1 Ndɨnkʉlɨbona iinyamaana likʉsooka mu nyanja. Iinyamaana ɨlyo lyalɨ nɨ mbembe kalongo, nɨ mitʉ mihaano na mibɨlɨ. Kangɨ kʉkʉtɨ lʉpembe lyafwele ɨngɨga ɨjaa bʉtwa. Kʉkʉtɨ ntʉ gwalɨ nɨ ngamu ɨjaa kwijumbɨka ʉkʉtɨ lyo lya Kyala. 2 Iinyamaana ɨlɨ naalɨbwene lyafwene ni iboole, amalʉndɨ gaake gaafwene bo amalʉndɨ agaa ndubu,* 13:2 Ɨndubu kɨnyamaana ɨkɨnywamu, kangɨ kɨlɨ nɨ fyala ɨfitali. akanwa kaake kaafwene na kaa ngalamu. Ɨnyiifwɨla jɨla jɨlɨnkʉlɨpapo iinyamaana ɨlyo amaka gaake agaa kʉlongosya nʉ bʉlagɨli ʉbʉkʉlʉmba. 3 Ndɨnkʉgʉbona ʉntʉ gʉmo gwaboniike ngatɨ gʉlɨ nʉ bʉfulale ʉbwa kʉlɨgoga, looli ʉbʉfulale bʉlɨnkʉpona. Abandʉ boosa abaa pakiisʉ balɨnkʉlɨswiga nʉ kʉlɨkonga iinyamaana lɨla. 4 Balɨnkʉjiipuuta ɨnyiifwɨla, paapo jaalɨpeele iinyamaana ʉbʉlagɨli bwake. Kangɨ balɨnkʉliipuuta iinyamaana lɨla, balɨnkʉtɨ, “Jo jwani ʉjʉ afwene ni inyamaana ɨlɨ? Kangɨ jo jwani ʉjʉ abagiile ʉkʉlwa nalyo?”

5 Iinyamaana ɨlyo lɨlɨnkwitɨkɨsigwa ʉkʉjoba amasyʉ mingi agaa kʉntʉka fiijo Kyala. Lɨlɨnkʉpeeligwa ʉbʉlagɨli kʉkabalɨlo akaa myesi amalongo mana na mibɨlɨ. 6 Po lɨlɨnkwanda ʉkʉntʉka Kyala, nʉ kʉjɨtʉka ɨngamu jaake, nʉ bʉjo bwake, na boosa aba balɨ kʉmwanya. 7 Kangɨ lɨlɨnkwitɨkɨsigwa ʉkʉlwa na bandʉ baa Kyala nʉ kʉbatola. Lɨlɨnkʉpeeligwa ʉbʉlagɨli kʉ fikolo fyosa, nɨ njobelo syosa, nɨ fiisʉ fyosa. 8 Abandʉ boosa aba balɨ pakiisʉ apa bikwisa kʉliipuuta, looli abandʉ bamo batikwisa kʉliipuuta, kokʉtɨ aba ɨngamu syabo sisimbiigwe ʉkʉfuma kʉbwandɨlo bwa kiisʉ mwa kalata ʉgwa bʉʉmi ʉgwa Kangʼoosi, ʉjʉ aabooliigwe.

9 Ʉjʉ alɨ nɨ mbʉlʉkʉtʉ, jo apɨlɨkege.

11 Ndɨnkʉlɨbona iinyamaana ɨlɨngɨ, likʉfyʉka pamwanya ʉkʉfuma paasi pakiisʉ. Lyalɨ nɨ mbembe ibɨlɨ ɨsi syafwene nɨ mbembe sya kangʼoosi, looli lɨlɨnkʉjoba ngatɨ nyiifwɨla jɨla. 12 Po lɨlɨnkʉbombela ʉbʉlagɨli boosa ʉbwa inyamaana lɨla ɨlya kwanda pabʉjo bwake. Po lɨlɨnkʉbafimbɨlɨsya abandʉ boosa aba balɨ pakiisʉ ʉkʉtɨ baliipuute iinyamaana lɨla ɨlya kwanda, ɨlɨ ʉbʉfulale bwake ʉbwa kʉlɨgoga bwaponile. 13 Lɨlɨnkʉbomba ɨfiika ɨfinywamu, nʉ kʉsulusya ʉmooto ʉkʉfuma kʉmwanya ʉkwisa pakiisʉ nkyeni mmbandʉ. 14 Lɨlɨnkʉbasyoba abandʉ boosa aba balɨ pakiisʉ apa, kʉ njɨla jaa fiika fila ɨfi lyapeeliigwe ni inyamaana ɨlya kwanda ʉkʉfibomba. Lɨlɨnkʉlagɨla ʉkʉtɨ abandʉ batendekesye ɨkɨfwani ɨkya inyamaana ɨlya kwanda ʉkʉlyɨmɨka, ɨlɨ lyalɨ lyʉmi na paapo lyafulasiigwe nʉ lʉʉbo.

15 Iinyamaana lɨla ɨlya bʉbɨlɨ lɨlɨnkʉpeeligwa ʉbʉlagɨli ʉbwa kʉpuutɨla ʉmʉʉji nkɨfwani kɨla, ʉkʉtɨ kɨjobege. Kangɨ ʉkʉtɨ ɨkɨfwani ɨkyo kɨbagoge boosa aba bikʉkaana ʉkʉkiipuuta. 16 Iinyamaana ɨlya bʉbɨlɨ lɨlɨnkʉbafimbɨlɨsya boosa, abasisya na bafujufu, abakabi na balondo, abatʉmwa na baabʉke, ʉkʉtɨ babɨɨkigwe ɨkɨmanyilo pa fiboko fyabo ɨfiilɨɨlo pamo pa fyeni fyabo. 17 Kangɨ, lɨlɨnkʉlagɨla ʉkʉtɨ beene abandʉ bala balɨ nɨ kɨmanyilo ɨkɨ, bo bikwitɨkɨsigwaga ʉkʉʉla nʉ kʉʉlɨsya ʉtʉndʉ. Ɨkɨmanyilo ɨkyo jo ngamu jaa inyamaana lɨla ɨlya kwanda, pamo ɨmbalɨlo ɨjɨ jikʉfuma mu ngamu jaake.

18 Apo pikʉlondigwa amahala. Gwesa ʉjʉ alɨ na mahala, ajɨbale ɨmbalɨlo ɨjaa inyamaana lɨla, namanga ɨmbalɨlo ɨjɨ jo mbalɨlo jaa mundʉ jʉmo. Ɨmbalɨlo jaake jo 666.