13
Ʉlʉgano
1 Poope nalɨnga ngʉjoba ɨnjobelo syosa,
ɨsya bandʉ nɨ sya bandʉmi,
looli lɨnga ngaja nʉ lʉgano,
ngalɨ ndɨ bo ɨkyela itolo, ɨkɨ kikʉlɨla,
nʉ njwego ʉgwa ibangala.
2 Kangɨ nalɨnga ndɨ nɨ kɨkʉngɨlwa ɨkya bʉkunguluka,
nʉ kʉsimanya syosa ɨsya mbʉtiitʉ, na mahala goosa,
nalɨnga ndɨ nʉ lwitɨko ʉlʉnywamu
ʉlwa kʉsaamisya ɨfyamba,
looli lɨnga ngaja nʉ lʉgano,
bo ndɨ gwa itolo.
3 Kangɨ nalɨnga ngʉsoosya ɨkyʉma kyangʉ kyosa,
ʉkʉbapapo abalondo,
nalɨnga ngwisoosya ʉmbɨlɨ gwangʉ,
ʉkʉtɨ gʉpye mmooto,* 13:3 Ʉkʉtɨ gʉpye mmooto Mwa baakalata bamo abaa ijolo basimbile Ʉkʉtɨ niituufye.
lɨnga ngaja nʉ lʉgano,
ndikʉkabamo nafimo.
4 Ʉlʉgano lukʉpela ʉkʉʉmɨɨlɨla,
ʉkʉja bape, ʉkʉsita kʉja na kabini,
ʉkʉsita kwituufya, ʉkʉsita kwijumbɨka.
5 Ʉlʉgano lʉtikʉpela ʉkʉbiilaamwa abangɨ,
lʉtikʉpela ʉkwinogona syene ɨsyɨtʉ,
lʉtikʉpela ʉkʉkalala mbɨbɨmbɨbɨ,
nʉ kʉkʉmbʉka ɨmbiibi ɨsya bandʉ.
6 Ʉlʉgano lukʉpela ʉkʉsita kʉsekelela ʉbʉbiibi,
looli ʉkʉsekelela ɨsya bwanalooli.
7 Ʉlʉgano lukʉpela ʉkʉʉmɨɨlɨla syosa,
ʉkʉja nʉ lwitɨko akabalɨlo koosa,
ʉkʉja nʉ lʉsʉʉbɨlo akabalɨlo koosa,
nʉ kwijʉʉla ndɨ syosa.
8 Ʉlʉgano lʉtikʉmalɨkamo sikʉ.
Looli ʉbʉkunguluka bukʉmalɨka,
ʉkʉjoba ɨnjobelo kukʉmalɨka,
ʉbʉmanyi bukʉkɨnda.
9 Namanga tʉsyageenie mbʉnandɨ,
kangɨ tukʉkunguluka mbʉnandɨ.
10 Looli bo kwisile ʉkʉsita kwagɨlwa,
ɨsi syagiilwe sikwisa kʉmalɨka.
11 Bo ndɨ nkeke naajobaga ɨsya bʉkeke, amahala gaalɨ gaa bʉkeke, niinogonaga ʉlwa bʉkeke. Looli paapo ndɨ nkʉsi, ɨsya mbʉkeke nsilekile.
12 Namanga akabalɨlo aka tukʉfwana tukʉkeetela nkɨkeetelo ndʉfunienie, looli akabalɨlo aka kikwisa tukwisa kʉfibona na maaso muno fijɨɨliile. Akabalɨlo aka tʉsyageenie mbʉnandɨ. Looli akabalɨlo aka kikwisa, tukwisa kʉsyagania loosa, bo muno Kyala atʉmanyiile ʉswe.
13 Po fitatʉ ɨfi aafitikʉmalɨka sikʉ, ʉlwitɨko, ʉlʉsʉʉbɨlo nʉ lʉgano. Looli ndɨ ɨfyo, ʉlʉgano lo lʉkʉlʉmba.