21
Jesu ikwambɨlɨligwa na kaluulu kaa bʉtoli mu Jelusalemu
(Maalɨka 11:1-11; Lʉʉka 19:28-40; Johani 12:12-19)
1 Bo basegeliile mu Jelusalemu, balɨnkʉfika mu Betifage akaaja aka kalɨ kɨfuki nʉ bʉjo ʉbʉ bikʉtɨ Kyamba kya Misyʉngʉtɨ. Po Jesu alɨnkʉbatʉma abafundigwa baake babɨlɨ, 2 alɨnkʉbabʉʉla alɨnkʉtɨ, “Namubʉʉkege nkaaja kala aka kalɨ nkyeni mmyɨnu. Bo mwingiile mula, nakalɨnga mukwakʉjaaga ɨmbunda jɨkʉngiigwe pamopeene nɨ mwana. Po mukasyabʉle, mundwalɨle. 3 Lɨnga ʉmundʉ ikʉbalaalʉʉsya, mukatɨgɨ, ‘ɄNtwa afumbilwe nasyo,’ nakalɨnga ikwakʉsitʉma.”
4 Syosa ɨsi syabombiigwe bo ʉlo ʉkʉtɨ iisyʉ lɨla lɨboneke ɨlɨ Kyala aalɨjobile, kʉ njɨla jaa nkunguluka ʉkʉtɨ,
5 “Mubabʉʉle abandʉ abaa mu Syoni* 21:5 Syoni ngamu ɨjɨngɨ ɨjaa Jelusalemu. ʉkʉtɨ,
‘Namukeete, ʉMalafyale gwɨnu ikwisa kʉmyɨnu,
mooloolo, ikwisa bo iitogile ɨmbunda,† 21:5 Ikwisa bo iitogile ɨmbunda Abanyafyale biitogaga ɨfalaasi ɨsya bwite. Po Jesu ʉkwitoga ɨmbunda bo ikwingɨla mu Jelusalemu, aanangɨsyaga ʉkʉtɨ ʉmwene ikwisa nʉ lʉtengaano, jo malafyale gwa lwijiisyo.
ɨmwana jaa mbunda.’ ”‡ 21:5 Bala kalata gwa Sakalija 9:9.
6 Po abafundigwa bala balɨnkʉbʉʉka, balɨnkʉbomba bo muno Jesu abalagɨliile. 7 Balɨnkʉjɨtwala ɨmbunda jɨla pamopeene nɨ mwana jaake, balɨnkwalɨsya ɨmyenda gyabo pamwanya pa mbunda ɨsyo, Jesu alɨnkwitoga. 8 Ɨkɨlʉndɨlo kɨla ɨkɨnywamu ɨkya bandʉ balɨnkwalɨsya ɨmyenda gyabo mu nsebo, ʉkʉnangɨsya ʉlwɨmɨko kʉmyake, kangɨ abangɨ balɨnkʉkonyola ɨsamba sya mipiki, balɨnkwalɨsya mu njɨla. 9 Abandʉ bala baalongoliile nkyeni mwa Jesu na bala baakongaga balɨnkʉkoolela balɨnkʉtɨ,
“Hosyana!§ 21:9 Hosyana Kokʉtɨ Gwe Ntwa tʉpoke! Mwana gwa malafyale Ndaabɨti!
Asajigwege ʉjʉ ikwisɨla mu ngamu jaa Ntwa Kyala!* 21:9 Bala kalata gwa Ɨsabʉli 118:25-26.
Hosyana! Ɨɨmɨkigwege ʉNtwa ʉgwa kʉmwanya!”
10 Jesu bo ingiile mu Jelusalemu, akaaja koosa kaanyomwike. Abandʉ balɨnkʉlaalʉʉsania balɨnkʉtɨ, “Ʉjʉ jo jwani?” 11 Ɨkɨlʉndɨlo kɨla ɨkya bandʉ balɨnkʉbaamula balɨnkʉtɨ, “Ʉjʉ jo Jesu, ʉjʉ afumile mu Nasaleti, nkiisʉ kya Galilai, ʉjʉ jo nkunguluka gwa Kyala.”
