1 Saꞌa kaꞌnu ña san jin ni jin ndiꞌi san jin anu san, vi Jitoꞌo,

te kata san in yaa ja saꞌa kaꞌnu ña san jin ni nuu taka ia ka oo andivi.

2 Te junkuiin jiti san ichi nuu oo veñuꞌu ii ni,

te saꞌa kaꞌnu ña san jin ni, chi kundaꞌu ini ña ni vi ia ndaa kuu ni,

chi ni saꞌa kaꞌnu ka ni maa ni vi ni saꞌa kaꞌnu ka ni tnoꞌo kaꞌan ni saa ndiꞌi tuꞌu.

3 Chi kiuu ja ni kana ndaꞌu san nuu ni, te ni onini ni tnoꞌo ni kaꞌan san,

te ni ndataa ni tnoꞌo ndee ini vi ni ndataa ni jandakui san.

4 Te ndiꞌi tee ka kuu rey nuu ñuyiu, vi saꞌa kaꞌnu ña de jin ni, vi Jitoꞌo san,

nuu ka nini de tnoꞌo kaꞌan ni.

5 Te vi kata de yaa ja kaꞌan taka tniuu naꞌnu saꞌa Jitoꞌo,

chi kaꞌnu ndevaꞌa ja yeꞌe tajan ya.

6 Chi visi ndee sukun oo Jitoꞌo, te chindee chituu ya ñayiu ka saꞌa ndaꞌu mai,

su jika ni ndiaꞌa ña ya jin ñayiu ka saꞌa teyii mai.

7 Te visi tnaꞌa ndevaꞌa san tnoꞌo suchi ini,

su maa ni saꞌa ja teku san ndee vitna.

Te jin jakaꞌnu ni, skaku niꞌnu ña ni jin san, nuu ndaꞌa ñayiu ka kaꞌan uꞌu ña,

visi ka kiti ini ndevaꞌi nuu san.

8 Te skunkuu maa ni, vi Jitoꞌo, ja saꞌa ni nagua kuini ni, ja chituu ña ni jin san.

Chi nikuii nikani kundaꞌu ini ni jin ñayiu maa ni,

te ma xndendoo ni tniuu ja ni kejaꞌa ni saꞌa ni jin san, vi Jitoꞌo san.