1 Te tiempu yun ni jini soꞌo Herodes, tee tatnuni ñuu ja tnii Galilea, ndiꞌi tniuu naꞌnu saꞌa Jesús. 2 Te jiñaꞌa de nuu tee ka jinokuechi nuu de:

͏―͏Tee yun kuu ndi Juan, tee ni oskuandute, te ni ndateku de neꞌu ndiyi, yun guaa nevaꞌa de jakaꞌnu ja saꞌa de tniuu naꞌnu ͏―͏jiñaꞌa Herodes.

3 Chi maa de ni tatnuni ja ni ka kakuiko ña jin Juan, te ni juꞌni ña de jin cadena, te ni jasi ña de vekaa ja jaꞌa Herodías, ñasiꞌi ñani de Felipe. 4 Chi ni okaꞌan Juan nuu Herodes:

͏―͏Masu vatuka kuu nuu Ley ja kondeka ni ña.

5 Te yun kuu ja ni okuini Herodes ja kaꞌni ña de, su ni oyuꞌu de ja vi kiti ini ñayiu ñuu nuu de, chi ni ka okandijai ja Juan kuu in tee ndakani tnoꞌo ia Dios. 6 Su nuu ni ndajino Herodes kuia de, te ni ka ndasaꞌa viko de, te ni kiuu sesiꞌi Herodías ni jita jaꞌi nuu ka oo de jin ñayiu ni ka kututu yun, te ni jinkuaan ndevaꞌa ini Herodes. 7 Te yun kuu ja ni kee yuꞌu de ja kuñaꞌa de ndiꞌi nagua kakain. 8 Su yun te ni jaꞌin ni jikan tnoꞌi nanai, te saa ni ndajinoi, te jiñaꞌi:

͏―͏Taa ni yiki xini Juan, tee skuandute, na kuꞌun nuu in tijaꞌan yaꞌa ͏―͏jiñaꞌi.

9 Yun te ni kusuchi ini rey yun, su ja siun ni kee yuꞌu de ja kuñaꞌa de nagua jikain jin nuu tee ka nukoo jin de nuu mesa yun, te ni tatnuni de ja vi kuñaꞌa. 10 Yun te ni tatnuni de ja vi kaꞌnde de yiki xini Juan ini vekaa yun. 11 Te ni ka sonee de in nuu tijaꞌan yiki xini Juan, te ni ka jiñaꞌa de nuu suchi siꞌi yun, te suchi yun ni nusiaꞌi nuu nanai.

12 Yun te ni jaꞌankuei tee ni ka oskuaꞌa jin Juan, te ni ka ndakuiso de yiki kuñu yun, te ni jaꞌankuei de ni ka tayuꞌu de. Yun te saa ni jaꞌankuei de ni ka kaxtnoꞌo de nuu Jesús ja siun ni kuu.

13 Te nuu ni jini Jesús ja siun ka ndakani de, te ni kee siin maintnoꞌo ni ya jin in barco kuaꞌan ya in nuu tu na ñayiu oo. Su nuu ni ka jini kuaꞌa ñayiu ja ni kee ya kuaꞌan ya, te ni kekuei ñayiu taka ñuu ja kuaꞌankuei ka jika jaꞌi guaa ndee nuu jino ya. 14 Te nuu ni nana Jesús nuu barco yun, te ni jini ya kuaꞌa ndevaꞌa ñayiu, te ni kundaꞌu ini ña ya jin ñayiu yun, te ni ndasaꞌa ya taka ñayiu ka kuꞌu. 15 Su nuu makukuii ñuyiu, te ni jinokuei tee ka skuaꞌa jin ya, te ka jiñaꞌa de:

͏―͏Ja mañini, te tu na veꞌe ka oo yatni yaꞌa. Ndaxtute ni ñayiu kuaꞌa yaꞌa, na kiꞌinkuei ndee in in ñuu kueli, te na vi kuain ja vi kai.

16 Yun te jiñaꞌa Jesús:

͏―͏Tu na tniuu ñayiu ja kiꞌinkuei. Vi kuñaꞌa maa ni ja vi kai.

17 Yun te ka jiñaꞌa de:

͏―͏Tu nagua ka nevaꞌa san, chi nani uꞌun vi xtaa, te uu nuu chiaka.

18 Yun te jiñaꞌa ya:

͏―͏Vi kisiaꞌa ni nuu saa.