Jesu ikʉbakaga abʉʉlɨsi ndʉpaso lwa tempeli
(Maalɨka 11:15-19; Lʉʉka 19:45-48; Johani 2:13-22)
12 Po Jesu alɨnkwingɨla ndʉpaso lwa tempeli, alɨnkʉbakagɨla panja aba bʉʉlɨsyaga na aba bʉʉlaga. Alɨnkʉsigwɨsya ɨmeesa sya bʉʉsania ndalama,† 21:12 Abʉʉsania ndalama Syaliko ɨndalama ɨsya kʉbombela mwene mu tempeli. Kʉnongwa ɨjo aBajuuta bʉʉsaniaga ɨndalama syabo ʉkʉtɨ bakabe ɨsya kʉbombela mu tempeli. nɨ fikota fya bʉʉlɨsi baa ngʉnde. 13 Alɨnkʉbabʉʉla alɨnkʉtɨ, “Sisimbiigwe mwa Kalata ʉMwikemo ʉkʉtɨ, ‘Ɨnyumba jangʉ jikʉjobigwaga ʉkʉja nyumba jaa kwipuutɨlamo.’‡ 21:13 Bala kalata gwa Jeesaja 56:7. Looli ʉmwe mujɨbɨɨkile ʉkʉja, ‘Mbako jaa minyambuta.’ ”§ 21:13 Bala kalata gwa Jelemija 7:11.
14 Jesu bo alɨ ndʉpaso lwa tempeli, abafwa maaso na aba bikʉkwema balɨnkʉmmwisɨla, alɨnkʉbabʉmbʉlʉsya. 15 Looli abapuuti abalongosi na bamanyisi baa ndagɨlo sya Moose, baafibwene ɨfiswigo ɨfyo, nʉ kʉbapɨlɨka abaanike aba baakoolelaga ndʉpaso lwa tempeli ʉkʉtɨ, “Hosyana, Mwana gwa malafyale Ndaabɨti,” balɨnkʉkalala. 16 Balɨnkʉnndaalʉʉsya Jesu balɨnkʉtɨ, “Bʉle, kʉpɨlɨka muno bikʉjobela abaanike aba?” Jesu alɨnkʉbaamula alɨnkʉtɨ, “Ngʉpɨlɨka. Mukabalamo amasyʉ aga gasimbiigwe mwa Kalata ʉMwikemo ʉkʉtɨ,
‘Nkanwa kaa baanike na baana abafyele,
mo kʉkaba ɨnduufyo syosa?’ ”* 21:16 Bala kalata gwa Ɨsabʉli 8:2.
17 Jesu alɨnkʉbaleka, alɨnkʉsookamo mu Jelusalemu, alɨnkʉbʉʉka kʉ Betanija, alɨnkʉgona ʉko.
Jesu ikʉgʉguna ʉnkʉjʉ
(Maalɨka 11:12-14, 20-24)
18 Jesu bo ikwisa nʉlʉbʉnjʉ nkaaja akaa mu Jelusalemu, ɨnjala jɨlɨnkʉnndʉma. 19 Po alɨnkʉgʉbona ʉnkʉjʉ gʉmo mumbalɨ mu njɨla, alɨnkʉbʉʉka apa gʉlipo, alɨnkwaga gʉkaja nɨ seke nasimo,† 21:19 Ɨseke sya nkʉjʉ syamanyiigwe fiijo na Bajuuta ʉkʉja kɨfwanikɨsyo. Sikʉnangɨsya akajɨɨlo akanunu, aka Kyala aasʉʉbɨlaga ʉkʉkabona kʉ bandʉ baake. Ʉkʉguna, apa kukʉnangɨsya ʉbʉlongi bwa Meesija kʉ Banyaisilaɨli. looli geene amaani. Po alɨnkʉgʉbʉʉla ʉmpiki gʉla alɨnkʉtɨ, “Ʉtiisakʉpamo sikʉ ɨseke!” Nakalɨnga ʉnkʉjʉ gʉla gʉlɨnkʉkofuka. 20 Abafundigwa baa Jesu bo basibwene ɨsyo, balɨnkʉswiga, balɨnkʉtɨ, “Silɨ bʉleebʉle, ʉnkʉjʉ ʉgʉ gʉkofwike nakalɨnga?” 21 Jesu alɨnkʉbaamula alɨnkʉtɨ, “Nalooli nikʉbabʉʉla, lɨnga mulɨ nʉ lwitɨko kɨsita kwilaamwa, mubagiile ʉkʉbomba bo ɨsi ngʉbombiile ʉnkʉjʉ ʉgʉ, nʉ kʉkɨndapo ɨsyo. Nalɨnga mukʉkɨbʉʉla ɨkyamba ɨkɨ, ʉkʉtɨ, ‘Kʉʉka ʉkiitaage mu nyanja,’ sikʉbombigwaga. 22 Lɨnga mulɨ nʉ lwitɨko, syosyosa ɨsi mukʉsʉʉma ndwipuuto, sikʉbombigwaga.”
