1 Vi ndakuantaꞌu ni nuu ia Dios, chi ia guaꞌa kuu ya,

te nikuii nikani kundaꞌu ini ña ya.

2 Vi kaꞌan maa ni, ñayiu Israel:

“Nikuii nikani kundaꞌu ini ña ia Dios”.

3 Vi kaꞌan maa ni, ñayiu ka kuu tatatnoꞌo Aarón:

“Nikuii nikani kundaꞌu ini ña ia Dios”.

4 Vi kaꞌan maa ni, ñayiu ka yuꞌu niꞌnu Jitoꞌo:

“Nikuii nikani kundaꞌu ini ña ia Dios”.

5 Nuu ni tnaꞌa ndevaꞌa san tnoꞌo suchi ini, te ni ndakakuneꞌe san Jitoꞌo,

te ni onini ya tnoꞌo ni kaꞌan san, te ni ndatau ña ya nuu tnundoꞌo.

6 Oo maa Jitoꞌo jin san, te ma koyuꞌu san

ja nagua vi saꞌa ña ñayiu jin san.

7 Oo maa Jitoꞌo jin san, te maa ya kuu ia chindee chituu ña jin san,

te yun kuu ja kuni san ja vi ndee ñuꞌu vi konduei ñayiu ka kaꞌan uꞌu ña jin san.

8 Guaꞌa ka kuu ja vi kukanu inio Jitoꞌo,

masu ja vi kukanu inio in ñayiu.

9 Guaꞌa ka kuu ja vi kukanu inio Jitoꞌo,

masu ja vi kukanu inio tee ka tatnuni.

10 Ni ka jionduu ña ñayiu ndiꞌi ñuu jin san,

su jin sivi maa Jitoꞌo, te ni xnaa san ñayiu yun.

11 Ni ka jionduu ña ñayiu jin san, te ni ka tnaa maꞌñu ña,

su jin sivi maa Jitoꞌo, te ni xnaa san ñayiu yun.

12 Ni ka jionduu ña na kuinio ñuñu,

te ñama ni naa ja ka kiti ini ndevaꞌa na kuinio ñuꞌu, ja ñama teñuꞌu ña jin tnu iñu,

chi jin sivi maa Jitoꞌo, te ni xnaa san ñayiu yun.

13 Ni ka chindaꞌa niꞌi ndevaꞌa ña jin san, nagua ja na ndonso san,

su ni chituu ña maa Jitoꞌo jin san.

14 Maa Jitoꞌo taa jandakui san, te jita san yaa nuu maa ya,

chi maa ya kuu ia skaku niꞌnu ña.

15 Te ka kana ñayiu ndaa vi ka jitai ndee nuu veꞌi, ja ka kusii ini ja ni skaku niꞌnu ña ya,

te jin jakaꞌnu maa Jitoꞌo, saꞌa ya tniuu naꞌnu.

16 Te jin jakaꞌnu maa Jitoꞌo, xneꞌe ja ia kaꞌnu ndevaꞌa kuu ya,

te jin jakaꞌnu maa Jitoꞌo, saꞌa ya tniuu ja saꞌu kuii inio.

17 Te ma kuu san, chi koteku san,

nagua ja ndakani san tniuu naꞌnu saꞌa Jitoꞌo.

18 Ni tnaꞌa ndevaꞌa san tnundoꞌo, ni tetniuu Jitoꞌo,

su tu ni jandetu ya ja kuu san.

19 Vi ndakune ni yeꞌe veñuꞌu nuu oo tnoꞌo ndaa,

nagua ja kiuu san, te ndakuantaꞌu san nuu Jitoꞌo.

20 Te yeꞌe veñuꞌu yaꞌa kuu yeꞌe maa Jitoꞌo,

te yeꞌe yaꞌa kiukuei ñayiu ndaa.

21 Te ndakuantaꞌu san nuu ni, vi Jitoꞌo,

chi ni onini ni tnoꞌo ni jikantaꞌu san nuu ni, te ni skaku niꞌnu ña ni jin san.

22 Kava ja ni ka skexiko tee ka saꞌa veꞌe,

ni nduu kava kaꞌnu ja yituu skina veꞌe.

23 Tniuu yaꞌa ni saꞌa maa Jitoꞌo,

te vi ni ka saꞌu kuii inio ka ndiaꞌo.

24 Vitna kuu kiuu ja ni saꞌa maa Jitoꞌo, te na vi kokusii inio,

te vi kosii inio nuu ya.

25 Jikantaꞌu san nuu ni, vi Jitoꞌo, ja skaku niꞌnu ña ni jin in in san.

Jikantaꞌu san nuu ni, vi Jitoꞌo, ja saꞌa ni ja na kekuei guaꞌa san.

26 Na taꞌu na ndetu ñayiu vaji jin sivi maa Jitoꞌo,

chi ndee nuu ka oo san veꞌe maa Jitoꞌo, ka jikantaꞌu san ja na saꞌa vii saꞌa vaꞌa ña ya jin.

27 Maa Jitoꞌo kuu ia Dios mao, te yeꞌe ya nuo.

Vi kuꞌni ni kiti ja vi soko ni nuu ya, te kuaꞌankuei ni jin ti ndee nuu oo ndiki nuu altar.

28 Maa ni kuu ia Dios san, te ndakuantaꞌu san nuu ni,

vi saꞌa kaꞌnu ña san jin ni, vi Dios.

29 Vi ndakuantaꞌu ni nuu ia Dios, chi ia guaꞌa kuu ya,

te nikuii nikani kundaꞌu ini ña ya.