1 Kana jaa san nuu jikantaꞌu san ja na chituu ña Jitoꞌo,

vi kana jaa san nuu jikan san ja na kundaꞌu ini ña ya jin san.

2 Te nuu maa ya kaꞌan kuechi san siki tnundoꞌo tnaꞌa san,

vi nuu maa ya kaxtnoꞌo san tnoꞌo suchi ini ja tnaꞌa san.

3 Te nuu vini ja tu ka na anu san ja kusuchi ndevaꞌa ini san,

su jini maa ni na ichi jika san, vi Dios.

Te nuu ichi jika san ni ka tayuꞌu in xeyu ja vi kakuiko ña jin san.

4 Kondiaꞌa ni ichi ndaꞌa kuaꞌa san, te kuni ni,

ja tu na in ñayiu kii ja chituu ña jin san,

te tu na ndenu tayuꞌu nuu san,

ni tu na in ndiꞌni ja jaꞌa san a kuu san axi koteku san.

5 Ni kana ndaꞌu san nuu ni, vi Jitoꞌo,

te kachi san: “Maa ni kuu ia jito jini ña.

Maa ni kuu ndiꞌi ja nevaꞌa san nuu teku san ñuyiu yaꞌa.”

6 Konini ni joo tnoꞌo kana ndaꞌu san nuu ni,

chi ja makuita saꞌun san ja kusuchi ndevaꞌa ini san.

Skaku niꞌnu ña ni nuu ndaꞌa ñayiu ka sondikin ña jin san,

chi inu ndakui kai saa sein.

7 Ndatau ña ni nuu tnundoꞌo tnaꞌa san yaꞌa ja kuu na kuinio vekaa,

nagua ja na kuu saꞌa kaꞌnu san sivi ni.

Te vi kionduu ña ñayiu ndaa,

nuu vi kuni ja ni saꞌa ni in jaguaꞌa jin san.