Jesu ikʉlaalʉʉsigwa ɨsya maka gaake
(Maalɨka 11:27-33; Lʉʉka 20:1-8)
23 Jesu alɨnkʉfika mu Jelusalemu, alɨnkwingɨla ndʉpaso lwa tempeli, alɨnkwanda ʉkʉmanyisya. Po abapuuti abalongosi na balongosi baa Bajuuta, balɨnkʉbʉʉka kʉmyake kʉkʉnndaalʉʉsya balɨnkʉtɨ, “Ʉkabile kʉʉgʉ amaka agaa kʉbomba ɨsi? Jo jwani ʉjʉ akʉpeele amaka aga?” 24 Jesu alɨnkʉbaamula alɨnkʉtɨ, “Na niine ngʉbalaalʉʉsya iisyʉ lɨmo. Lɨnga muunyaamwile, niine ngʉbabʉʉla ʉkʉtɨ kʉ maka gaani ngʉbomba ɨsi. 25 Bʉle, amaka agaa Johani agaa kʉboosya abandʉ gaafumile kʉʉgʉ? Gaafumile kwa Kyala, pamo kʉ bandʉ?” Po balɨnkʉjobesania balɨnkʉtɨ, “Lɨnga tukʉtɨ amaka gaake gaafumile kwa Kyala, ʉmwene ikʉtɨgɨ, ‘Keeta mukaalɨmmwitiike?’ 26 Looli lɨnga tukʉtɨ amaka gaake gaafumile kʉ bandʉ, tukʉtiila ɨkɨlʉndɨlo kya bandʉ aba, paapo abandʉ boosa biitiike ʉkʉtɨ Johani aalɨ nkunguluka.” 27 Po balɨnkʉmmwamula Jesu balɨnkʉtɨ, “Tʉkamanya.” Joope Jesu alɨnkʉbabʉʉla alɨnkʉtɨ, “Po leelo niine, ndikʉbabʉʉla ʉkʉtɨ jwani ambeele amaka agaa kʉbomba ɨsi.”
Ɨkɨfwanikɨsyo ɨkya mwana ʉjʉ ikwitɨka na ʉjʉ ikʉkaana
28 Jesu alɨnkʉjoba nabo kangɨ alɨnkʉtɨ, “Bʉle, ʉmwe mukʉtɨ fiki? Aaliko ʉmundʉ jʉmo ʉjʉ aalɨ na baana abalʉmyana babɨlɨ. Alɨnkʉbʉʉka kʉ mwana gwa kwanda, alɨnkʉmmbʉʉla alɨnkʉtɨ, ‘Mwanangʉ, bʉʉka lɨɨlɨno ʉkabombe ɨmbombo mu ngʉnda.’ 29 Ʉmwana jʉla alɨnkʉkaana alɨnkʉtɨ, ‘Ndikʉbʉʉka.’ Looli piitaasi aaliinogwine, aabʉʉkile kʉkʉbomba. 30 Po ʉgwise alɨnkʉbʉʉka kʉ mwanaake ʉgwa bʉbɨlɨ, alɨnkʉmmbʉʉla bo lʉlalʉla. Ʉmwana jʉla alɨnkʉtɨ, ‘Ngʉbʉʉka taata.’ Looli akaabʉʉkile. 31 Bʉle, ndɨ abo babɨlɨ, jwani aabombile ɨsi ʉgwise aalondaga?” Abapuuti abo na balongosi balɨnkʉmmwamula balɨnkʉtɨ, “Jo jʉla ʉgwa kwanda.” Po Jesu alɨnkʉbabʉʉla alɨnkʉtɨ, “Nalooli nikʉbabʉʉla, abasongesya songo na baa malaja aabikwingɨla mBʉnyafyale bwa Kyala, looli ʉmwe mutikwingɨla. 32 Paapo Johani aaliisile kʉmyɨnu, aabanangiisye ɨnjɨla jaa bʉgolofu, ʉmwe mukaalɨmmwitiike. Looli abasongesya songo na baa malaja baalɨmmwitiike. Ʉmwe poope bo musibwene ɨsyo, mukaaliinogwine piitaasi nʉ kʉmmwitɨka.”
