1 Vi saꞌa kaꞌnu ni Jitoꞌo, chi ia guaꞌa kuu ya,

chi nikuii nikani kundaꞌu ini ña ya jion.

2 Vi saꞌa kaꞌnu ni ia Dios, chi ia kaꞌnu ka kuu ya saa sava ka chuꞌchi,

chi nikuii nikani kundaꞌu ini ña ya jion.

3 Vi saꞌa kaꞌnu ni Jitoꞌo, chi ia kaꞌnu ka kuu ya saa sava ka jitoꞌo,

chi nikuii nikani kundaꞌu ini ña ya jion.

4 Te maintnoꞌo maa ya kuu ia saꞌa tniuu vii tniuu vaꞌa,

chi nikuii nikani kundaꞌu ini ña ya jion.

5 Te maa ya ni saꞌa andivi jin ja ndichi ini maa ya,

chi nikuii nikani kundaꞌu ini ña ya jion.

6 Te maa ya ni jata ñuyiu siki ndute mar,

chi nikuii nikani kundaꞌu ini ña ya jion.

7 Te maa ya ni saꞌa nikandii vi yoo andivi,

chi nikuii nikani kundaꞌu ini ña ya jion.

8 Ni saꞌa ya nikandii nagua ja koyeꞌe tnoꞌo nduu,

chi nikuii nikani kundaꞌu ini ña ya jion.

9 Ni saꞌa ya yoo andivi vi kimi nagua ja vi koyeꞌe tnoꞌo jakuaa,

chi nikuii nikani kundaꞌu ini ña ya jion.

10 Te maa ya ni jaꞌni seyii xtnañuꞌu ndiꞌi ñayiu Egipto,

chi nikuii nikani kundaꞌu ini ña ya jion.

11 Te maa ya ni ndatau ñayiu Israel, neꞌu ñayiu Egipto,

chi nikuii nikani kundaꞌu ini ña ya jion.

12 Te ni skaa ya ndaꞌa ya jin jakaꞌnu ndevaꞌa ya,

chi nikuii nikani kundaꞌu ini ña ya jion.

13 Te maa ya ni jaꞌnde sagua ndute mar kuaꞌa,

chi nikuii nikani kundaꞌu ini ña ya jion.

14 Te maa ya ni saꞌa ja ni ka yaꞌa ñayiu Israel maꞌñu ndute mar yun,

chi nikuii nikani kundaꞌu ini ña ya jion.

15 Te maa ya ni tnaa ña jin Faraón vi soldado de nuu ndute mar kuaꞌa,

chi nikuii nikani kundaꞌu ini ña ya jion.

16 Te maa ya ni jito ni jini ña jin ñayiu ñuu ya ja ni ka jikai nuu ñuꞌu teꞌa,

chi nikuii nikani kundaꞌu ini ña ya jion.

17 Te maa ya ni jaꞌni rey, tee ka kuu naꞌnu ndevaꞌa,

chi nikuii nikani kundaꞌu ini ña ya jion.

18 Vi ni jaꞌni ya rey, tee inu ndakui ndevaꞌa,

chi nikuii nikani kundaꞌu ini ña ya jion.

19 Ni jaꞌni ya Sehón, tee ni okuu rey ñayiu amorreo,

chi nikuii nikani kundaꞌu ini ña ya jion.

20 Vi ni jaꞌni ya Og, tee ni okuu rey ñayiu Basán,

chi nikuii nikani kundaꞌu ini ña ya jion.

21 Te ni jaꞌnde ya ñuꞌu ñayiu yun,

chi nikuii nikani kundaꞌu ini ña ya jion.

22 Te ni jiñaꞌa ya ñuꞌu yun ja vi saꞌa jajin ñayiu Israel ja ka jinokuechi nuu ya,

chi nikuii nikani kundaꞌu ini ña ya jion.

23 Te maa ya kuu ia ndakaꞌan ña jion nuu ja ka kuita saꞌuon,

chi nikuii nikani kundaꞌu ini ña ya jion.

24 Te maa ya ni skaku niꞌnu ña jion nuu ndaꞌa ñayiu ka kaꞌan uꞌu ña,

chi nikuii nikani kundaꞌu ini ña ya jion.

25 Te maa ya jiñaꞌa ja ka jaa ndiꞌi tuꞌu ja ka jichi ka kanda nuu ñuyiu,

chi nikuii nikani kundaꞌu ini ña ya jion.

26 Vi saꞌa kaꞌnu ni ia Dios oo ndee andivi,

chi nikuii nikani kundaꞌu ini ña ya jion.