1 Abandʉ batʉmanyege ʉkʉtɨ ʉswe tʉlɨ babombeli baa Kɨlɨsiti, tʉpeeliigwe ɨmbombo ɨjaa kwɨmɨlɨla ʉkʉfumusya ɨndʉmi jaa Kyala ɨjaa mbʉtiitʉ. 2 Po ʉmundʉ ʉjʉ apeeliigwe ʉkwɨmɨlɨla, fikʉtɨ ajege nsʉʉbɨligwa kʉ ntwa gwake. 3 Looli kʉmyangʉ ʉne, kandʉ kaa itolo lɨnga ngʉlongigwa na nuumwe, pamo nʉ bʉlongosi ʉbwa bandʉ abangɨ. Kangɨ na niine ndikwilonga. 4 Ndikwibona ʉkʉtɨ nsobile simo, looli ɨlyo lɨtikʉʉmbɨɨka ʉkʉja nsita nongwa. ɄNtwa Jesu jo ʉjʉ ikʉlamula. 5 Po leelo mulɨngabalongaga abandʉ bo akabalɨlo kakaalɨ ʉkʉfika, looli muguulɨlege mpaka pi isikʉ ɨlɨ ʉNtwa Jesu ikwisa. Ʉmwene jo ʉjʉ ikwisa kʉsibɨɨka pabwelu syosa ɨsi sifisiigwe mu ngiisi, nʉ kʉsinangɨsya ɨsi silɨ mu ndumbula ɨsya bandʉ. Akabalɨlo ako, aba babagiisye boosa bikwisa kwambɨlɨla ɨnduufyo ʉkʉfuma kwa Kyala.

6 Baamyɨtʉ ndwitɨko, kʉnongwa jɨɨnu njobile ɨnongwa syosa ɨsyo, ɨsyangʉ nɨ sya Apolo, ʉkʉja sya kʉkeetelamo ʉmwe. Po musimanye ɨsi sikʉtɨ, “Mulɨngongelangapo palɨ ɨsi sisimbiigwe mwa Kalata ʉMwikemo.” Lɨnga mukʉsikonga, mutikʉjaga bandʉ aba bikwituukɨfya ʉmmanyisi jʉmo nʉ kʉmmwilaamwa ʉjʉngɨ. 7 Bʉle, jwani akʉbɨɨkile ʉgwe ʉkʉtɨ ʉbagiisye fiijo ʉkʉnkɨnda ʉnnino? Kandʉ nki aka ʉlɨ nako aka ʉkapeeligwa na Kyala? Looli lɨnga ʉpeeliigwe, fiki kwituukɨfya ngatɨ ʉkaapeeliigwe?

8 Po mwikwite! Mulɨ bakabi! Mulɨ banyafyale! Mukaatʉlondilepo ʉswe ʉkʉbatʉʉla! Kwalɨ kʉnunu lɨnga mwalɨ banyafyale nalooli, ʉkʉtɨ na nuuswe tʉlongosyege pamopeene na nuumwe! 9 Looli kʉmyɨtʉ ʉswe twe batʉmigwa,* 4:9 Abatʉmigwa Bala kʉ Ɨsyakʉlɨngaania. ngwaga Kyala atʉbɨɨkile ʉkʉtɨ abandʉ batwilaamwege ʉkʉkɨnda boosa. Tʉlɨ bo abandʉ aba balongiigwe kʉkʉgogigwa pabwelu pakiisʉ, nkyeni mbandʉmi na bandʉ. 10 Abandʉ bikʉtʉbona ʉswe ʉkʉja bakonyofu, apa tukʉbomba ɨmbombo jaa Kɨlɨsiti. Looli ʉmwe mulɨ na mahala mwa Kɨlɨsiti! Ʉswe tʉlɨ boonywa, looli ʉmwe mulɨ na maka! Ʉswe abandʉ bikʉtwilaamwa, looli ʉmwe abandʉ bikʉbɨɨmɨka fiijo! 11 Na ʉlʉ tʉlɨ nɨ njala nɨ kyʉmɨlwa, ɨmyenda tʉkaja nagyo, tukʉtaamigwa, tʉkaja nʉ bʉjo. 12 Tukwijʉʉla ʉkʉbomba ɨmbombo na maboko gɨɨtʉ. Apa abandʉ bikʉtʉtʉka, tukʉbasaja, apa bikʉtʉpa ɨngʉbɨlo, tukʉʉmɨɨlɨla, 13 apa bikʉtʉjoba kabiibi, tukʉbaamula kanunu. Na ʉlʉ, abandʉ abaa pakiisʉ apa bikʉtʉbona bo ʉlwa kɨko, nɨ mitindibofu.

14 Ndikʉbasimbɨla ɨnongwa ɨsi ʉkʉbasʉʉsya, looli ngʉlonda ʉkʉbasoka bo ʉlwa baanangʉ abakʉndwe. 15 Namanga mulɨ na baswɨli abingi mwa Kɨlɨsiti, looli mulɨ nʉ gwiseemwe jʉmojwene itolo, paapo ʉne naalɨ gwiseemwe mwa Kɨlɨsiti Jesu bo ngʉbalʉmbɨlɨla ɨNdʉmi ɨNunu. 16 Po ngʉbapyelesya mukongege bo muno ngʉbombela ʉne. 17 Jo nongwa ɨjɨ naalɨntʉmile Timoti kʉmyɨnu, ʉmwanangʉ ʉnkʉndwe, ʉjʉ ngʉnsʉʉbɨla mu mbombo ɨjaa Ntwa. Ʉmwene ikʉbakʉmbʉsya muno njɨɨliile mwa Kɨlɨsiti Jesu, na muno ngʉmanyikɨsya abiitɨki boosa mbʉjo boosa.

18 Po abandʉ bamo pakatɨ pamyɨnu balɨ na matingo, bikwinogona ʉkʉtɨ ndikwisako kʉkʉbajaatɨla. 19 Looli lɨnga ʉNtwa iiganile, ngwandana ʉkʉfika kʉmyɨnu. Apo po angwisa kwikeetela amaka gaabo abaa matingo, somma amasyʉ gaabo geene. 20 Paapo ʉBʉnyafyale bwa Kyala gakaja masyʉ geene, looli maka. 21 Po mukʉlonda mbombe ɨfiki? Bʉle, niise nɨ ngili? Pamo niise ndʉgano na mbooloolo?