1 Uyu ni m'ndandanda wa mbumba ya wana wa Nowa, Semu, Hamu na Jafeti. Wana wawo adabadwa catamala cigumula ca madzi.

2 Wana wa Jafeti mbawa: Gomeri, Magogi, Madai, Java, Tubala, Meseki na Tirasi. 3 Wana wa Gomeri mbawa: Askenazi, Rifati na Togarima. 4 Wana wa Java mbawa: Elisa, Tarisi, Kitimu na Dodanimu. 5 Kwa Amwewa ndiko kudacokera mbumba yakukhala mumantsuwa, omwe adakakhala m'dziko lace-lace, malingana na cirewedwe cawo, libodzi na libodzi malingana na dzindza la madziko yawo.

6 Wana wa Hamu mbawa: Kuce, Mijiraimu, Pute na Kenani. 7 Wana wa Kuce mbawa: Seba, Havila, Sabita, Raama na Sabiteka. Ndipo wana wa Raama mbawa: Saba na Dedani. 8 Kuce adabereka Nimirodi, omwe adayamba kukhala wa mphambvu pa dziko. 9 Akhali msodzi wa mphambvu pamaso pa Mbuya. Ndipopo bzimbalewedwa kuti: “Wa mphambvu ninga Nimirodi”. 10 Pakutoma utongi bwace bukhaphatanidza Babeli, Ereki, Akadi na kuKalne, mudziko la Sineya. 11 Iye adacoka kudziko limweli aciyenda ku dziko la Asiriya, komweko adakamanga Ninive, Rehoboti-Ir na Kala, 12 na Reseni mzinda ukulu omwe uli pakati pa Ninive na Kala. 13 Mijiraimu adabala aLudita, aAnamu, aLehabu, aNafutu, 14 aPatirusi, aKasilu omwe adabala aFilisti na aKafitorita.

15 Kenani adabereka Sidoni mwana wace wakuyamba na Heti, 16 Pomwe na aJebusi, aAmori, aGirigasi, 17 aHivi, aAriki, aSini, 18 aAravadi, aZemari na aHamati. Patsogolo pace madzinza ya aKenani yadabalalika. 19 Malire ya aKenani yakhayambira kuSodoma mpaka kuJerali kufikira kuGaza ndipo kucokera kumweko yakhayenda mpaka kuSodomu, Gomora, Adima na Zeboimu kufika ku Lasa.

20 Wana wa Hamu mbawa, malingana na dzindza liwo na cirewedwe mumidzi na mumadziko mwawo.

21 Semu, mkulu mbale nkulu wa Jafeti, adabelekambo wana. Semu akhali kholo la wana wentse wa Eberi. 22 Wana wa Semu mbawa: Elamu, Asuri, Aripakisadi, Ludi na Aramu. 23 Wana wa Aramu mbawa: Uzi, Hulu, Jetere na Masi. 24 Aripakisadi adabereka Sala, ndipo umweyu adabereka Eberi. 25 Kwa Eberi kudaberekedwa wana awiri: M'bodzi adacemeredwa Peleji, thangwe panthawe ya moyo wace, dziko likhadagawika. M'bale wace adacemeredwa Jokotani. 26 Jokotani adabereka Alimodani, Selefi, Hazara-Maveti, Jera, 27 Adoramu, Uzali, Dikila, 28 Obala, Abimaele, Saba, 29 Ofiri, Havila na Jobabu. Wentsenewa akhali wana wa Jokotani. 30 Ndipo adakhala kuyambira ku Mesa mpaka ku Sefari mumapiri ya kumabvadzuwa. 31 Bzizukulu bza Semu ni ibzi, malingana na madzinza na malewedwe yawo, mumidzi na mumadziko yawo.

32 Madzinza ya bzizukulu bza Nowa, malingana na mibadwe na mitundu yawo. Kucokera mwa iwo mbumba idabalalika catamala cigumula.