Ⅰ ꞌƖnmɔ ꞌPɔlʋ nyʋ poꞌa -jie ꞌmʋ *Zezii *Kliisɩꞌa lbhʋꞌa dɩ, ꞌɩn -ke -aꞌba ꞌlotʋꞌa ꞌꞌyu Timotee -nɩ ꞌsɔn, -ɩnmɔ Filemɔɔ -ke dɩ -a kmaꞌa, -ɩnmɔ -ke -a nʋꞌa -Lagɔꞌɔ lbhʋ, -a-bʋ ꞌyeꞌe -ɩnmʋ! Ⅱ -Aꞌba ꞌlotʋꞌa ꞌꞌyunynaakpʋ Apia-e, Asipʋ -ke -a -poꞌa gbɔ, ꞌle, -bho koo ɛ ꞌꞌdu sɩasɩaalɩ, -a zaꞌa Zeziiꞌa ꞌꞌdɩzɩgɩ ꞌmʋ, ʋn -ke Zeziiꞌa -glɩgbawɔnyiꞌa nyʋ ꞌwee ꞌgbʋʋꞌa ꞌꞌlru ꞌle -aꞌa ꞌꞌbhlegbo, -a-bʋ ꞌye ꞌʋ -lrɛɛ!

Ⅲ -Aꞌba -tɩta -Lagɔ -ke -aꞌba -Kɔyi Zezii Kliisɩ nʋ amʋ -zɛgɛ ꞌꞌlruli, ꞌle ʋn ꞌke amʋ -pɔlʋꞌa bhlubhlua ꞌꞌnyɩ!

Ⅳ-Ⅴ -Gblee, ꞌan ꞌlotʋꞌa ꞌꞌyu Filemɔɔ, -ka -ɩn deꞌa -aꞌba -Kɔyi Zezii ꞌꞌgwli ꞌle -ɩn -kmaꞌa ꞌɔ nyʋꞌa dɩ, ꞌɩn ꞌwɩn -ɩ ꞌbɔ; ꞌɩnnɛ ꞌbhleꞌe ꞌnynɩꞌa dɩ, -bho ꞌɩnmɔ ꞌPɔlʋ -ka *-Lagɔ wɔn gbo-o po, ꞌɩn-ɩ popoꞌo -aꞌa dɩ ꞌgwlʋti ꞌle ꞌɩn-ɩ po ꞌɔ ꞌsɛɛ. Ⅵ ꞌƖn-ɩ bhade-e -Lagɔ li -lrɛɛ, ꞌle, Zeziiꞌa ꞌꞌgwlideɛ -a -plɛꞌɛ ꞌmʋ, ɛ ꞌke lbhʋ nʋ ꞌle -ɩn ꞌmʋ, ꞌle, ꞌꞌyrilinmɔkpli ꞌbhɛɛꞌɛ Zezii Kliisɩꞌa ꞌnynɩ ꞌꞌyi, -ɩ ꞌma-a -aꞌba lɩ, -ɩn ꞌke ɩ yibo ꞌle -ɩn ꞌke ɩ nʋ -ka -zɛgɛka. Ⅶ ꞌAn ꞌlotʋꞌa ꞌꞌyu, -ɩn ꞌye li-ɔ, -aꞌa nyʋꞌa dɩkmɛɛ ꞌpo-o ꞌɩnmʋ ꞌbʋbʋaklagba -pɔlʋ ꞌzɔ ꞌle ɛ-ɛ poꞌo ꞌɩnmʋ ꞌkpa ꞌꞌyi tenyɩ, -ɛkedɩmaa, -a ꞌꞌnyɩ-e Zeziiꞌa nyʋꞌa -dadudu ꞌmʋtikukuɛ.

