1 Saꞌa kaꞌnu ña san jin ni, vi Jitoꞌo, jin ndiꞌi san jin anu san,

te ndakani san ndiꞌi tniuu naꞌnu saꞌa ni.

2 Te kana san ja kusii ndevaꞌa ini san nuu ni,

te kata san yaa ja ndakakuneꞌe san sivi ni ja oo ni ndee sukun.

3 Te ni ka ndakaka yata ñayiu ka kaꞌan uꞌu ña jin san nuu ni,

te ni ka ndonsoi, te vi yun ni ka nai.

4 Chi ia ndaa kuu maa ni, te ni junkoo ni nuu tatnuni ni ja kaꞌnde ndaa ni kuechi,

te ni saꞌa ndaa ni ja jaꞌa san.

5 Ni kuxeen ni nuu ñayiu tu ka kandija ña jin ni, te ni xnaa ni ñayiu kueꞌe,

ni xnaa ni jin, ja ma vi kondakaꞌan saꞌun ka ña ñayiu jin nikuii nikani.

6 Te ni ka naa ñayiu ka kaꞌan uꞌu ña jin san,

te tu ka na in koo nikuii nikani, chi ni xnaa ni ñui,

te tu saꞌun ka na in kondakaꞌan ña jin ñayiu yun.

7 Su maa Jitoꞌo, chi nikuii nikani tatnuni ya,

te ni jani yutnu ya mesa nuu jaꞌnde ya kuechi.

8 Te sandaa ya kuechi ñayiu ñuyiu

vi tatnuni ndaa ya nuu ñayiu.

9 Maa ya tavaꞌa ñayiu ka tnaꞌa tnundoꞌo nuu ka saꞌa ndevaꞌa ña jin,

vi jito jini ña ya nuu ka tnaꞌi tnoꞌo suchi ini.

10 Chi maa ni, vi Jitoꞌo san, ka kukanu ini ñayiu ka jini ña jin ni,

te tu xndendoo ndaꞌu ni ñayiu ka ndanduku ña jin ni.

11 Vi kata ni yaa nuu Jitoꞌo, ia tatnuni ndee Sión,

te vi ndakani ni nuu ñayiu ndiꞌi ñuu taka tniuu naꞌnu saꞌa ya.

12 Chi ndakaꞌan ña ia Dios jin ñayiu ni ka jiꞌi ja tu na kuechi, te xtaku ya niñi ñayiu yun,

te ma ndunaa ini ya nuu ka kana ndaꞌu ñayiu ka tnaꞌa tnoꞌo suchi ini.

13 Te nuu ndakuatu san, te jiñaꞌa san: “Kundaꞌu ini ña ni jin san, vi Jitoꞌo san,

te kondiaꞌa ni ja ndevaꞌa ndetnuni ka saꞌa ña ñayiu ka skexiko ña jin san,

te ndatau ña ni nuu tnundoꞌo ja ma kuu san,

14 nagua ja na ndakani san nuu ñayiu yeꞌe ñuu Jerusalén ja na vi saꞌa kaꞌnu ñai,

te kusii ini san, chi ni skaku niꞌnu ña ni jin san”.

15 Ni ka saꞌu ñayiu tu ka kandija ña jin ni nuu yau ja ni ka jate mai,

te ni ka ndekuꞌun siꞌin nuu ñunu ja ni ka tayuꞌu mai.

16 Saa te ni ka jini ñayiu ja ia saꞌa ndaa kuu Jitoꞌo,

chi ni ka nanakau maa ñayiu kueꞌe nuu jakueꞌe ni ka saꞌa mai.

17 Ñayiu kueꞌe vi ndiꞌi ñayiu ni ka ndunaa ini ia Dios kuaꞌankuei ñuu jiꞌi.

18 Su ñayiu ka kundaꞌu, chi ma ndunaa saꞌun ini ña ia Dios,

te ni ma junaa saꞌun ja ka ndetu kaꞌnu ñayiu tu nagua ka nevaꞌa.

19 Ndakoo ni, vi Jitoꞌo, te ma kuandetu ni ja vi kokuu nijaꞌnu ñayiu ñuyiu.

Kana ni ñayiu tu ka kandija ña jin ni, te sandaa ni kuechi.

20 Saꞌa ni ja na vi koyuꞌu niꞌnu ña ñayiu jin ni,

te na vi kuni ñayiu tu ka kandija ña jin ni ja masu nagua ka kuu saꞌuin,

chi maa ni yiki jin kuñu ka kui.