12
Ʉkʉmmbombela Kyala
1 Po baamyɨtʉ ndwitɨko, nikʉbapyelesya kʉ kɨbabɨɨlɨsi ɨkya Kyala, mwiningege ʉkʉja ikemo ɨlyʉmi, ɨliikemo ɨlɨ likʉnkyela Kyala. Namanga ɨjo jo njɨla ɨnunu ɨjaa kʉmmwipuuta Kyala. 2 Mulɨngakongaga akajɨɨlo nɨ nyiiho ɨsya bandʉ abaa pakiisʉ apa, looli Kyala abasanusye mu ndumbula syɨnu ʉkʉtɨ muje nɨ nyiinogono ɨmbya. Apo po aamukʉmanya kʉ bwanalooli ɨnunu ɨsi Kyala ikʉlonda, ɨsi sikaagɨlwa na ɨsi sikʉnkyela.
3 Paapo Kyala ambeele iipyana ʉkʉja ntʉmigwa gwake, nikʉbabʉʉla ʉmwe mwesa nikʉtɨ, muleke ʉkwibona ʉkʉtɨ mubagiisye ʉkʉkɨnda muno mujɨɨliile. Looli mwinogonege kʉ mahala ʉkʉtɨ mwesa mupeeliigwe ʉlwitɨko lʉlalʉla na Kyala. 4 Ʉmbɨlɨ gʉlɨ gʉmogwene, leelo gʉlɨ nʉ tʉmbakaasya twingi. Kʉkʉtɨ kambakaasya kalɨ nɨ mbombo jaake. 5 Bʉbʉʉbo bo muno gʉjɨɨliile ʉmbɨlɨ gwa Kɨlɨsiti. Ʉswe twesa tʉlɨ mbɨlɨ gwake gʉmogwene. Kʉkʉtɨ mundʉ kambakaasya kamo akaa ntʉmbakaasya twingi ʉtwa mbɨlɨ gʉmogwene ʉgo.
6 Po leelo, Kyala kwi ipyana lyake, ampeele kʉkʉtɨ mundʉ ɨkɨkʉngɨlwa ɨkya lʉko lwake. Ʉgwa kɨkʉngɨlwa ɨkya bʉkunguluka, akɨbombelege ʉkʉkongana nʉ lwitɨko lwake. 7 Ʉgwa kɨkʉngɨlwa ɨkya bʉbombeli, ababombelege nɨ ndumbula joosa. Ʉgwa kɨkʉngɨlwa ɨkya bʉmanyisi, amanyisyege kanunu. 8 Ʉgwa kɨkʉngɨlwa ɨkya kʉbakasya abandʉ, abakasyege. Ʉgwa kɨkʉngɨlwa ɨkya kʉbatʉʉla abandʉ ɨfi baagiilwe, abapege nɨ ndumbula joosa. Ʉgwa kɨkʉngɨlwa ɨkya bʉlongosi, iijʉʉlege ʉkʉlongosya kanunu. Ʉgwa kɨkʉngɨlwa ɨkya kʉpaakɨsya, apaakɨsyege nʉ lʉsekelo.
Ʉkʉganana nkɨpanga kya Kyala
9 Mugananege kɨsita kʉsyobana. Mubʉbengege loosa ʉbʉbiibi boosa. Mwitotekege mu nunu akabalɨlo koosa. 10 Mugananege mwesa bo ʉlwa banyamundʉ. Kʉkʉtɨ mundʉ anyonywege fiijo ʉkʉmmwɨmɨka ʉnnine. 11 Muleke ʉkʉja boolo, looli mummbombelege ʉNtwa Jesu bo mukʉlongosigwa na Mbepo Mwikemo. 12 Namusekelege paapo mukʉsʉʉbɨla ʉkʉkaba ɨnunu ʉkʉfuma kwa Kyala. Mʉʉmɨɨlɨlege lɨnga ʉbʉtolwe bukʉbiisɨla, kangɨ munsʉʉmege Kyala akabalɨlo koosa. 13 Musangʉlege ɨfya kʉbatʉʉla abiitɨki biinɨɨnu. Kangɨ mujege bengo ʉkʉbambɨlɨla kanunu abaheesya mu nyumba syɨnu.
Muno sikʉlondeligwa ʉkʉbabombela abangɨ
14 Mubasajege abandʉ aba bikʉbafunda, mubasajege somma ʉkʉbaguna. 15 Musekelege pamopeene nabo aba bikʉsekela. Mulɨlege pamopeene na aba bikʉlɨla. 16 Mutʉʉgalege kanunu na biinɨɨnu. Mulɨngiituufyaga, looli mujege nʉ bʉlɨɨlanisi na bandʉ abafujufu, mulɨngiibonaga ʉkʉtɨ mubakɨndile amahala.
17 Abandʉ lɨnga bikʉbabombela ʉbʉbiibi, mulɨngababombelaga nuumwe ʉbʉbiibi. Looli musiinogonege fiijo ɨsi sikʉboneka ʉkʉja nunu kʉ bandʉ boosa. 18 Mubombege syosa ɨsi mubagiile ʉkʉsibomba ʉkʉtɨ mutʉʉgalege nʉ lʉtengaano na bandʉ boosa. 19 Bakʉndwe bangʉ, mulɨngabusyaga ʉbʉbiibi, looli munndekelege Kyala jo abombege ɨsyo. Namanga sisimbiigwe mwa Kalata ʉMwikemo ʉkʉtɨ, “ɄNtwa Kyala ikʉtɨ, ‘Ʉlʉbukɨsyo lo lwangʉ, nikʉbukɨsyaga jʉjʉʉne.’ ”* 12:19 Bala kalata gwa Ʉkʉkʉmbʉka Ɨngomeelesyo 32:35. 20 Ɨsya kʉsita kʉbukɨsya sisimbiigwe mwa Kalata ʉMwikemo ʉkʉtɨ,
“Lɨnga ʉndʉgʉ gwako alɨ nɨ njala, ʉmpege ɨfindʉ,
kangɨ lɨnga alɨ nɨ kyʉmɨlwa, ʉmpege ɨfya kʉnwa.
Namanga lɨnga kʉbomba bo ʉlo,
bo ʉmmbɨɨkiile ʉmooto ʉgʉ gukwaka pantʉ pamyake.”† 12:20 Bo ʉmmbɨɨkiile ʉmooto ʉgʉ gukwaka pantʉ pamyake Kokʉtɨ Bo gʉnkosiisye ɨsoni. Bala kalata gwa Ɨsya Mbʉpɨngamu 25:21-22.
21 Ʉlɨngatoligwaga nʉ bʉbiibi, looli ʉbʉtolege ʉbʉbiibi kʉ njɨla ɨjaa kʉbomba ɨnunu.