1 Sahou randra le ma bwena mene badeh, iri kandriyen ta atudun nyaran udu aliy, eme ma iri bwidi ndrahune lau ta atudun nyaran, na mine iri amwenen. 2 Iri tutuni asiu balei i loken, iri apwai bolon ili la-uh na kolau tinan. No-on ranah ili manan doh iri aloh kon ndrabun. Udu bolon badeh, lakou ari ta ndrahune sun ere aliy,* Lakou ari iri amekes na bek nyikilikin ma ndro taloh i buku kandro mine ndramak, ta sun anya ere aliy. ma sau hawe jabi ramen ta adeu salom i ta Kindrei. 3 Bolon udu alih hamon ta kolau tinan nane doh iri aloh ndrok ndrabun ndrabun labai† San rasan le ta bolo jaha ari, tinan tiri pris le ari ili bolo asiu ndrok ndrabun ndrabun labai doh. ta mada Kindrei. 4 Udu bolo asiu hamon nane doh iri atehei mada koto-ok ta asun lakou manahu buburen, hawe bwisi sahou randra le‡ Bwisi sahou randra le doh, boho iri jam aloh bokis kontrak bilong God. Iri lakou udu bolon ta amekes iri Isra-el abudon lahou ta Kindrei amekes i tiri. iri bwidiy na kei, ano iri tubuluhiy na bek nyikilikin. Udu bolo bwisi sahou randra le doh badeh, sabok iri amekes na bek nyikilikin udu aliy, ma bolo sabok doh, nyamon iri aloh mana udu bolon. Bolo bwisi sahou randra le doh ale kandro ta Aron nyabun ma sisinen ateh ja ere aliy,§ Kandro ta Aron doh ndrabosar, arile sisinen ateh ja, la-un, nyandren, ma hawe buwan udu bada kandro nane. Ou anyolom udu ta buk ta Namba 17:1-12. hawe bek malahan ma lusi, Kindrei torowenei sahou randra le ta batanau ma ronoh udu aliy. 5 Udu bwele-e bwisi lakou nane doh, iri bwidi lakou la-uh, kone uru buku angelo.** I boho iri Hiburu badeh, iri aloh lakou ma la-uh doh, Serubim Uru doh leheya lomada Kindrei i buku iy udu bwele-e bwisi lakou doh. Udu bahandra koroha bani uru, kon ta leheya tikisiy ta Kindrei udu aliy. Kon doh ta toboroya ndra ta mani kandriyen ndra-in tiri lau iu. Arile, na dah, jo winiyan basihidi kati iri sahou marakon doh bwai.

6 Iri bwidi lakou marakon udu ndrahune iri ano. Len marakon, iri pris ala bolo asiu ranah ili manan, iri aloh kon ndrabun, ta amekes gok ta atudun Kindrei. 7 Arile, tinan tiri pris le winiyan ili bolo asiu ndrok ndrabun ndrabun labai nane doh. Buku iy babwese ndraye bulumakau o sipsip bwe, iy winiyan bala bolo asiu ndrabun doh bwe. Iy ili bolon san rasan le ta bolo jaha ari, ma ndra udu minen ta salom tan amwenen, ma ta salom tiri lau nane amekes kandriyen ndra-in, arile iri bala tanan ta idoh kandriyen ndra-in bwe. 8 Ta kandriyen doh, eme ma Malawin Ndrabun leheya taha i buku doh: Buku asiu balei bwena mene ales kahis, ma amekes gok udu aliy kahis le, san nane ta ala mada Kindrei ta ala bolo asiu ndrabun handru doh badeh, basak bwe le. 9 Lakou mene asahan bolo asiu ndrok ndrabun ndrabun labai, idoh leheya sahou sokek, na idah eme tataha. Udu bolo asiu ta Kindrei doh, iri pris adeu iri ndramas solo-an ili ta Kindrei, ma iri ale adeu salom solo-an ili tan. Arile, iri lakou doh winiyan babwidi ndrine iri o budon tiri lau ta atudun Kindrei bwe. Eme ma iri winiyan baruwani maha-an mene iri atona ta iri kandriyen ndra-in iri amekes bwena bwe. 10 Tasah iri ndramas ma salom solo-an doh, ta nyamon, ta gwa ta a-un, ma iri lakou solo-an ta anyu. Iri kandriyen doh ta bada lau le, ta iri ka-en hamon ta aliy, winiya le len ta Kindrei kameh baramekes iri lakou marakon amwenen ma i ha-un ja.