19 Yun te jiñaꞌa ya ja vi junkoo ndiꞌi ñayiu nuu yuku yun. Te ni tnii ya uꞌun xtaa yun vi uu chiaka yun, te ni ndakondiaꞌa ya ichi andivi, te ni jikantaꞌu ya nuu ia Dios, te saa ni jaꞌnde ya xtaa yun. Te ni jiñaꞌa ya nuu tee ka skuaꞌa jin ya, te tee yun ni ka skaka nuu ñayiu kuaꞌa yun. 20 Te ndiꞌi ñayiu ni ka jaa vi ndee ni ka ndutu chii. Te saa ni ka ndaxtutu pedasu ja ni ndoo, te ni ndachitu uxi uu chika. 21 Te tee ni ka jaa yun ka kuu vaa uꞌun mil teyii, te tu ni ka kaꞌu ñasiꞌi vi chikueli.

22 Yun te ni kaꞌan Jesús jin tee ka skuaꞌa jin ya ja kakuei de nuu barco, te vi kokakoxnoꞌo de kokiꞌinkuei de ndee inka jioo yuꞌu ndute yun nini ndaxtute ya ñayiu kuaꞌa yun. 23 Te nuu ni ndaxtute ya ñayiu kuaꞌa yun, te ni kaa ya in nuu tinduu, te yun ni ndakuatu maintnoꞌo ni ya. Te nuu ni kuaa, te oo maintnoꞌo ni ya yun. 24 Su barco yun, chi ja ni kuu sagua nuu ndute kuaꞌan, te uun suaꞌa uun suaꞌa ni ka kuaꞌan saꞌa ola ndute yun, chi suaꞌa manana nuu tachi niꞌi yun. 25 Su nuu makundikin ja matuu, te jika jaꞌa Jesús siki ndute kuaꞌan ya nuu ka oo de. 26 Te nuu ni ka jini ña tee ka skuaꞌa jin ya ja jika jaꞌa ya siki ndute vaji ya, te ni ka yuꞌu de, te ni ka kana jaa de, te ka jiñaꞌa de:

͏―͏¡In anu kuu!

27 Su yun te ni kaꞌan Jesús, te jiñaꞌa ya:

͏―͏Vi koo anu ni, ma vi yuꞌu ni, chi maa san kuu.

28 Yun te jiñaꞌa Pedro:

͏―͏Jitoꞌo san, nuu ja maa ni kuu, te tatnuni ni ja kuu kaka san siki ndute yaꞌa jaa san nuu oo ni ͏―͏jiñaꞌa de.

29 Yun te jiñaꞌa ya:

͏―͏Neꞌe ni.

Yun te ni nuu Pedro nuu barco yun, te ni jika de siki ndute yun kuaꞌan de nuu oo ya. 30 Su nuu ni jini de ja yiꞌi tachi niꞌi nuu ndute yun, te ni yuꞌu de. Te ni jinkondee de makee de nuu ndute yun kuaꞌan de. Te ni kana de, jiñaꞌa de:

͏―͏Jitoꞌo san, ¡skaku niꞌnu ña ni!

31 Yun te vi nuu saa ni skaa Jesús ndaꞌa ya, te ni ndatnii ña ya, te jiñaꞌa ya:

͏―͏Tee tu kandija guaꞌa kuu ni. ¿Nau ja ni ndakani ini ni?

32 Te nuu ni ndakuei ya nuu barco yun, te ni jinkuiin tachi yun. 33 Yun te ni ka jinkuiin jiti tee ka ñuꞌu nuu barco yun nuu ya, te ni ka chiñuꞌu ña de, te ka jiñaꞌa de:

͏―͏Vi ja ndaa ndija ja Seꞌe ia Dios kuu ni ͏―͏ka jiñaꞌa de.

34 Te nuu ni ka yaꞌa ya ndute yun, te ni jinokuei ya nuu nani Genesaret. 35 Te nuu ni ka ndakuni ña ñayiu ñuu yun, te ni ka xtutenui tnoꞌo nuu ndiꞌi ñuu yatni yun ja ni jino ya, te ni ka kisiaꞌi ndiꞌi ñayiu ka kuꞌu nuu ya. 36 Te ni ka jikantaꞌui ja na kuandetu ya vi tnii ñayiu, visi ja joo luluu, yuꞌu saꞌun ya. Te ndiꞌi ñayiu ni ka keꞌe saꞌun ya ni ka nduvaꞌi.