidwa na bzironda bzawo. Tsono adalamba kusiya mabasa yomwe iwo akhacita.
12 Anju wacitanthatu adathululira tacu yace mumkulo ukulu wa Eufarate, ndipo madzi ya mkuloyo yadauma kuti ikondzeke njira kwa azimambo wakucokera kumabva-dzuwa. 13 Pamwepo ndidawona mkamwa mwa Nyangumi, mkamwa mwa cirombo na mkamwa mwa mpolofita wakunama, mudacoka mizimu mitatu yakuipa yakulingana na acule. 14 Ni mizimu ya dimonyo§ Dimonyo: Ni bzibodzi-bodzi na mzimu wakuipa. yomwe yambacita bzilatizo bzakudabwisa. Iyo imbayenda kwa azimambo wa dziko lentse la pantsi, kuti iwagumanisire kunkhondo ya ntsiku ikulu ya Mulungu Wamphambvu-zentse.
15 “Bvani, nin'dzabwera ninga mbava** Mat 24:43-44; Luk 12:39-40! Ni wakudalisidwa ule omwe an'pitiriza kukhala wakudikhira ndipo an'koya bzakubvala bzace kuti aleke kufamba pezi acipasidwa manyazi pakati pa wanthu”.
16 Pamwepo, mizimu mitatu (3) ire idakonkhanisa azimambo wale pambuto yomwe muciHeberi ambati Aramagedoni†† 2Az 23:29; 2Mb 35:22.
17 Anju wacinomwe adathululira tacu yace mumphepo, ndipo pambuto yakucena padacoka fala lamphambvu lomwe likhacokera pa mpando wa umambo, liciti: “Bzakwana!” 18 Ndipo padawoneka ciphaliwali, muwira, kugunda na kutekenyeka kukulu. Kuyambira pomwe munthu adalengedwa pa dziko la pantsi, pakanati kuwoneka kutekenyeka kukulu ninga kumweku cipo. 19 Mzinda ukulu udagawika mbali zitatu, ndipo mizinda ya madziko idagumuka. Mulungu adakumbukira Babilonya ikulu ndipo adawapasa mkombo‡‡ MuciPutikizi ambati: “Cálice”. wa vinyu ya ukali bwakugosva bwace. 20 Ntsuwa na mapiri bzentse bzidanyembereka. 21 Matalala makulu-makulu yakucokera kudzulu yadagwera wanthu, libodzi na libodzi likhana kiru makumi matatu na zixanu (35). Wanthuwo adatukwana Mulungu thangwe la matalala, nakuti cisico cikhali cakugosva§§ Eks 9:23.
§16:14 Dimonyo: Ni bzibodzi-bodzi na mzimu wakuipa.
**16:15 Mat 24:43-44; Luk 12:39-40
††16:16 2Az 23:29; 2Mb 35:22
‡‡16:19 MuciPutikizi ambati: “Cálice”.