1 Ndipo Jezu adauwza ateweri wace kuti: “Pakhana munthu m'bodzi nyakudala, omwe akhana msunga cuma wace. Ndipo wanthu adamulewera kuti iye akhaba bzinthu. 2 Ndipo iye adamuceresa acim'bvundza kuti: “Kodi mpsiyani ndiri kukubvera nung'u-nung'ubzi? Ndiwuze maphatiro yako ya basa yentse. Nakuti iwepo un'khala lini pomwe msunga cuma. 3 Ndipo msunga cumayo adakumbuka kuti: “Kodi ine-pano ni'ncita tani? Thangwe mbuyayu ali kundicosa basa. Nakuti ine kulima nin'kwanisa lini. Napo kupempheza ndina manyazi. 4 Ndipo ndikadzacosedwa basa, ndinidziwa kale bzakucita kuti wanthu adzanditambire m'manyumba mwawo. 5 Na tenepo iye adacemera wanthu wentse omwe akhana mangawa na mbuya waceyo. Ndipo iye adabvundza wakuyamba kuti: 'Kodi imwepo muna mangawa ya tani na mbuya?' 6 Ndipo iye adatamutawira kuti: 'Ndinaye mangawa migolo dzana ya mafuta yakudya. Na tenepo iyembo adamuwuza pomwe kuti: 'Ndoko ukanembe makumi maxanu.' 7 Ndipo adabvundza pomwe mwinango kuti: 'Kodi imwembo, munaye mangawa ya tani?' Ndipo iye adatawira kuti: 'Ndinaye mangawa masakha dzana ya cimanga.' Pamwepo adamuwuzambo pomwe kuti: 'Ndoko ukanembe makumi masere.' 8 Ndipo mbuya ule adamutenda msunga cuma wakusaya kulungamayo na thangwe ra kucenjera. Nakuti dzindza la wanthu wa mudziko lidacenjera kwene-kwene, kuposa wanthu wa ceza ca Mulungu.” 9 Tsono ine ndi'nkuwuzani kuti: “Imwepo yanyani uxamwali na cuma ca pantsi pano kuti cikadzamala, mudzatambiridwe bwino m'manyumba zakusaya kumala. 10 Nakuti munthu ule omwe ngwakukhulupirika na bzinthu bzing'ono-ng'ono, ndipo iye ngwakukhulupirikambo na bzizinji. Na ule omwe ngwakusaya kulungama na bzinthu bzing'onong'ono, ndipo iye ngwakusaya kukhulupirikamambo na bzizinji. 11 Penu mun'kukhulupirika lini na cuma ca dziko la pantsi, kodi mbani an'dzakukhulupiranimbo na cuma ca cakudzulu? 12 Penu mun'kukhulupirika lini na bzinthu bza andzanu, kodi mbani an'dzakupasanimbo bzinthu bzanu letu? 13 Nakuti palibe munthu omwe angaphatira basa ambuya awiri. Thangwe an'dzawengana na m'bodzi acibverana na mwinango. Ayai an'dzayenda kuna m'bodzi acilova kuna mwinangoyo. Na tenepo lekani kuphatira basa Mulungu na kobiri.

14 Pomwe afalizeu adabva bzimwebzo adamuseka Jezu thangwe iwo akhafuna kobiri kwene-kwene. 15 Ndipo iye adawauza kuti: “Imwepo mumbabziyesa kuti ndimwe wanthu wakulungama. Tsono Mulungu ndiye an'dziwa mitima yanui. Cinthu ciri centse comwe wanthu ambayesa kuti cina basa kwene-kwene, kuna Mulungu ciribe na basalo. 16 Ndipo mtemo wa Mozeji na mapfundzisidwe ya Apolofeta bzidakhala mpaka panthawe ya Juwau M'batizi. Kucokera pamwepo Umambo bwa Mulungu buli kupalizidwa. Na tenepo wanthu wentse ali kucita mphambvu kuti apite. 17 Ndipo bzingadapusa kuti munthu amalise pantsi na kudzulu, kuposa kucosa fala libodzi lokha mu Mtemo. 18 Munthu omwe ani lamba mkazace acikalowola mwinango, iye ali kucita upombo. Ndipo na ule omwe anilowolambo mkazi wakulambidwayo iye ali kucita upombo.

19 Pakhana munthu m'bodzi wakudala kwene-kwene. Ndipo iye akhabvala bzakuwumira, acidya bzinthu bzakufewa. 20 Na tenepo pacipata pace padadzagonambo ntsauke ibodzi dzina layene Lazalo iyo ikhaduwala mphezi. 21 Na tenepo iye akhabwera kuti adzadye tumbvululu tomwe tukhasala-sala patsantsali la kudyera la nyakudalayo. Ndipo mbwayambo zikhabwera kudzamunyanguta mafinya. 22 Tsono ntsauke ire idadzafa ndipo anjo wa Mulungu adaitenga aciyenda nayo kuna Abramu. Ndipo nyakudala ule adadzafambo pomwe acikapendesedwa. 23 Pomwe iye akhali kumoto, acimbabonera ndipo adanyang'anisa aciwona kutali Abramu na Lazalo omwe akhnaye pafupi. 24 Ndipo iye adakuwa aciti: “Baba Abramu ndibverenimbo ntsisi! Tumani Lazalo kuti akatibzike cala cace m'madzi kuti adzandijejeresembo lirime thangwe kuno ndiri kubonera na moto. 25 Ndipo Abramu adatawira kuti: “Mwanangu, kumbuka kuti iwepo ukhakhala bwino pomwe ukhana moyo. Tsono Lazalo akhabonera. Tsapano lino iye ali kukhala bwino kuno, ndipo iwepo uli kubonerambo tsapano. 26 Ndipo pakati pathu imwepo na ife pana cidindi cakuzika kwene-kwene. Na tenepo wale omwe an'funa kubwera kumweko an'kwanisa lini. Ndipombo wale omwe an'funa kubwera kuno an'kwanisambo lini.” 27 Ndipo iye adatawirambo kuti: “Ndiri kukumbirani Baba kuti mum'tume Lazaloyo ayende kunyumba kwa babangu. 28 Thangwe ndina abale wangu axanu. Ndipo iye akawacenjeze kuti iwo asaye kubwerambo kumbuto ya kubonera ino.” 29 Na tenepo Abramu adamutawira kuti: “Iwo ana Mozeji na Apolofeta ndipo iwo mbaabvere kumweko.” 30 Ndipo iyembo adati: “Ne- ne-ne, Baba Abramu! Angadayenda munthu wakufa kukawawuza pinango iwo angadakhumbula.” 31 Tsono Abramu adamuwuza kuti: “Iwo akasaya kubvera Mozeji na Apolofeta napo anyakufa akamuka andzawabvera lini pomwe basi.”