1 Jezu adacoka kumweko,acikafika kumui kwace pabodzi na wakupfunzdzira wace. 2 Pomwe idafika ntsiku ya malinkhuma, Iye adayamba kupfundzisa mnyumba yamapemphero. Wanthu azinji omwe akhamutetekera adadabwa kwene-kwene acimbalewa kuti, “Kodi mamuna umweyu adabzipfunzdira kuponi bzentsenebzi? Udziwi bumwebu adabuwona kuponi? An'kwanisa tani kucita bzidabwiso tenepayu? 3 Kodi omweyu ndiye lini misiri wa matabwa ule, mwana wa Maliya? Kodi abale wace ndiwo lini Tiyagu, na Zuze, na Judasi, na Sirimau? Ndiye lini omwe ana mfuma-kazi tinazozi?” Na tenepo alibe kufuna kudzadziwa pomwe bza iye . 4 Tsono Jezu adawauza kuti, “Mpolofiti ambalemekezedwa kumbuto zinango, kupambula kumui kwawo, pakati pa abale wace, ndipombo kunyumba kwawo.” 5 Na tenepo angadacita lini bzidabwiso kumweko. Adandosanzika manja kwa wakuduwala ang'ono-ng'ono, aciwalimbisa. 6 pamwepo iye adadabwa pakuwona kuti wanthu wakumweko alibe kukhulupirira. Pambuyo pace Jezu adayenda ku mii ya mmphepete, acimbapfundzisa wanthu.

7 Jezu adacemera wakupfundzira wace khumi na awiri aciwatuma awiri-awiri. Aciwapasa mphambvu yakucosera mizimu yakuipa 8 Aciwalamula kuti, “pakuenda lekani kutenga cinthu ciri-centse, kupambula mpsimbo yokha. Lekani kutenga cakudya, ayai gumbu lakufamba nalo, ayai kobiri mukabudu. 9 mubvale xango zokha, tsono lekani kunyamula bzakubvala bziwiri.” 10 Adawauza pomwe kuti, “Mungafika pa mui,mucitambiriwa khalani pamwepo, mmpaka nthawe yanu yakucoka ikwane 11 Penu kumbuto kwinango wanthu an'kutambirani lini, acilamba kubva mafala yanu, pakucoka kwanu mukunkhumule pfumbi la minyendo yanu. Cimweci cin'dzakhala cizindikiro cakuti wa-na mulandu.” 12 Tsono wakupfundzira wale adayenda, acimbalalikira wanthu kuti asandulike mtima. 13 Akhacosa mizimu yakuipa mizinji, ndipombo acimbadzoza mafuta wanthu wakudwala azinji acimbawalimbisa.

14 Mambo Herodi akhadabzibva bzimwebzi, thangwe mbiri ya Jezu likhadabveka kwentse-kwentse. Wanthu winango akhati, “Juwau M'batizi adamuka kwa wakufa, ndipopa ali kucita bzidabwiso bzentsenebzi.” 15 Tsono winango akhati, “Ayai, omweyu ni Eliya.” winango akhati, “Uyu ni mpolofiti ninga m'bodzi wa apolofiti wakale.”

16 Pomwe Herodi adabva bzomwebzo, adati, “Adamuka kwa wakufa ule, ni Juwau omwe ndidagwata khosi.” 17 Thangwe Herodiyo kale adatuma acikunda wace kuti akam'phate Juwau, akam'mange acithusa m'kaidi. Adacita bzimwebzire thangwe ra Herodiasi, m'kazi wa Filipe, m'bale wace. na kuti Herodi akhadamulowola m'kaziyo. 18 Ndipo Juwau akhambamuuza kuti, “Nkhuponya Mtemo kupsokhonyola m'kazi wa m'bale wanu.” 19 ndipo Herodiasi akhambawenga Juwau, na tenepopo akhafuna kuti amuphe. Tsono akhataza, 20 thangwe Herodi akhambamgopa Juwau, pakudziwa kuti akhali munthu wakulungama acilungama. ndipopo akhamkoya bwino. Akhafuna kumbabva mafala yace, ngakhale kuti akumubva tenepo, akhamala ndzeru naye. Lev. 18.16.

21 Tsono pa ntsiku yakukondwerera kubadwa kwa Herodi, Herodiasi adawona mphata. Herodi ule adakondza uzokoto, acicemera akulu-akulu wa Boma, na akulu wakutonga acikunda, na atongi wa ku Galileya. 22 Ndipo mwana wacikazi wa Herodiasi adapita, aciyamba kubzina.herodi na wakucemeredwa wale adakomedwa Kwene-kwene nakubzina kule. Pamwepo mambo adauza mtsikana ule kuti, “Undikumbire ciri-centse comwe un'funa, ine ninkupasa.” 23 Na tenepo adalumbira aciti, “Ciri-centse comwe undikumbira, ninkupasa, ngakhale cipande ca umambo bwangu.” 24 Mtsikanayo adacoka acikabvundza mai wace kuti, “Kodi ndikakumbire ciyani?” Mai wace adati “Kakumbire msolo wa Juwau M'batizi.” 25 Ndipo Mtsikana ule adabwerera mwa kankulumize kwa mambo acimuuza kuti, “nifuna kuti tsapanopa mundipase msolo wa Juwau M'batizi mphande!” 26 Na tenepo mambo Herodi adabva ntsisi kwene-kwene. Tsono thangwe ra kulumbira komwe akhadacita patsogolo pa wakucemeredwa, mambo akhafuna lini kupfudza cipangano comwe adacita na mtsikana ule. 27 mwakamkulumize adatuma m'bodzi wa acikunda wace, kuti abwerese msolo wa Juwau. ncikunda ule adayenda ku kaidi,acikagwata msolo wa Juwau. 28 Adauikha mphande acidzaupereka kwa mtsikana ule, mtsikanayo nkhukauperekambo kwa mai wace.

