8
Jesu jo mpuuti gwa lwitɨkano ʉlʉpya
1 Kʉlɨ syosa ɨsyo, iikʉlʉmba lyo ɨlɨ. Nalooli tʉlɨ nʉ mpuuti ʉnkʉlʉmba ʉgwa lʉko ʉlo, ʉjʉ atʉʉgeele kʉkɨbafu ɨkiilɨɨlo ɨkya Kyala ʉMwene maka goosa, pabʉjo ʉbwɨmɨkigwa fiijo ʉko kʉmwanya. 2 Ʉko ikʉmmbombela Kyala Pabʉjo ʉBwikemo, nkatɨ mu heema ɨjaa bwanalooli, ɨjɨ jɨtendekesiigwe nʉ Ntwa Kyala jʉʉjo, gakaja maboko gaa bandʉ.
3 Kʉkʉtɨ mpuuti ʉnkʉlʉmba ikʉsʉngʉligwa ʉkʉtɨ ansookesyege Kyala ɨfyabʉpe ni ikemo. Bʉbʉʉbo ʉmpuuti gwɨtʉ ʉnkʉlʉmba joope mpaka aje na kandʉ akaa kʉsoosya. 4 Lɨnga Jesu aakaalɨ aliko pakiisʉ apa, ngalɨ akaja mpuuti na panandɨ, paapo balipo abandʉ abangɨ aba bikʉsoosya iikemo ʉkʉkongana nɨ ndagɨlo sya Moose. 5 Abapuuti abo bikʉmmbombela Kyala Pabʉjo ʉBwikemo, apa kɨfwanikɨsyo itolo, kangɨ nsyʉngʉʉlʉ ʉgwa Pabʉjo ʉBwikemo ʉbwa kʉmwanya. Fyobeene Moose bo ikwitendekesya ʉkʉjenga ɨheema ɨjaa kʉmmwipuutɨlamo Kyala,* 8:5 Ɨheema ɨjaa kʉmmwipuutɨlamo Kyala Bala kʉ Ɨsyakʉlɨngaania. Kyala aalɨnsokile aatile, “Gwijʉʉle ʉkʉjenga fyosa ʉkʉkongana nʉ lʉbaatɨko ʉlʉ naakʉnangiisye kʉla kʉ kyamba Sinai.”† 8:5 Bala kalata gwa Ʉkʉsooka 25:40. 6 Looli Jesu aapeeliigwe ɨmbombo ɨnunu fiijo, ʉkʉkɨnda ɨjaa bapuuti abaa ijolo, bo ʉlwa lwitɨkano ʉlʉpya ʉlʉ aabɨɨkile, lʉnunu fiijo ʉkʉlʉkɨnda ʉlʉkʉʉlʉ, paapo lʉjengiigwe pa lʉfingo ʉlʉnunu fiijo, ʉkʉlʉkɨnda lʉla ʉlwitɨkano ʉlʉkʉʉlʉ.
7 Lɨnga ʉlwitɨkano ʉlwa kwanda lʉkaalɨ na kababye nakamo, angalɨ lʉkalondigwa ʉlwitɨkano ʉlwa bʉbɨlɨ. 8 Looli Kyala jʉʉjo aalyagile abiisʉkʉlʉ bɨɨtʉ balɨ nɨ mbiibi. Kʉnongwa ɨjo aababʉʉlile aatile,
“Namukeete, akabalɨlo kikwisa,
apa ngwisa kʉbɨɨka ʉlwitɨkano ʉlʉpya
na bandʉ abaa mu Isilaɨli na mu Jutai.
9 Ʉlwitɨkano ʉlo ʉlʉpya, aalʉtikʉja bo lʉla,
ʉlʉ naabɨɨkile na biisʉkʉlʉ baabo,
bo mbakolile amaboko ʉkʉbalongosya, ʉkʉsookako kʉ Misili.
Namanga bakaalɨ bagolofu ʉkʉlʉkonga ʉlwitɨkano lwangʉ,
fyobeene ngaabapaasiisye kangɨ.
10 Ʉlʉ lo lwitɨkano ʉlʉpya,
ʉlʉ ngwisa kʉbɨɨka na Banyaisilaɨli,
amasikʉ ago bo gafikile.
Ngwisa kʉsibɨɨka ɨndagɨlo syangʉ mu ndumbula syabo,
nʉ kʉsisimba mmahala gaabo.
Ʉne ngwisa kʉja ne Kyala gwabo,
boope bikwisa kʉjaga bandʉ bangʉ.
11 Kʉtikwisa kʉjako kangɨ ʉmundʉ ʉkʉmmanyisya ʉnnine,
pamo ʉkʉmmanyisya ʉgwamyabo ʉkʉtɨ ammanye ʉNtwa Kyala.
Namanga kʉkʉtɨ mundʉ ikwisa kʉʉmanyaga,
ʉkwandɨla ʉnnandɨ mpaka ʉnkʉsi.
12 Namanga ngwisa kʉbahobokela ɨmbiibi syabo,
ndikwisa kʉbʉkʉmbʉka kangɨ ʉbʉtʉlanongwa bwabo.”‡ 8:8-12 Bala kalata gwa Jelemija 31:31-34.
13 Kyala bo ikʉtɨ ʉlwitɨkano ʉlʉ, “Ʉlʉpya,” sikʉnangɨsya ʉkʉtɨ ʉlwitɨkano ʉlwa kwanda lwakʉʉlwipe. Po akandʉ aka kakʉʉlwipe kakabagɨsya kangɨ, kalɨ kɨfuki ʉkʉsoba.