Ɨkɨfwanikɨsyo ɨkya balɨmi ababiibi
(Maalɨka 12:1-12; Lʉʉka 20:9-19)
33 Jesu alɨnkwendelela ʉkʉjoba alɨnkʉtɨ, “Namupɨlɨkɨsye ɨkɨfwanikɨsyo ɨkɨngɨ. Aaliko ʉmundʉ jʉmo ʉjʉ aalɨ nʉ ngʉnda. Aabyele amaafiilʉ, aasyʉngʉʉsiisye ʉlʉpaso, aakʉmbile ʉbwina ʉbwa kʉkamɨlamo ɨseke sya maafiilʉ, kangɨ aajengile ɨkɨsonge ɨkya kwɨmapo abalɨndɨlɨli. Alɨnkʉbabɨɨkamo abalɨmi abaa kʉkeetelela ɨmipiki gya maafiilʉ gɨla, ʉkʉtɨ ɨseke bo sibɨfwifwe, biise bajabane. Po alɨnkwenda ɨnjɨla jaa pabʉtali.
34 “Akabalɨlo kaa kʉtʉngʉla ɨseke bo kafikile, alɨnkʉbatʉma ababombeli baake kʉ balɨmi bala ʉkʉtɨ bampeko ɨkɨjabo kyake. 35 Looli abalɨmi bala balɨnkʉbakola ababombeli bala, jʉmo balɨnkʉnkoma, ʉjʉngɨ balɨnkʉnngoga, nʉ jʉngɨ balɨnkʉntuunya na mabwe. 36 Po ʉmwene ngʉnda jʉla alɨnkʉbatʉma kangɨ ababombeli abangɨ, abingi ʉkʉkɨnda aba kwanda, looli abalɨmi bala balɨnkʉbabombela bo ʉlʉ baababombiile abaa kwanda. 37 Po kʉmmalɨɨkɨsyo alɨnkʉntʉma ʉmwanaake, alɨnkʉtɨ, ‘Ʉmwanangʉ jo bikwakʉmmwɨmɨkaga.’ 38 Looli abalɨmi bala bo bammbwene ʉmwana jʉla, balɨnkʉjobesania balɨnkʉtɨ, ‘Ʉjʉ jo mwene kɨlɨngo. Isaga tʉnngoge, ʉkʉtɨ twege ɨkɨlɨngo kyake.’ 39 Po balɨnkʉnkola, balɨnkʉnsoosyamo mu ngʉnda, balɨnkʉnngoga.”
40 Po Jesu alɨnkʉbalaalʉʉsya alɨnkʉtɨ, “Po ʉmwene ngʉnda jʉla bo iisile, ikwisa kʉbabombela sya fiki abalɨmi bala?” 41 Abeene balɨnkwamula balɨnkʉtɨ, “Ikwisa kʉbagoga kɨsita kʉbapaakɨsya abalɨmi ababiibi bala, kangɨ mu ngʉnda gʉla ikwisa kʉbabɨɨka abangɨ abaa kʉgʉkeetelela, aba bikwisa kʉntwalɨlaga ɨseke pakabalɨlo aka sibɨfwifwe.”
