4 Munthu ali wentse omwe ambacita bzakuipa na iyembo ambaphonya mtemo thangwe kucita cakuipa nkhuphonya mtemo. 5 Dziwani kuti iye adabwera kuti adzacose bzakuipa nakuti iye alibe cakuipa. 6 Munthu ali wentse omwe ana iye ambacita lini cakuipa, tsono ule omwe ambacita cakuipa alibe kumuwona ndipo alibe kumudziwa pomwe. 7 Tuwana twangu, lekani kunamizidwa na munthu, thangwe ule omwe ambacita bzakulungama ngwakulungama, nakuti iye ngwakulungamambo. 8 Munthu ule omwe ambacita cakuipa ngwa Dyabu, thangwe Dyabu ngwakuphonya kucokera pakuyamba. Na tenepo Mwana wa Mulungu adabwera kuti adzapfudze mabasa ya Dyabuyo. 9 Munthu ali wentse omwe ni mwana wa Mulungu ambacita lini bzakuipa thangwe mzimu wa Mulungu una iye, na tenepo iye angakhale lini acicita cakuipa nakuti iye ngwa Mulungu. 10 Uku ndiko kusiya kwa wana wa Mulungu na wa Dyabu: munthu ali wentse omwe ambacita lini bzakulungama na kusaya kucitira lufoi m'bale wace, ni mwana lini wa Mulungu.

11 Nakuti fala lomwe mudabva kucokera pakuyamba ndiri kuti ife-pano ticitire lufoi andzathu. 12 Mbatileke kukhala ninga Kaimi, omwe akhali wa Sathani, iye adapha m'bale wace. Kodi thangweranyi iye adamupha? Thangwe mabasa yace yakhali yakuipa ndipo ya m'bale wace yakhadalungama. 13 Abale, lekani kudabwa akakuwengani wanthu wakusaya kudziwa Mulungu. 14 Ife-pano tin'dziwa kuti tikhadafa, tsapano tamuka pomwe ndipopo tina lufoi na abale wathu, natenepo munthu an'saya kucita lufoi na m'bale wace omweyo akhali paimpfa. 15 Munthu ule omwe aniwenga m'bale wace omweyo ni kambowa ndipo imwepo mun'dziwa kale kuti kambowa ali wentse alibe moyo wakusaya kumala mumtima mwace. 16 Na tenepo timbadziwa kuti lufoi n'ciani: Nakuti Krixtu adapereka moyo wace na thangwe lathu ndipo na ifembo mbatiperekembo moyo wathu na thangwe la abale. 17 Penu munthu adadala ndipo akawona m'bale wace ali kubonera acisaya kum'bvera ntsisi, iye angakhale tani na lufoi la Mulungu? 18 Tuwanamwe, mbatileke kulatiza lufoi la mafala ya pamuloma pokha, tsono mbalikhale la cadidi.

19 Na tenepo, ife tin'dziwa kuti ndife wa cadidi, na tenepo tin'dzaderekha mtima pana iye. 20 Penu mtima wathu unilamba pamwepo tin'dziwa kuti Mulungu ni mkulu cadidi kuposa mtima wathuyo, iye an'dziwa bzinthu bzentse. 21 Wakufunidwa, penu mtima unilamba lini, ndipo ife tina cikhulupiro kuna Mulungu. 22 Bzinthu bzentse bzomwe tin'kumbira kuna iye tin'bzitambira thangwe timbateweza mitemo yace nakuti timbacita bzinthu bzomwe bzimbamukomera. 23 Tsono, mtemo waceyo nguyu: kuti tibvume mudzina la Mwanace Jezu Krixtu, ticicitira lufoi andzathu, ninga momwe iye adatiwuzira. 24 Ndipo munthu ule omwe ambateweza mitemo yace iye ana Mulungu, na Mulungumbo ana iye. Na tenepo tin'dziwa kuti Mulungu ana ife thangwe la mzimu omwe iye adatipasa.