Ⅷ Ɩ-bɩ dɩ ꞌmnɩ -nɩꞌa -kaa ꞌmʋ a, ꞌɩn-ɩ ꞌyi-e -ɩnmʋ libhadenamʋ lɛ -lueꞌa dɩ. -Ɩn ꞌye li-ɔ, ꞌɩn-ɩ ꞌmo-o *Zezii *Kliisɩꞌa lbhʋnʋyi. ꞌƐ dɩ ꞌɩn ꞌbhleꞌe ꞌꞌyiflɔɛ, ꞌle, lbhʋ -ɩn ꞌka nʋ, ꞌɩn ꞌke ɛ -ɩnmʋ ꞌꞌnyɩ. Ⅸ Ɛ -nɩꞌa -kaa ꞌmʋ a, ꞌɩn -see ꞌɛ lɛtu -nʋ yi, -ɛkedɩmaa, -ɩn -kmaꞌa-a Zeziiꞌa nyʋꞌa dɩ. Lɛ ꞌɩn ꞌka nʋ a, ꞌɩnnɛ ꞌmo-o ꞌɩn ꞌke -ɩnmʋ libhade. ꞌƖnmɔ ꞌPɔlʋ bhadeꞌa -kaa -ɩnmʋ li, nyunyɔzɛgɛ ꞌɩn ꞌꞌduꞌo ꞌle ꞌɩn ꞌꞌsiꞌe ꞌbho ꞌɩn -nɩꞌe ꞌnɔɔ -jie ꞌmʋ Zezii Kliisɩꞌa lbhʋꞌa dɩ. Ⅹ ꞌƖn -nɩꞌa ꞌnɔɔ -jie ꞌmʋ, nyɔ -lue ꞌɩn -yaꞌa ꞌbho Zeziiꞌa -jeyi, ꞌɔ ꞌꞌlru ꞌꞌyi ꞌɩn-ɩ poꞌo -ɩnmʋ ꞌꞌbɔgʋ -nɛɛ -jeyi. ꞌƆ ꞌnynɩ ꞌmo-o -aꞌa ꞌgeyikpaan Onezimʋ. Ⅺ -Bɛnyɩ a, ɔbɔ ꞌmnɔ, -ɔ -ke ꞌnynɩꞌa ꞌzɔ ꞌma-a «ɔ -se bhubhunyɔ -ko», ꞌle -mnɔɔɔ -bodɩ ɔ-ɔ mo ꞌko-o bhubhuyitiꞌa nyɔ. ꞌTraamʋ ꞌtɔ ɔ, -a -nɩ ꞌsɔn -bodɩ, ɔ se ꞌtɔ -kaa -nɩ.

Ⅻ ꞌKa-a ɛ -nɩꞌe ꞌmʋꞌa dɩ, ɔ-bɔ ꞌma-a ꞌtraamʋ ꞌan -pɔlʋꞌa ꞌꞌdie a, ꞌɩn-ɩ yɔ ꞌɔ ꞌle -ɩnmʋ gbo le. ⅩⅢ -Nɔɔ -ke ti ꞌɩn -nɩꞌa -bhla -jie ꞌmʋ Zeziiꞌa ꞌꞌdɩzɩgɩꞌa dɩ, ꞌɩn ꞌbɔ ꞌko-o ti, ꞌɩn ꞌke ɔ ꞌbho ꞌan ꞌꞌtroli tide, ꞌle -aꞌa ꞌnynɩ ꞌmʋ ɔ ꞌke ꞌan lbhʋ nʋ. ⅩⅣ Ɛ -nɩꞌa -kaa ꞌmʋ a, ꞌɩn -see tiꞌbɔ ꞌɩn ꞌke lɛ nʋ -bho ꞌɩn -see -aꞌa wɔnmʋwlu ꞌye. ꞌƖn -see tiꞌbɔ ꞌɩn ꞌke -ɩnmʋ -glaka kpʋn ꞌle -ɩn ꞌke ꞌɩnmʋ ꞌꞌyrilinmɔdɩ ꞌꞌlrulinʋ. ꞌƖn ꞌybha-oꞌo -aꞌa ꞌꞌbhuoꞌa -pɔlʋ ꞌke ꞌwɔn ꞌle -ɩn ꞌke lɛ nʋ.

ⅩⅤ -Gblee, ɛ kɔɔꞌɔ-ɔ -Lagɔꞌɔ ꞌꞌbhuo-o ꞌꞌtayi ꞌnɔ ꞌꞌyiti ꞌle ɔ ꞌke -ɩnmʋ le po -nɔɔtoope ꞌli, ꞌle, -bho ɔ -ka le-e yi, ɔ ꞌke -ɩn -Bozeziiꞌa nyɔ ꞌꞌdu ꞌle a ꞌke ꞌꞌyiꞌꞌsisri ꞌꞌkɔgwlɛka. ⅩⅥ -Ɩn ꞌye li-ɔ, ꞌtraamʋ ꞌtɔ ɔ, ɔ -se ꞌtɔ-ɔ bhebhetiꞌa ꞌgeyikpaan -ko. Ɔ ꞌbhɛ-ɛ ꞌꞌyi ɔ ꞌye ꞌgeyikpaan -zi, -ɛkedɩmaa, ꞌan dɩkmalotʋꞌa ꞌꞌyu moꞌo. ꞌLe -mnɔɔɔ -bodɩ, ɔ ꞌke ꞌꞌyiꞌbhɛ ꞌle ɔ ꞌke lbhʋnʋyi -zi, -ɛkedɩmaa, -ɩn -bonyunyɔ moꞌo ꞌle ɔ ꞌye ꞌbho ꞌꞌsi, ɔ ꞌye -aꞌa ꞌlotʋꞌa ꞌꞌyu ꞌꞌdu ꞌle -aꞌba -Kɔyi Zezii ꞌmʋ; ꞌɛ kamʋ -ɩn ꞌke ꞌɔ dɩ -kma ꞌle ɛ ꞌke ꞌan nɛ ꞌmʋ-zi.