42 Po Jesu alɨnkʉbabʉʉla kangɨ alɨnkʉtɨ, “Bʉle, mukabalamo Kalata ʉMwikemo? Apa sisimbiigwe ʉkʉtɨ,
‘Ɨliibwe ɨlɨ abajenga nyumba baalɨkaanile,‡ 21:42 Ɨliibwe ɨlɨ abajenga nyumba baalɨkaanile Jesu apa aabombiile amasyʉ agaa nDwitɨkano ʉLʉkʉʉlʉ ʉkwijoba ʉmwene.
lyo lɨjile ibwe ikʉlʉmba pa lwalo, pa nguto.
ɄNtwa Kyala jo ʉjʉ asipelile ɨsyo,
sya kɨswigo fiijo kʉmyɨtʉ ʉkʉsibona ɨsyo.’§ 21:42 Bala kalata gwa Ɨsabʉli 118:22-23.
43 “Kʉnongwa ɨjo, nikʉbabʉʉla nikʉtɨ, mutikʉjaga bandʉ baa Kyala, looli abandʉ abangɨ bikʉjaga bandʉ baa Kyala, aba babagiile ʉkʉbomba kanunu mu ngʉnda gwake, ʉkʉtɨ sikabigwe ɨseke. 44 Kʉkʉtɨ mundʉ ʉjʉ ikʉgwa pamwanya pi ibwe ɨlyo, ikʉkonyoka konyoka, na gwesa jʉla likʉnngwɨla, likʉntakania.”
45 Abapuuti abalongosi na Bafalisai bo bapɨliike ɨfifwanikɨsyo ɨfyo, balɨnkʉsyagania ʉkʉtɨ aabajobaga abeene. 46 Po balɨnkʉlonda ɨnjɨla jaa kʉnkola, looli balɨnkʉkɨtiila ɨkɨlʉndɨlo kya bandʉ, aba baalɨmmwitiike Jesu ʉkʉja nkunguluka.
*21:5 21:5 Syoni ngamu ɨjɨngɨ ɨjaa Jelusalemu.
†21:5 21:5 Ikwisa bo iitogile ɨmbunda Abanyafyale biitogaga ɨfalaasi ɨsya bwite. Po Jesu ʉkwitoga ɨmbunda bo ikwingɨla mu Jelusalemu, aanangɨsyaga ʉkʉtɨ ʉmwene ikwisa nʉ lʉtengaano, jo malafyale gwa lwijiisyo.
‡21:5 21:5 Bala kalata gwa Sakalija 9:9.
§21:9 21:9 Hosyana Kokʉtɨ Gwe Ntwa tʉpoke!
*21:9 21:9 Bala kalata gwa Ɨsabʉli 118:25-26.
†21:12 21:12 Abʉʉsania ndalama Syaliko ɨndalama ɨsya kʉbombela mwene mu tempeli. Kʉnongwa ɨjo aBajuuta bʉʉsaniaga ɨndalama syabo ʉkʉtɨ bakabe ɨsya kʉbombela mu tempeli.
‡21:13 21:13 Bala kalata gwa Jeesaja 56:7.
§21:13 21:13 Bala kalata gwa Jelemija 7:11.
*21:16 21:16 Bala kalata gwa Ɨsabʉli 8:2.
†21:19 21:19 Ɨseke sya nkʉjʉ syamanyiigwe fiijo na Bajuuta ʉkʉja kɨfwanikɨsyo. Sikʉnangɨsya akajɨɨlo akanunu, aka Kyala aasʉʉbɨlaga ʉkʉkabona kʉ bandʉ baake. Ʉkʉguna, apa kukʉnangɨsya ʉbʉlongi bwa Meesija kʉ Banyaisilaɨli.
‡21:42 21:42 Ɨliibwe ɨlɨ abajenga nyumba baalɨkaanile Jesu apa aabombiile amasyʉ agaa nDwitɨkano ʉLʉkʉʉlʉ ʉkwijoba ʉmwene.
§21:42 21:42 Bala kalata gwa Ɨsabʉli 118:22-23.