11 Arile Krais ndrame ndrasahan tinan tiri pris ta iri lakou mwasin nane ndrame tataha. Iy ili bolo asiu balei handru ta Kindrei udu kandrah. Asiu balei doh ja, mwasin labai ta asiu balei tiri mwena. Asiu balei badu kandrah nane doh, iri lau bamekes na mine iri bwe, tasah iy badu kon munyak dah bwe. 12 Iy ili bolon alih nane ndrabun ndrabun labai en, iy bakohok ndraye ari me ma bulumakau ta adeu salom i ta Kindrei, bwe. Iy amekes salom badeh, san rasan le, iy atehei kohan ma ndrayen amwenen ili ta Kindrei. Kohan ma ndrayen doh winiyan bano bwe, eme ma, iy winiyan sebenei taha ta udu le buku doh. 13 Ndraye iri me ma bulumakau mwan, ma hawe koloweh ta nadu bulumakau badih nane iri ndrasulumwiy ndrandrakak, iri ame toboroya koloweh hawe ndra doh ili bwele-e iri lau nane basikine ndraka-an tiri ba-au bwe. Iri amekes i buku doh ta bada iri le kameh asahan ndrabun, ma ari ndraka-an bwe. 14 Arile, ndraye Krais doh udu bwele-en labai ja, ta ndraye me ma bulumakau. Iy atehei kohan mara-ei amwenen ili ta Kindrei i nyara salom. Eme ma ndrayen doh basikine ndraka-an ta bada taha le bwe, iy sikine taha mara-ei handru, ma ndrine taha batona maha-an ja ta iri ndra-in mwena mene taha amekes, bwe. Ma iy tolowei iri kandriyen solo-an, taha amekes laleyah, ari kohan handru amwenen bwe. Eme ma taha katawiy kihis gok ta Kindrei doh, kohan handru udu aliy. Tasah, Krais ari ndra-in bare tan bwe. Bwe labai. Ma na boto-on ta Malawin Mwasin, iy amekes gok doh kameh ta udu le buku doh. 15 Ta katin le doh, Jises ere le alih ta amekes sahou randra le ha-un doh abadok. Iy ndramak ta akunoh taha lau ame hamon ja, ma tolowei iri ndra-in marakon iri mene amekes mwena udu ndra bada sahou randra le ma bwena mene udu aliy kahis. Iy amekes tiri le lau nane Kindrei aloh iri, ta iri winiyan an hamon tan, ma ta iri winiyan akohok kohan doh mwena mene Kindrei tiye ta edeu ili ta nadun iri, ma ta iri kameh are mwasin ta udu le buku doh.

16 Buku ari ndramak iy tanan iy kameh imek, ma iy tiye ta are lau le winiyan akohok iri lokowan, iy luhi o torowenei nyara iri ma saba lakou handru iri akohok. Idoh i buku sahou randra le. Udu hamon ja, buku nadun anya ki-in hamon ta sahou randra le, ta akohok iri lakou ta taman, iri lau badeh katana iri mwena ta taman ndramak. Ano iy barakohok. 17 Tasah, sahou randra le taman asehek doh, iy udu ndra loken iy bamak bwe le, idoh sahou handru, arile lau ba-en hamon ta aliy bwe le. Udu winiya ndramak imek labai, iri bara-en hamon ta aliy ai. 18 Eme ta idoh le, kandriyen malen ta Moses mwena mene iri adai me o bulumakau, ano asolou ndrayen ta amekes sahou randra le tiri kabadok. 19 Moses asehek iri sahou batanau, ma kandriyen malen ili tiri lau, ano iy andrei ndraye nadu bulumakau ma me, hawe gwa, ma lami sipsip saraman bawei i bada andra kei ari iri aloh hisop. Iy eme tahiy ili bolo ndra, ano iy toboroya ili bwele-e buk ndrabun ta kandriyen malen, ma ili bwele-e iri lau. 20 Iy asehek i buku doh,

23 Iri lakou marakon udu bolo asiu balei ta Kindrei, idoh malawi le iri lakou marakon in kandrah, ma taha tanan, ndraye bulumakau ma me le sikine iri lakou doh. Arile iri lakou badu kandrah ja sakalawi iri lakou marakon badu munyak. Eme ma, kandriyen ta sikine lakou badu kandrah, udu bwele-en labai ja ta kon munyak. 24 Krais bala bolo asiu ndrabun nane lau atah na mine iri amwenen bwe, idoh malawi le asiu ndrabun handru ta Kindrei udu kandrah. Iy iu ili bolo kandrah amwenen. Iy ndrala mirihik hawe Kindrei, iy asehek taha i tan ma iy amekes gok ta aseben taha ale. 25 Tinan tiri pris ili bolo asiu ndrok ndrabun ndrabun labai ta bolo jaha marakon. Iy bakohok ndrayen amwenen bwe, iy ili hawe ndraye iri me o bulumakau. Pris doh edeu lakou san solo-an labai, arile Krais iu ili kandrah, ta iy amwenen ili bolon ta nyara salom san rasan le, iy bala buku iri pris ala san solo-an bwe. 26 Buku iy amekes san solo-an, idah kameh iy kabwese maha-an san solo-an labai, udu ndra bada len Kindrei amekes kon munyak asahan eme ano dah. Arile, na dah taha ndratanan, Krais ndrame kon munyak san rasan le ta edeu iy le amwenen ili ta Kindrei i nyara salom ta talou iri kandriyen ndra-in tataha iu. 27 Lau marakon kameh amak san rasan le, ano kameh iri asahan ta len ta sahou. 28 I buku le Krais amwenen atehei iy san rasan le i nyara salom ili ta Kindrei ta talou iri kandriyen ndra-in ta lau solo-an. Hamon kameh iy eme kon munyak ja. Arile, iy eme ta bwese ndra-in tataha ja bwe. Iy eme doh ta aseben ma ta akohok iri lau nane atondrok iy, ame hamon hawen.