ⅩⅦ Ɩ-bɩ dɩ ꞌmnɩꞌa ꞌꞌlru ꞌꞌyi, ꞌle, -ka -a -nɩ ꞌsɔn -a ꞌꞌduꞌa lbhʋ -lueꞌa nʋmʋ, -ɩn yibo nɩ-ɩꞌa dɩ a, -ka, -bho ꞌɩn yiꞌa -ɩnmʋ ꞌꞌbhli, -ɩn ꞌka ꞌɩnmʋ kpʋn -gli, kpʋn ɔ -kaa! ⅩⅧ -Bho ɔ nʋ -ɩnmʋ ꞌꞌnyinynidɩ ꞌꞌlruli, ꞌle ɔ ꞌke -aꞌa kpa ꞌbhle, ꞌan ꞌꞌlruyidɩ moꞌo. ⅩⅨ ꞌƖnmɔ ꞌPɔlʋꞌa ꞌꞌbhuo-o ꞌcnɩꞌe ꞌꞌbɔgʋ -nɛɛ. ꞌƖn-ɩ ꞌye-e -aꞌa kpa ꞌmnɛ -za -mʋ. -Gblee, ꞌɩn -see tiꞌbɔ ꞌɩn ꞌke -ɩnmʋ ꞌgwlʋtipopo na, -ɩn ꞌbhle-e ꞌmna-aꞌa kpa -lrɛɛ. ꞌƖnnɛ ꞌmo-o, ꞌan ꞌsana ꞌmʋ -ɩn yiꞌe ꞌbho Zeziiꞌa -jeyi. ⅩⅩ ꞌAn ꞌlotʋꞌa ꞌꞌyu, ꞌle -aꞌba -Kɔyi Zeziiꞌa ꞌnynɩ ꞌmʋ, ꞌɩnmɔ bhade -ɩnmʋ li, -zɛgɛ ꞌɩn-ɩ ꞌbɔꞌɔ -ɩn ꞌmʋ ti, nʋ ɛ ꞌɩnmʋ ꞌꞌlruli! -Ka, -a -nɩ ꞌsɔn, -a ꞌꞌduꞌa Zezii Kliisɩꞌa lbhʋnʋmʋ, popo ꞌna ꞌgwlʋti ꞌle -ɩn ꞌke ꞌɩnmʋ -pɔlʋ ꞌli tide!

ⅩⅪ -Ɩn ꞌye li-ɔ, ꞌɩn ꞌde-e ꞌꞌgwli na, lɛ -ke dɩ ꞌɩn-ɩ ꞌtmʋʋꞌa -ɩnmʋ, -a ꞌye -ɛ -nʋ -mʋ, ꞌle ꞌɩn yiboꞌo na ɛ-ɛ ꞌye-e ꞌꞌyiꞌbhɛ -mʋ, ꞌle, -zɛgɛ ꞌɩn-ɩ ꞌbɔꞌɔ ti -ɩn ꞌke ɔ ꞌꞌlrulinʋ, ɛ ꞌke ɛ ꞌmʋ-zi. ꞌƐ dɩ ꞌɩn-ɩ poꞌo -ɩnmʋ ꞌꞌbɔgʋ -nɛɛ -jeyi. ⅩⅫ A-a ꞌpo-o *-Lagɔ wɔn gbo ꞌan dɩ: ꞌɛ kamʋ ꞌɩn deꞌe ꞌꞌgwli na ꞌɩn-ɩ ꞌye-e ꞌꞌyitiꞌꞌtayi-ɛ -mʋ. ꞌƐ dɩ, -bho -ɩn kpʋn Onezimʋ, nmaze ꞌan ꞌbɩ, -ɩn ꞌke ɛ ꞌɩnmʋ wɔn-fuo!

ⅩⅩⅢ-ⅩⅩⅣ -A -Bolagɔlbhʋꞌa nʋmʋ Maakɩ-e, Alisɩtakɩ-e, Demasɩ -ke Luukɩ na ʋ-bʋ ꞌyeꞌe amʋ! Zezii Kliisɩꞌa lbhʋꞌa dɩ Epaflasɩ ʋn poꞌa -jie ꞌmʋ -lrɛɛ, ɔ na ɔ-bɔ ꞌyeꞌe amʋ!

ⅩⅩⅤ -Aꞌba -Kɔyi Zezii Kliisɩ -sie amʋ gbo!