29 Wakupfundzira wa Juwau pomwe adabva bzimwebzo, adabwera acidzatenga nkhawa ire acikapendesa mucigwindza kuthenje.

30 Atumiki adabwerera kwa Jezu acimufotokozera bzentse bzomwe adacita na kupfundzisidwa. 31 Jezu adawauza kuti “Mbatiyendeni kumbuto imbapita lini wanthu, kuti mukapume pang'ono.” Adalewa terepo thangwe wanthu akhali nyalu-nyalu, nakuti iwo akhalibe phata wa kuti angada'kwanisa kudya 32 cadidi iwo adapita mmwadiya acienda okha kumbuto komwe kukhalibe wanthu 33 Tsono wanthu azinji adawaona pakucoka, aciwazindikira. Na tenepo adathamanga na n'gambo ire kucokera ku mizinda yentse, acitoma kufika, Jezu na wakupfundzira wace wale akhanati kufika. 34 Pamwe Jezu adacoka mmwadiya, adaona mthithi ukulu wa wanthu. Adawabvera ntsisi, thangwe wakhali ninga mabira yakusaya makabusa, na tenepo adayamba kuwapfundzisa bzizinji. 35 Nthawe ya kumaulo wakupfundzira wace adadzamuuza kuti, “Kuno nkhuthengo, ndipo kwadoka 36 Auzeni wanthuwa wayende,wakadye m'mii yomwe iri pafupiyi kuti akagule cakudya.” 37 Tsono Jezu adawauza kuti, “Imwepo apaseni cakudya.” Iwo adati, “tsono kuti wakwane wathuwa, pafunika kuti tikagule mkate wa kobiri za parata zikwanira madzana mawiri kuti tidzawadyese wentsewa!” 38 Na tenepo Jezu adawabvundza kuti, “Muna mikate mingasi? Ndokoni mukaone.” Adayenda kukaona ndipo adati, “Iripo mikate mixanu na ntsomba ziwiri.”

39 Ndipo Jezu adawawuza kuti, wentse wakhale pantsi kabugwe-kabugwe pakapinga. 40 Cadidi wanthu wale wadakhala pantsi,bungwe linango wanthu dzana, linango wanthu makumi maxanu. 41 Jezu adatenga mikate mixanu ire na ntsomba ziwiri zire, aciyang'ana kudzulu, acitenda Mulungu. Tsapano adayamba kugwata-gwata mikate ire,na ntsomba ziwiri acinjedza-njedza acipereka kwa wakupfundzira wace kuti wagawire wanthu wale. 42 Wanthu wentse adadya mpaka kukhuta. 43 Pambuyo pace wakupfundzira wale,wadatewnga mikate yakusala na ntsomba zire acidzaza madengu khumi na mawiri. 44 wanthu omwe adadya mikate ire kuwerenga amuna okha akhakwana bzulu bzixanu.

45 Watandomala, Jezu adawauza wakupfundzira wace kuti wapite mmwadiya, watsogole kuyenda n'gambuire ya Betsaida,Iye akhamba ngonekambo nthiti ule wa wanthu kuti wayende kwawo. 46 pomwe adagonekana nawo, adakwira ku phiri kukapemphera. 47 pomwe kukhayamba kudoka,mwadiya ule ukhali pakati nakati ya nyadza, Jezu akhali yekha kunja. 48 Ndipo adaona wakupfundzira wale akhacapa mwakuneseka, thangwe akhayenda kukhacokera condzi.yomweyo ikhali nthawe ya Madandakweca, Jezu adafamba padzulu pa madzi aciyenda kuna iwo acicita ninga an'funa kuwapitirira. 49 Tsono wakupfundzira wale, pakumuwona acifamba padzulu pa madzi, adakumbuka kuti nciphoko, adayamba kukuwa, 50 nakuti wentse pakumuona wadakhala na mantha. Tsono nthawe yomweyo Jezu adawauza kuti, “limbikani mtima ndine, lekani kugopa.” 51 Pamwepo iye adapita mmwadiya momwe iwo akhali,ndipo codzi cidaleka. Iwo adamalidwa ndzeru 52 thangwe alibe kubvesesa bwino bza kutupisidwa kwa mikate ire.thangwe akhalibe nabzo thupo.

53 Jezu na wakupfundzira wace adayambuka gombe, acifika ku Genesalee, acitsamisa mwadiya pagombe. 54 Pomwe iwo adandocoka mmwadiya, mbumba idamuzindikira Jezu. 55 wadathamangira ku mbuto zentse za mbali ire, aciyamba kumbabwera na wanthu wakuduwala pa macira, kumbuto komwe akhabva kuti Jezu ali uku. 56 Kuli-kwentse komwe Jezu akhayenda, ku mii na ku mizinda, wanthu akhadzakhazika wakudwala mmisika. Acimukumbira kuti abvumize wakuduwalayo kuphata ayai kondomukhuya bzakubvala bzace. Nakuti wentse omwe akhakhuya, akhalimba.