15
Nyimbo ya Mozeji
1 Pamwepo, Mozeji na aIjirayeri adaimba nyimbo iyi kuna Mbuya, ndipo adati:
“Nin'dzaimbira Mbuya
pakuti awina mwautumbi.
Adathusa m'nyandza haci
na wakufamba nayo wace.
2 Mbuya ni mphambvu yangu
ndipo ni nyimbo yangu.
Iye ni cipulumuso cangu!
Iye ni Mulungu wangu, ndipo ine nin'dzamutumbiza,
ni Mulungu wa baba wangu, ndipo ine nin'dzamukuza.
3 Mbuya ni wankhondo,
Dzina lace ni Mbuya,
4 Iye adathusa munyandza
ngolo za nkhondo
na acikunda wa Falau.
Wakulemekezeka wace wabwino
adamira muNyandza Ifuira.
5 Madzi yakuzika yadawampsinkha,
adamira pantsi ninga mwala.
6 “Mbuya, boko lanu lamadidi
lina ulemelero mwa mphambvu lace.
Mbuya, boko lanu lamadidi
lidagwata-gwata anyamadulanthaka.
7 Mukukunda kwanu kukulu
mudagwesa omwe ankupindukirani.
Mudatumiza ukali bwanu bwakugaka ninga moto,
bomwe budawatentha ninga mausva.
8 Na kufuliza kwa mphambvu kwa mphuno zanu
madzi yadagwezekana.
Madzi yakuyerera
yadaima ninga litsito.
Madzi yakuzika
yadauma m'kati mwa nyandza.
9 “Nyamadulanthaka akhambabzitumbiza aciti:
‘Ine nin'dzawatewera ndiciwaphata,
nin'dzagawa bzinthu bzawo
nin'dzatenga bzomwe nin'funa.
Na cisenga m'manja,
ine nin'dzawadzonga’.
10 Tsono mudatumiza mphepo yanu,
ndipo nyandza idawamiza.
Adamira ninga utale bwa cumbu
m'madzi mazinji.
11 “Mbani pakati pa mirungu
adalinganira na imwe, Mbuya?
Mbani adalinganira na imwe,
wakulemekezedwa mwa kucena,
wakugosva thangwe ra mabasa yanu
ya ulemerero ndipo yakudabwisa,
omwe ambakondza bzidabwiso?
12 Mafuthula boko lanu lamadidi,
ndipo mataka yadawakhudyula anyamadulanthaka.
13 Na lufoi lanu lakusaya kucinja
mwatsogolera mbumba yomwe mudalombola.
Na mphambvu zanu
Imwe mwaitenga kumbuto yanu yakucena.
14 Madziko yambabva,
ndipo yambatekenyeka.
Mantha makulu yambafikira
wanthu wa dziko la Filisti.
15 Atsogoleri wa dziko la Edomu
ambamala mphambvu,
atongi wa dziko la Mowabi
ambaphatidwa na mantha,
wanthu wentse wakukhala
mudziko la Kenani ambathetha.
16 Kutetemera na mantha bziniwagwera,
kudzera mwa mphambvu za boko lako
ambakhala pulu ninga mwala,
mpaka mbumba yako ipite,
oh Mbuya,
mpaka ipite
mbumba yako yomwe udagula.
17 Iwe udzaipitisa, ucidzaibzala
paphiri ra utaka bwako,
oh Mbuya,
pambuto yomwe udakondza kuti ikhale pakukhala pako,
nyumba yakucena, oh Mbuya,
yomwe manja yako yadakondza.
18 Mbuya an'dzakhala mambo mpaka kuyenda-na-kuyenda”.
19 Pomwe makavalo ya Falau, ngolo za nkhondo na wakufamba na makavalo wa Falau adapita munyandza, Mbuya adabwezera madziyo ndipo yadawamiza, tsono aIjirayeri adayambuka nyandzayo mwakufamba na minyendo pakuuma.
20 Pamwepo Miriyamu mpolofita wacikazi, mpfumakazi ya Aloni, adatenga kang'oma, ndipo akazi wentse adamutewera akhaimba tung'oma acimbabzina. 21 Ndipo Miriyamu akhawatawira mwakuimba aciti:
“Imbirani Mbuya,
nakuti wakunda mwautumbi.
Adathusa m'nyandza kavalo
na wakufamba naye”.
Madzi ya kuwawa
22 Patsogolo pace Mozeji adatsogolera aIjirayeri kucokera kuNyandza Ifuira mpaka kucidambo ca Suri. M'kati mwa ntsiku zitatu adafamba mucidambo alibe kuwona madzi. 23 Ndipo adafika kuMara, tsono alibe kukwanisa kumwa madzi ya kumweko, thangwe yakhawawa. Ndipopo mbutoyo imbacemeredwa Mara.
24 Ndipo mbumba idadandaulira Mozeji iciti: “Kodi tinimwa ciyani”? 25 Mozeji adapemba mwakudandaula kuna Mbuya, ndipo Mbuya adamuwonesa kamuti. Mozeji adakathusa m'madzi, pamwepo madziyo yadakhala yabwino.
KuMarako Mbuya adawapasa mitemo na malamulo, aciwayeza 26 aciti: “Mukabvera bwino Mbuya Mulungu wanu, mucicita bzomwe Iye an'dekedwa nabzo, mucimbateweza malamulo yace na kukoya mitemo yace yentse, nin'dzakubwereserani lini matenda yali-yentse yomwe Ine ndidabweresera aIjipito, pakuti Ine ndine Mbuya omwe nimbakupozani”.
27 Patsogolo pace, adafika kuElimu, komwe kukhana micera ya madzi khumi na miwiri (12) na makanjedza makumi manomwe (70). Ndipo adamanga misasa pafupi na madziyo.